Дефанзивен колапс во Барселона: Кунде и Балде надвор од стројот во клучен дел од сезоната

Иако Барселона синоќа славеше убедлива победа од 3–0 над Атлетико Мадрид во реваншот од полуфиналето на Копа дел Реј, триумфот имаше горчлив вкус. И покрај доминацијата, „Каталонците“ беа елиминирани со вкупни 4–3, а цената за овој обид за пресврт се покажа како превисока за тимот на Ханси Флик. Несреќната серија започна со Жил Кунде, кој беше принуден да го напушти теренот по само десет минути игра, додека неговата замена, Алехандро Балде, исто така не го дочека крајот на натпреварот поради повреда.

Утрово, медицинскиот тим на клубот ги потврди црните прогнози. Алехандро Балде се соочува со повреда на дисталниот дел од тетивата на левиот бут. Младиот бек, кој во солзи го напушти тревникот, се очекува да отсуствува околу четири до пет недели. Ништо подобра не е ниту ситуацијата со Жил Кунде. Кај францускиот репрезентативец е дијагностицирана повреда на бицепс феморис (средна третина) на левата нога, што ќе го оддалечи од терените во наредните три до четири недели.

Моментот за овие повреди е критичен за амбициите на Барса. Флик ќе мора да бара алтернативни решенија за серијата клучни натпревари, вклучувајќи го и осминафиналниот дуел во Лигата на шампионите против Њукасл, како и тешките гостувања кај Атлетик Билбао и Севиља. Со оглед на тенкиот ростер во дефанзивата, се очекува поголема минутажа за талентите од академијата. Надежта на навивачите е дека претстојната репрезентативна пауза ќе му овозможи на двоецот побрза рехабилитација за финишот на сезоната.