„Бараме реванш!“ – Навивачите на Јунајтед бесни поради нерегуларен играч на Гримзби

Навивачите на Манчестер Јунајтед бараат реванш по шокантниот пораз од Гримзби Таун во второто коло од Карабао Купот, откако беше откриено дека англискиот третолигаш користел нерегуларен играч на натпреварот. 

Гримзби го внесе новото засилување Кларк Одуор како замена во драматичниот натпревар што заврши 2-2, а потоа го доби со победа на пенали од 12-11. Подоцна се дозна дека клубот го регистрирал Одуор само една минута по официјалниот рок, поради што технички не смеел да настапи. 

Оваа информација предизвика револт кај дел од навивачите на Јунајтед, кои преку социјалните мрежи побараа резултатот да биде поништен или натпреварот да се преигра. Сепак, Англиската фудбалска лига (ЕФЛ) потврди дека резултатот останува и дека Гримзби нема да биде исфрлен од Купот. 

Наместо тоа, Гримзби доби парична казна од £20,000, од кои половина е условна. ЕФЛ нагласи дека грешката не била намерна и дека клубот сам ја пријавил ситуацијата ден по натпреварот.