Јанг одигра партија каква ретко се гледа!

Атланта дојде до победа над Филаделфија во четвртиот натпревар од полуфиналната серија во доигрувањето на Истокот во НБА лигата и така израмни на 2:2. Во натпреварот кој заврши со резултат 103:100, одлична партија даде Трае Јанг.

Јанг на натпреварот против најдобрата екипа на Истокот во првиот дел од сезоната заврши со учинок од 25 поени, четири скока и 18 асистенции и одигра натпревар со кој се запиша во книгата на рекорди.

Стана првиот играч на својата франшиза кој во натпревар од плејофот имал барем 15 поени со барем толку асистенции, уште од Док Риверс во 1988. година, кога одигра натпревар со 16 поени и 18 асистенции.

Исто така, од 1991. година не е виден натпревар во плејофот во кој еден играч остварил учинок од 25+ поени и 18+ асистенции. Последниот кој тоа го направи беше Тим Хардавеј во дресот на Голден Стејт.

Јанг го сруши и рекордот на НБА лигата кој беше во сопственост на Спад Веб од 1986. година, односно со своите 22 години стана најмладиот играч кој во доигрувањето поделил барем 18 асистенции.