Ромеро го продолжи договорот со Тотенхем

Фудбалерот на Тотенхем, Кристијан Ромеро, потпиша денеска нов, повеќегодишен, договор со лондонскиот клуб, со кој минатата сезона ја освои титулата во Лига Европа.

Во претходните месеци, англиските медиуми пишуваа за евентуален трансфер на Ромеро во Атлетико Мадрид, но на крајот, 27-годишниот дефанзивен играч одлучи да остане во Тотенхем, продолжувајќи го договорот до 2029 година.

Според медиумите, аргентинскиот репрезентативец е задоволен од соработката со новиот тренер Томас Франк, особено откако беше назначен за капитен.

Ромеро е член на Тотенхем од 2022 година, настапувајќи претходно за Белграно, Џенова, Јувентус и Аталанта.

Со аргентинската репрезентација ја освои светската титула во Катар пред три години, како и два трофеи во Копа Америка, во 2021 и 2024 година.