Индија претставува споменик за Меси висок 21-метар

Лионел Меси, осумкратен добитник на Златната топка и еден од најголемите фудбалери во историјата, следната недела првпат ќе слета во Индија. Аргентинската ѕвезда ќе пристигне во Колката на 13 декември како дел од „GOAT India Tour“, специјален настан посветен на неговата исклучителна кариера. Централниот момент на посетата ќе биде откривањето на колосална бронзена статуа висока 21 метар, поставена во Лек Таун, живописен кварт во северниот дел на градот.

Посетата се смета за голем чекор и за Индија, земја во која што Меси ужива огромна популарност. Статуата, е замислена како почит кон неговите подвизи: од годините во Барселона до врвот на светот со Аргентина.

Изработувана со месеци од вешти индиски уметници, статуата го претставува најголемото дело посветено на активен спортист во земјата. Меси лично ќе ја открие за време на свеченоста што се очекува да собере илјадници навивачи, со музички настапи, интеракции со публика и ексклузивни изданија на навивачка опрема. „GOAT India Tour“ ќе понуди и други активности низ Индија, спојувајќи спортска носталгија и современ маркетинг.

За Меси, кој доаѓа по обврските во Интер Мајами, ова патување ја одразува неговата се поголема улога како глобален спортски амбасадор. Индиските фудбалски кругови во тоа гледаат важна можност за подигање на профилот на фудбалот во земјата и зајакнување на домашните натпреварувања. Организаторите веќе подготвуваат засилени безбедносни мерки, очекувајќи голем интерес и метеж.

Откривањето на статуата е повеќе од церемонијален чин, тоа е симбол на нов подем на фудбалот во земја каде што традиционално доминира крикетот. За многумина, доаѓањето на Меси претставува поттик за идните генерации, од уличните игралишта во Колката до академиите во Мумбај.

„Ова е сон за секој индиски навивач,“ вели Калјан Чоубе од Индиската фудбалска федерација, сумирајќи ја атмосферата што ја обви градот.