Ждрепката во Вашингтон ќе ги одреди групите на Мундијалот

Ждрепката за групната фаза на Светското првенство во фудбал во 2026 година ќе се одржи денес, со почеток во 18:00 часот по централноевропско време, во „Кенеди центарот“ во Вашингтон.

Досега, 42 екипи го обезбедија своето место на првото Светско првенство со 48 репрезентации. Останатите шест учесници ќе бидат познати во март следната година, за кога се закажани европските и интерконтиненталните плеј-оф натпревари.

Пред денешната ждрепка во Вашингтон, учесниците на Светското првенство традиционално се поделени во четири барабани врз основа на нивната ранг-листа на ФИФА. Исклучок се трите домаќини (САД, Канада и Мексико) на кои однапред им беа доделени места во првиот барабан со најквалитетните национални селекции.

Шешир 1: САД , Мексико , Канада , Шпанија, Аргентина, Франција, Англија, Бразил, Португалија, Холандија, Белгија, Германија;

Шешир 2: Хрватска, Мароко, Колумбија, Уругвај, Швајцарија, Јапонија, Сенегал, Иран, Јужна Кореја, Еквадор, Австрија, Австралија;

Шешир 3: Норвешка, Панама, Египет, Алжир, Шкотска, Парагвај, Тунис, Брегот на Слоновата Коска, Узбекистан, Катар, Саудиска Арабија, Јужна Африка;

Шешир 4: Јордан, Зелено’ртски Острови, Гана, Курасао, Хаити, Нов Зеланд, четири победници на европските плејоф натпревари (турнири А, Б, Ц и Д), двајца победници на интерконтиненталните плејоф натпревари (турнир 1 и турнир 2).

За потребите на закажувањето на натпреварите, на националните тимови на САД, Канада и Мексико однапред им беа доделени позиции во одредени групи – А1 за Мексико, Б1 за Канада и Д1 за САД.

За време на денешната ждрепка, ФИФА ќе го почитува својот принцип дека две репрезентации од истата конфедерација не можат да бидат во иста група. Поради големиот број учесници, единствени исклучоци се членките на УЕФА, односно европските репрезентации. Репрезентациите рангирани на првото место (Шпанија) и второто место (Аргентина), или третото место (Франција) и четвртото место (Англија) на ранг-листата на ФИФА ќе бидат распоредени во групи на начин што, доколку завршат први во своите групи, подоцна ќе се најдат на спротивните страни од нокаут фазата, така што не можат да се сретнат пред полуфиналето.