Лесни победи на Алкалоид и Тиквеш во 10. коло на Суперлигата

Ракометарите на Алкалоид и Тиквеш не дозволија изненадувања и славеа убедливи победи во денешните први натпревари од 10. коло во Суперлигата.

Aлкалоид лесно се справи со Куманово и запиша победа од 40-25, додека Тиквеш со 38-30 беше подобра од Струга. Од самиот почеток домаќинот го наметна своето темпо на игра и предноста многу брзо растеше со што стануваше јасно дека гостите нема да имаат никакви шанси за некакво изненадување.

Во завршницата од првото полувреме Алкалоид за првпат стигна и до двоцифрена предност од десет голови разлика (18-8). На паузата избраниците на Кире Лазаров веќе имаа и водство од 23-11. Ништо не се промени ниту во второто полувреме и Алкалоид продолжи да ја одржува предноста за на крајот да слави и со 15 голови разлика.

Сличен развој на настаните имаше и натпреварот во Кавадарци каде што Струга парираше само во почетните минути, а се во продолжение помина во знакот на домашниот тим.