Наполи ги продолжува своите обиди да го привлече напаѓачот на Ливерпул Дарвин Нуњез. Уругваецот е избор број еден на тренерот на шампионот на Италија, Антонио Конте, за засилување на нападот.
Нуњез е подготвен да се пресели во Наполи, но двата клуба треба да се договорат за сумата на трансферот. Црвените бараат околу 40 милиони фунти, додека во овој момент италијанскиот клуб е подготвен да даде 35 милиони.
Иако има тешкотии да го реализира трансферот на украинскиот дефанзивец на Борнмут, Иља Забарни од Борнмут, од Пари Сен Жермен не се откажале од привлекувањето на фудбалери, напиша весникот “Екип”.
Францускиот тим, кој го освои Лигата на шампионите, не успеа да го доведе Забарни пред Светското клупско првенство, но преговорите меѓу двата клуба се обновени.
ПСЖ нуди малку повеќе од 50 милиони евра за правата на одбранбениот играч, додека од клубот од Премиер лигата инсистираат да добијат 70 милиони за правата на 22-годишниот играч. Разговорите се водат од Луис Кампос, со очекување договорот да биде финализиран во наредните денови, а Французите да платат 60 милиони евра за Забарни.
Поранешниот фудбалер на Лил, Џонатан Дејвид, најверојатно ќе го засили Фенербахче, пренесуваат релевантните турски медиуми.
Овој убоен канадски напаѓач некогаш го посакуваше Барселона, а до пред неколку дена беше во врска со Интер, Наполи и Јувентус, но изгледа дека Жозе Мурињо го убедил да се пресели во најголемиот турски град и да му помогне на Фенер да ја донесат шампионската титула, која овој клуб ја чека уште од 2014 година.
Наводно, сè е договорено со Дејвид, кому на крајот на сезоната му истече договорот со Лил.
Новинарите блиски до Фенербахче пишуваат дека Дејвид ќе потпише тригодишен договор за плата од 10 милиони евра по сезона.
И не само тоа, се очекува дека Фенер ќе му плати 15 милиони евра само за потпис на договорот.
Дејвид играше за Лил од 2020 година, а за пет години запиша 178 настапи и постигна 87 голови за францускиот клуб. Со Лил во 2021 година беше државен шампион.
Аријан Адеми ја затвори својата долга етапа во Динамо Загреб. Македонскиот репрезентативец и доскорешен капитен на „модрите“ постигна договор за спогодбено раскинување на договорот што важеше до летото 2025 година, а кариерата ќе ја продолжи во унгарскиот прволигаш Ујпешт.
Клучна улога во неговиот избор одигра тренерот Дамир Крзнар, поранешниот стратег на Динамо, кој сега го води тимот од Будимпешта. Иако се шпекулираше за неколку опции од регионот и Блискиот Исток, Адеми реши фудбалската приказна да ја заокружи во соседството.
Адеми стигна во Динамо во 2010 година од Шибеник, а по кратка позајмица во Локомотива, брзо се етаблираше како важна алка во средниот ред. Со својата борбеност и посветеност ја доби капитенската лента, а остана запаметен и по тешките моменти во 2015 кога доби четиригодишна суспензија поради позитивен допинг тест на мечот со Арсенал. Подоцна успеа да ја намали казната на две години, докажувајќи дека супстанцата не била земена намерно.
Во 2023 имаше кратка епизода во Пекинг Гуоан, но по неколку месеци повторно се врати во Динамо, кој му даде шанса да ја заокружи кариерата таму каде што стана легенда. Во последната сезона имаше скромна минутажа и често беше цел на критики од навивачите.
За „модрите“ одигра вкупно 420 натпревари, постигна 27 гола и запиша 24 асистенции. Со клубот освои 12 шампионски титули, 6 Купа и 4 Суперкупа.
Ливерпул си подале рака со Борнмут за трансфер на Милош Керкеш и продолжуваат да работат на тимот за новата сезона, следна цел е Марк Геи од Кристал Палас.
Ливерпул веќе го ангажираше Џереми Фримпонг во зделка вредна 35 милиони евра, а во скоро време ќе го потврди и рекордниот трансфер на Флоријан Вирц од 137 милиони евра.
Попладнево голем број на извори објавија дека „црвените“ си подале рака со Борнмут за трансфер на Милош Керкез, левиот бек ќе се пресели на Енфилд за нешто помалку од 50 милиони евра.
