Магдевски сериозно се повреди, го чека долга пауза

Кошаркарот на МЗТ Скопје, Андреј Магдевски, заработи сериозна повреда на коленото на натпреварот на домашен терен против Тиквеш, по што ќе мора да паузира подолг период и неговата сезона е предвреме завршена, соопштија од клубот.

Инцидентот се случи при продор кон противничкиот кош, кога македонскиот репрезентативец почувствува силна болка, падна на паркетот и веднаш беше заменет.

Дополнителните медицински прегледи и снимки покажаа дека станува збор за потешка повреда на коленото, која ќе бара подолга рехабилитација.

Повредата на Магдевски претставува сериозен удар за МЗТ, со оглед дека повредени се и Војдан Стојановски и Андреј Маслинко.

Ова претставува и проблем за македонската репрезентација, со оглед што Магдевски сигурно ќе ги пропушти јулските натпревари против Ирска и Луксембург во првата фаза од претквалификациите за ЕП 2029, како и дуелите во август на стартот од втората претквалификациска рунда.