Џејсон Кид: Со Кајри ќе бидеме конкуренти за титулата

Тренерот на Далас Маверикс, Џејсон Кид, излезе со оценка дека неговата екипа со доаѓањето на Кајри Ирвинг може да се бори за титула во НБА лигата.

Според договорот помеѓу Далас и Бруклин, Ирвинг заедно со Маркиф Морис ќе го носат дресот на Маверикс, додека Доријан Фини-Смит и Спенсер Динвиди ќе се преселат во Нетс.

„Мислиме дека неговиот талент и способности ќе не направат подобри. Доаѓањето на Ирвинг ќе ни помогне да дојдеме во позиција за освојување на титулата. Неговото поврзување со Лука Дончиќ ќе биде исклучително важно за екипата“, изјавува Кид.

Кајри Ирвинг во 2016.година успеа да ја освои НБА титулата настапувајќи во дресот на Кливленд, а кошаркарот е и осумкратен учесник на Ол-стар натпреварите. Тој на почетокот од минатата недела самиот побара да биде трејдуван откако не договори продолжување на соработката со раководството на Нетс.