Сензација во Купот: Второлигашот Албасете го шокираше Реал Мадрид на дебито на Арбелоа

Албасете приреди една од најголемите сензации во шпанскиот куп, совладувајќи го Реал Мадрид со 3-2 во осминафиналето. Второлигашот го елиминираше фудбалскиот гигант во драматичен, маглив и целосно луд натпревар на Карлос Белмонте, а херој на вечерта беше Хефте Бетанкор со мајсторски лоб во судиското продолжение.

Победата добива уште поголема тежина ако се земе во предвид дека дојде на дебито на Алваро Арбелоа како тренер на Реал, само неколку дена по отказот на Чаби Алонсо и по поразот од Барселона во финалето на Суперкупот. Иако Гонзало Гарсија израмни доцна во мечот, Албасете покажа неверојатен карактер и го зададе последниот удар.

За Албасете, кој се наоѓа на 17. место во Сегунда и нема лигашка победа од 8 декември, овој триумф е вистинско чудо. Претходно клубот ја елиминираше и Селта по пенали, а ова е нивен најголем „скалп“ уште од сезоната 2005/06 во Ла Лига.

Домашните навивачи, пак, со иронија ги испратија гостите со скандирања: „Фала што дојдовте, конечно победивме, вратете се следната недела!“

Според новинари на настанот, атмосферата во соблекувалната на Реал била „како на погреб“ — целосна тишина, без преземање одговорност од страна на играчите. Арбелоа, иако со минимално време за подготовка, ја презеде целата вина и јавно ги заштити своите фудбалери: „Немам што да им замерам. Јас сум одговорен.“

Овој молк дополнително ги подгрева сомнежите дека проблемите во клубот се подлабоки и структурни, а не само тренерски — сценарио кое потсетува на долгогодишната криза на Манчестер Јунајтед.

Арбелоа им даде шанса на неколку младинци, меѓу кои Хорхе Сестеро и Давид Хименес, комбинирани со стандардните Винисиус Жуниор и Федерико Валверде. Но тимот делуваше неуиграно, особено со оглед на тоа што дури 11 првотимци беа повредени, вклучувајќи го и Килијан Мбапе.

Иако Реал е втор во Ла Лига и седми во Лигата на Шампионите, елиминацијата од Купот претставува сериозен удар и потсетник на срамниот пораз од Алкојано во 2021 година. Следниот предизвик е дуелот со Леванте, но оваа вечер најавува турбулентен почеток на новата ера на Бернабеу.