Но Ливерпул нема да запре тука и ќе продолжи да работи на тимот за новата сезона, следна цел е Марк Геи од Кристал Палас.
Дефанзивецот е на мета на Арсенал, Челси и Њукасл, но Ливерпул верува дека може да ја победи конкуренцијата.
Масимилијано Алегри ја презеде клупата на Милан по заминувањето на Серџо Консеисао.Трофејниот стратег дојде без огромни очекувања и барања од управата, ама сепак си има јасна цел и позиции во тимот кои мора да му бидат „обновени“ и засилени. Според најавите од Италија, Алегри сака дури шест нови стартери во тимот.
Досега Милан го заврши само доаѓањето на Лука Модриќ кој треба да потпише по Светското клупско првенство.
Голема желба на управата на чело со новиот спортски директор е Гранит Џака, а орбитираат уште неколку имиња. За бековските позиции идеи се Олександр Зинченко и Гуела Дуе, за средината посакуван е Хави Гуера од Валенсија. За дефанзивниот дел најголема желба е талентираниот стопер Џовани Леони од Парма.
Во нападот „росонерите“ сонуваат позвучно и поскапо име и имаат неколку опции како Дарвин Нуњез, Душан Влаховиќ или Виктор Осимен.
Голманот на македонската репрезентација, Столе Димитиревски, по само една сезона ќе ја напушти Валенсија.
Тренерот Корбелан, за прв голман го планира Хулен Аригезабала од Атлетик Билбао, кој бара тим каде што ќе биде прв голман, бидејќи повеќе не сака да му биде резерва на Унаи Симон.
Најсилен интерес за Димитриевски покажува Мајорка, која бара засилување на голманската позиција.
Поранешниот холандски репрезентативец Квинси Промес е екстрадиран од Обединетите Арапски Емирати во Холандија, каде што ќе отслужи затворска казна за трговија со дрога и физички напад, соопшти денеска холандското Обвинителство.
Холандски суд минатата година го осуди во отсуство поранешниот фудбалер на Ајакс и Спартак Москва на шест години затвор за директна вмешаност во транспорт на две пратки кокаин од Бразил преку пристаништето Антверпен во Белгија до Холандија во 2020 година.
Промес во 2023 година, исто така во отсуство, беше осуден и на 18 месеци затвор за напад во врска со тепачка во 2020 година во која избоде роднина во коленото.
Промес ги негираше сите обвиненија и поднесе жалба за двата случаи.
Триесетитригодишниот Промес, кој има 50 настапи за Холандија, беше уапсен во Дубаи во март лани на барање на холандското Јавно обвинителство додека беше во тренинг кампот на Спартак Москва.
Двократната освојувачка на Вимблдон, 35-годишната чешка тенисерка Петра Квитова, објави дека ќе стави крај на кариерата по овогодинешниот Ју Ес Опен, што ќе се одржи од 24 август до 7 септември.
Квитова, која го освои Вимблдон во 2011 и 2014 година, освои 31 трофеи во кариерата.
Нејзиниот најдобар пласман во кариерата е второто место на ранг-листата на ВТА, но во моментов е рангирана на 572-то место.
Претходно оваа година, Квитова се врати на тенисот по 15-месечна пауза поради бременост и раѓањето на нејзиното дете, но таа победи само еднаш во седум настапи и реши да се посвети на своето семејство.
Легендарниот ракометар на Вардар, Иван Чупиќ, ја доби довербата од управата и ја презеде тренерската функција во поранешниот европски шампион. 39-годишниот Хрват денеска на официјалната прес-конференција ги изнесе неговите размислувања.
„Многу сум среќен но, и благодарен до мојот клуб Метковиќ бидејќи веднаш кога дојде повикот од Вардар ми дозволи да заминам. Сите знаете колку ми значи Вардар, Скопје и Македонија како и „Комити“. Сакам да ветам дека јас и целата моја екипа мора да понесеме одговорност, да бидеме почестени што претставуваме еден голем клуб како Вардар“ – рече Чупиќ.
„Сакам овој град повторно да заживее за Вардар. Со огромен ентузијазам и желба сакам да ги исполниме целите. Јас сум многу задоволен од тимот со кој ќе располагам. Не барам играчи, задоволен сум“ – рече Чупиќ кој работеше во Загреб и Метковиќ.
