Нова пауза за Нејмар во Сантос поради болки во коленото

Бразилската ѕвезда Нејмар повторно се соочува со повреда во Сантос, поради што ќе ја пропушти важната пресметка со Интернасионал. Напаѓачот чувствува болка во левото колено, истото што беше оперирано по тешката повреда на вкрстениот лигамент и менискусот во квалификациите за Светското првенство во 2023 година.

Иако оваа година се врати на терените, коленото и понатаму му создава проблеми. Последните лекарски прегледи потврдија дека сегашната иритација повторно се јавува на оперираното место, што го принуди Сантос да го тргне од конкуренција за претстојниот меч.

Отсуството на Нејмар е удар за екипата во период кога ја очекуваат сериозни предизвици во Серија А. Медицинскиот тим на клубот внимателно ја следи неговата состојба со цел да го смири воспалението и да спречи дополнително оштетување, додека напаѓачот продолжува да ја гради својата форма по долгата рехабилитација со сон за Мундијалот.