Уапсен првиот човек на грчката кошарка

Вангелис Лиолиос е меѓу лицата опфатени со истрага за поткуп и нерегуларности во кошарката, а издадени се налози за апсење на вкупно шест лица, меѓу кои и судии кои работеле во Евролигата.

Голем скандал ја потресе грчката кошарка, откако претседателот на Кошаркарската федерација на Грција, Вангелис Лиолиос, беше уапсен во рамките на истрага за сомнежи за местење натпревари и поткуп.

Според информациите што ги објавија грчките медиуми, покрај Лиолиос, со случајот се поврзани уште пет лица, за кои биле издадени налози за апсење. Меѓу нив има функционери и кошаркарски судии, вклучително и имиња познати од европската кошарка.

Истрагата ја водел спортскиот обвинител Апостолос Граменос, а кривичната постапка се однесува на сомнежи за поткуп и прекршувања на законите во областа на спортот.

Според досегашните информации, под лупа се натпревари од највисокиот ранг на грчката кошарка, но и од пониските категории, во период од најмалку пет години. Во предметот наводно се вклучени и пријави од кошаркарски агенти, како и информации за финансиски средства чие потекло се проверува.

Меѓу имињата што се споменуваат во медиумските извештаи се поранешниот евролигашки судија Илијас Коромилас и активната судијка Василики Царуха. Во оваа фаза, сепак, станува збор за сомнежи што треба да бидат предмет на понатамошна правна постапка, а не за докажана вина.

Лиолиос е на чело на Кошаркарската федерација на Грција од септември 2021 година. Случајот предизвика големо внимание во тамошната спортска јавност, а се очекува во наредните денови да бидат познати повеќе детали за наводните нерегуларности и понатамошниот тек на истрагата.