Норвешка на крилата на Халанд го елиминираше Бразил, Англија низ драма до четвртфинале

сминафиналната фаза на Светското првенство донесе судир кој целосно ги оправда очекувањата за неизвесност. На стадионот во Њујорк/Њу Џерси, се сретнаа Норвешка и Бразил, дуел кој пред само неколку години би се сметал за рутина за Јужноамериканците, но денес реалноста е поинаква. Со оглед на тоа што „Селесао“ веќе подолго време не ја ужива некогашната доминација, многумина аналитичари пред натпреварот сметаа дека Норвежаните се дури и во блага предност. На теренот видовме целосно рамноправна игра, која на крајот заврши со победа на Норвешка од 2:1.

Првите 78 минути поминаа во цврста тактичка битка без изразени доминации на ниту една страна. Клучниот момент кој ја прекина рамнотежата се случи во 79-тата минута, кога суперѕвездата на Манчестер Сити, Ерлинг Халанд, ја затресе мрежата за водство на Скандинавците. Додека Бразилците се обидуваа да се вратат во игра, Халанд удри уште еднаш во 90-тата минута по една брза контра, зголемувајќи на 2:0. Сè што успеа да направи Бразил беше ублажување на поразот преку Нејмар, кој реализираше пенал во судиското продолжение (90+10′), но веднаш по тоа судијата означи крај за голем пласман на Норвешка меѓу осумте најдобри.

Само неколку часа подоцна, вистински трилер со пет гола се одвиваше на стадионот во Мексико Сити, каде Англија со 3:2 го совлада кодомаќинот Мексико. Натпреварот започна со вистинско шоу на Џуд Белингем. Младиот Англичанец постигна два брзи гола во 36-тата и 38-мата минута, носејќи им на гостите комотна предност. Сепак, домашната публика ја разбуди Хулиан Кињонес, кој намали на 2:1 непосредно пред паузата.

Натпреварот целосно се закомпликува во 54-тата минута кога англискиот дефанзивец Џарел Кванса заработи директен црвен картон. И покрај играчот помалку, Англија зголеми на 3:1 преку Хари Кејн од пенал во 60-тата минута. Мексиканците не се предаваа, тргнаа во офанзива и во 69-тата минута, исто така од белата точка преку Раул Хименес, намалија на 3:2. Следуваше жесток притисок врз голот на Англија, но одбраната на „Трите лава“ издржа во драматичните завршни дваесетина минути за пласман во следната рунда.