Меси нема да замине во Саудиска Арабија на позајмица

Лионел Меси планираше да ја искористи претстојната четиримесечна пауза од МЛС за да остане во форма пред Светското првенство во 2026 година, но неговиот план не наиде на разбирање во Саудиска Арабија.

Како што објави „RMC Sport“, аргентинскиот фудбалер сакал да потпише краткорочен договор со еден од клубовите на Саудиската професионална лига во текот на зимскиот период, со цел да остане во натпреварувачкиот ритам. Сепак, локалните власти и клубовите експресно ја отфрлиле таа можност.

Причината е јасна, саудиската лига не сака да стане привремена дестинација за странски ѕвезди, туку се стреми да изгради сериозно и конкурентно натпреварување кое ќе им конкурира на најсилните европски лиги.

Во овој контекст, отфрлањето на предлогот на Меси се толкува како принципиелен потег што покажува дека Саудијците не сакаат да бидат „тренинг полигон“, дури ни за еден од најдобрите фудбалери на сите времиња.

Меси, кој игра за Интер Мајами две години, досега постигна 73 гола и запиша 37 асистенции во 83 натпревари. Тој неодамна го продолжи договорот со клубот од Флорида до 2028 година, кога ќе има 41 година.

Неговата моментална пазарна вредност е околу 18 милиони евра, што е сè уште импресивно за играч во доцните фудбалски години.