Де Јонг по петнаесет месеци пак ќе заигра за Холандија

Фудбалерот на Барселона, Френки де Јонг, се враќа во составот на Холандија за последните два натпревари на „лалињата“ во групната фаза на Лигата на нациите. Ова доаѓа по 433 дена, откако играчот на каталонскиот клуб се рехабилитираше од сериозна повреда, поради која го пропушти и Европското првенство.

Селекторот Роналд Куман денеска ги објави повиканите играчи кои ќе се соочат со Унгарија на 16 ноември и Босна и Херцеговина три дена подоцна. Крилото на ПСВ Ајндховен, Ноа Ланг, и дефанзивецот на Ајакс, Девајн Ренш, исто така се враќаат во националниот тим.

Напаѓачот на Коринтијанс, Мемфис Депај, не е повикан во составот. Поради повреди, исто така, не се повикани Чави Симонс, Џои Ферман, Јерди Шаутен, како и Нејтан Аке, Јан Матсен и Гус Тил.

Холандија има само теоретски шанси за првото место во групата, бидејќи на фаворитот Германија му е потребен само еден бод за да го обезбеди. „Лалињата“ имаат ист број бодови со Унгарија и ќе се борат за второто место, кое носи право за пласман во четвртфиналето.