Антонели победи на првата Формула 1 трка во Мадрид

Италијанецот Кими Антонели победи на трката за ГН на Шпанија, која се возеше на новата патека „Мадринг“ во Мадрид и дополнително ја зацврсти својата лидерска позиција во генералниот пласман на Формула 1.

Младиот Италијанец од Мерцедес стигна до нов триумф пред Макс Верстапен и Ландо Норис. Антонели низ целта мина со предност од три секунди пред Верстапен, додека Норис заостана четири секунди зад победникот. Чарлс Леклер го освои четвртото место за Ферари, а петти заврши Џорџ Расел во вториот болид на Мерцедес.

Во топ 10 се пласираа уште Лиам Лосон, Франко Колапинто, Оскар Пјастри, Арвид Линдблад и Нико Хулкенберг. Големо разочарување доживеа Луис Хамилтон. Возачот на Ферари беше принуден да се повлече уште по шестиот круг поради проблеми со сопирачките. Британецот уште во воведните кругови пријави технички потешкотии.

За Антонели ова е втора последователна победа, откако минатата недела триумфираше и на домашната трка во Монца.

Со новите 25 бода, Италијанецот дополнително ја зголеми предноста на врвот во генералниот пласман и потврди дека Мерцедес во моментов располага со најконкурентниот пакет во шампионатот.