Меси го именува својот омилен гол во кариерата

Ѕвездата на Интер Мајами, светскиот шампион со Аргентина и освојувач на осум Златни Топки, изјави дека голот против Манчестер Јунајтед во финалето од Лигата на Шампионите му е омилен, над сите други што ги има постигнато за клубот и репрезентацијата во текот на неговата неспоредлива кариера. 

„Постигнав многу голови кои можеби беа поубави или поважни – и поради начинот на кој беа постигнати и поради нивното значење – но голот со глава во финалето на Лигата на Шампионите против Манчестер Јунајтед отсекогаш ми бил омилен“, рече Меси. 

Тој гол ѝ донесе предност на Барселона од 2-0 во 70-тата минута, што воедно беше и конечниот резултат на натпреварот. Беше тоа момент каков што ретко се гледа во кариерата на Меси. 

Џави Ернандез упати центаршут од десната страна, а Меси – кој не е познат по голови со глава – скокна и ја стигна топката која се наоѓаше на височина од речиси 2,70 метри, пренасочувајќи ја со глава покрај голманот на Манчестер Јунајтед, Едвин ван дер Сар. 

Меси, кој е еден од најдобрите фудбалери на сите времиња, има постигнато повеќе од 800 голови во неговата блескава кариера, но гол во финале од Лигата на Шампионите секогаш има посебна тежина.