Ѕвездата на Борусија Дортмунд, Џуд Белингем, изјави дека сонува да стави крај на 11-годишното чекање на клубот за титула во Бундеслигата. 19-годишниот играч е клучен во тимот на Един Терзиќ кој моментално има бод предност пред Баерн Минхен на врвот на табелата, на пет натпревари до крајот на сезоната.

„Никој во нашата соблекувална не сонуваше да биде прв по 29 кола. Сонот е да бидеме први по 34 коло. Мораме да победуваме на секој натпревар до крајот на сезоната. Без разлика дали Баерн го победил Мајнц или загубил, ние имаме наша задача. Сакаме да сонуваме, но прво треба да се погрижиме да ја завршиме нашата работа“, вели Англичанецот.

Челниците на шпанскиот прволигаш Хетафе преку официјалниот сајт на клубот соопштија дека Кике Санчез Флорес не е повеќе тренер на тимот.

58-годишниот Флорес е сменет како резултат на серијата од пет првенствени натпревари без победа, а одлучувачки беше поразот на домашен терен од Алмерија која е е директен ривал во трката за опстанок.

Хетафе во последните седум кола го очекува тешка битка за опстанок во елитата и според последните информации нов тренер ќе биде Хозе Бордалес.

Марко Ројс го продолжи договорот со Борусија Дортмунд на уште една година.

Новиот договор на Ројс е со важност за дополнителни 12 месеци. Се шпекулираше за понуди од Саудиска Арабија, но Ројс продолжи да биде верен кон „милионерите“.

Ројс има 33 години, а за Борусија постигна 161 гол во дресот на овој клуб и му недостасуваат уште 17 за да биде најдобриот стрелец во историјата на Борусија.

Милан е заинтересиран за дефанзивецот на Сити, Кајл Вокер и играчот за врска на Ливерпул, Наби Кеита.

Договорот на Кеита завршува на крајот на сезоната и тој сигурно ќе го напушти Ливерпул како слободен агент на лето. „Росонерите“ сакаат да го доведат без обештетување и веќе успратиле понуда до неговиот агент.

Што се однесува со Вокер, тој има уште една година од договорот, но Гвардиола не смета повеќе на него и му порачал да си бара нов клуб.

Милан сака да ја искористи ситуацијата и да го доведе на „Сан Сиро“ за симболична сума.

Лондонски Челзи загуби во натпреварот од 33. коло во Премиер лигата и тоа од Брентфорд (0-2). Овој пораз беше веќе 11-ти за екипата на Челзи откако раководството на тимот го отпушти тренерот Томас Тухел. Оваа информација денес ја објави статистичкиот портал „Опта Спорт“.

По отказот на германскиот стручњак, Челзи одигра 26 натпревари во Премиер лигата. Во нив сините остварија осум победи, седум пати ремизираа и 11 пати загубија. Исто толку порази имаше за цело време додека тимот го водеше Тухел. Германецот работеше во Челзи од јануари 2021 до септември 2022 година. 

Под негово водство, лондончани победија на 35 натпревари во Премиер лигата, 17 пати ремизираа и 11 пати загубија. Сега Челзи е предводен од Френк Лампард, а под негово водство тимот загуби пет натпревари по ред.

Бенџамин Павард би можел кариерата да ја продолжи во Серија А, пренесуваат италијанските медиуми.

Иднината на 26-годишниот Французин е прилично неизвесна во Баерн, бидејќи влезе во последната година од договорот.

Преговорите помеѓу двете страни се во прекин, а Павард е спремен да ја промени средината. Ситуацијата будно ја следи Милан, кој е силно заинтересиран за Французинот, а шпекулациите се разгореа откако Павард пред неколку дена беше на „Сан Сиро“ да ги гледа „росонерите“.

Тухел сака да го задржи, но доколку Павард не стави потпис на нов договор, Баерн е спремен да го продаде за 20 милиони евра.

ПСЖ покажува сериозен инетерес за шпанскиот репрезентативец и дефанзивец на Виљареал, Пау Торес.

ПСЖ сака да ја засили одбраната, а Торес е прв на листата желба бидејќи клубот во него гледа идеален наследник на Серхио Рамос. 26-годишниот Шпанец се етаблираше во еден од најдобрите дефанзивци во Примера и го привлече вниманието на многу европски гиганти. Ова лето беше на мета на Манчестер Јунајтед, но сепак остана во Виљареал, а ПСЖ веќе спрема понуда од 50 милиони евра за неговиот потпис.

Торес е спремен да направи чекор напред во кариерата и е отворен за преселба во Париз, тврдат шпанските медиуми.

Франк Кеси ова лето пристигна во Барселона како големо засилување, но само после една сезона ќе го напушти „Камп Ноу“.

Кеси не е задоволен од третманот што го има во Барселона каде добива мала минутажа и главно е на клупата за резерви.

Притоа, клубот побарал да прифати намалување на платата, па откако Кеси одбил и Барселона е спремна да го продаде. Сега во трката за неговиот потпис се приклучи и Јувентус, кој сака да го врати играчот во Серија А.

Барселона за неговата слобода бара 25 милиони евра, а „старата дама“ е спремна да ја плати таа сума.

Томас Тухел неодамна пристигна во Баерн Минхен, а на лето ќе има поддршка да донесе засилувања по своја мерка.

Германските медиуми пренесуваат дека Тухел побарал од раководството две засилувања, едно во нападот и едно во средниот ред. Најголема желба на Германецот е напаѓачот на Наполи, Виктор Осимен, кој оваа сезона е вистински хит во Серија А.

За него интерес покажуваат многу европски гиганти, но Баерн е спремен да ја победи конкуренцијата и нема да жали пари за да го доведе во Минхен.

Другата желба на Тухел е Матео Ковачиќ со кого соработуваше во Челзи. Овој трасфер е полесен за реализација бидејќи „сините“ се спремни да го продадат Хрватот, кој влегува во последната година од договорот.

Нголо Канте на лето најверојатно ќе го напушти Челзи, бидејќи ги прекина преговорите за продолжување на договорот.

Медиумите на Островот пренесуваат дека може кариерата да ја продолжи во големиот ривал на Челзи.

Имено, Арсенал покажува сериозен интерес и испратил понуда до неговиот агент. Артета е во потрага по квалитетен играч за врска и верува дека Канте би бил идеално засилување. Канте влезе во последната година од договорот со Челзи, па иако се чинеше дека „сините“ ќе направат се за да го задржат, сепак Французинот е блиску до заминување.

Канте сака да остане во Премиер лигата, па е спремен да ја прифати понудата на Арсенал.