Олимписката шампионка во маратон позитивна на допинг тест

Кениската маратонка Перес Џепчирчир, олимписка шампионка од Токио 2021 и актуелна светска првенка, е привремено суспендирана откако нејзин примерок од допинг-контрола бил позитивен на забранетата супстанца еритропоетин, позната како ЕПО.

Единицата за интегритет на атлетиката соопшти дека примерокот бил земен надвор од натпреварување во Кенија, пред нејзиниот настап на маратонот во Сиднеј, каде што Џепчирчир победи на 30 август со време од 2:18:31 часа.

Триесет и тригодишната атлетичарка е една од најуспешните маратонки во светот. Покрај олимпиското и светското злато, таа победувала и на престижните маратони во Њујорк во 2021, Бостон во 2022 и Лондон во 2024 година. Воедно, таа е поранешна светска рекордерка во полумаратон.