Баерн Минхен постигнал договор со стоперот на Наполи, Ким Мин Јае, тврди познатиот експерт за трансфери Фабрицио Романо.

Според информациите на италијанскиот новинар, дефанзивецот ги договорил личните услови и прифатил да потпише петгодишен договор со баварците. Сега на Баерн му останува уште да го почека 1-ви јули кога ќе може да се активира клазулата на Ким за износ од 50 милиони евра.

Зад себе 26-годишниот дефанзивец има фантастична сезона во Серија А и беше еден од најважните фудбалери на Наполи кој го освои Скудетото по пауза од 33 години.

Во редовите на Наполи, Ким пристигна минатата сезона од Фенербахче за сума од 18 милиони евра и воодушеви со своите настапи. Покрај Баерн, сериозен интерес за Ким покажуваше и Манчестер Јунајтед, но очигледно Германците беа побрзи.

Со доаѓањето на Ким во Баерн се отвара можност за заминување на Лукас Ернандез, според најавите Пари Сен Жермен за неговите услуги е спремен да плати 40 милиони евра.

Делегацијата на Барселона составена од претседателот, Жоан Лапорта, спортскиот директор за женски фудбал, Чави Пруиг и спортскиот директор на младинските селекции, Жоан Солер ја искористиле посетата во Доха да отворат преговори околу отстапувањето на своето име.

Бројни состаноци со спонзори и катарски бизнисмени резултирале со предлог за отстапување на името на Барселона во катарската лига, како што пренесува новинарката Лаја Тудел во радио емисијата „Тот Коста“.

Конкретно се сретнале претседателот на одборот директори „Балади холдинг“, Мохамед бин Ахмед Ал Атијах кој претходно доаѓаше во просториите на Барселона на „Камп Ноу“ како важен гостин.

Барселона би го отстапила своето име за 100 милиони евра годишно и би се основал нов тим под тој назив. Каталонскиот клуб така ќе добие дополнителен прилив на пари кој ќе им овозможи подобра позиција пред финансискот фер-плеј и трката на пазарот.

„Мундо Депортиво“ додава дека се уште се работи само за предлог и дека е потребно уште многу работа за се да биде спроведено.

Поразите од Украина и Англија ја спуштија нашата фудбалска репрезентација на 68 место на новата ранг листа на ФИФА.

Тоа значи дека неуспешните квалификациски мечеви ни донесоа пад за три позиции во однос на претходното рангирање.

Аргентина останува лидер на листата пред Франција и Бразил. Во Топ 10 уште влегуваат и Англија, Белгија, Хрватска, Холандија, Италија, Португалија и Шпанија.

Реал Мадрид во овој период работи на продолжување на договорите на своите фудбалери, а сега на ред дојде Едуард Камвинга.

Според најавите, Французинот ќе потпише договор со важност до 2028 година. Се открива и откупната клазула во него која наводно ќе изнесува една милијарда.

Ваква клазула се најавуваше и во договорот на Винисиус Жуниор, па јасно е дека Реал на Камвинга гледа како на еден од своите најважни фудбалери за во иднина.

Покрај откупната клазула Камвинга ќе има и поголема плата од сегашната. Во Мадрид пристигна од Рен пред две години и веќе одигра 63 натпревари за „кралевите“.

Херардо Тата Мартино е новиот шеф на стручниот штаб на Интер Мајами, соопшти американскиот клуб.

„Многу сме среќни што Мартино го презеде Мајами. Веруваме дека тој е тренер кој одговара на нашите амбиции. Оптимисти сме дека можеме да постигнеме многу заедно“, изјави еден од сопствениците на Мајами, Хорхе Мас за официјалниот сајт на клубот.

Тој додаде дека очекува Интер да се бори за трофеи во МЛС лигата.

„Тато е многу почитувана личност во нашиот спорт. Неговите резултати зборуваат сами за себе. Ние сме уверени дека неговите достигнувања во играта и искуството како главен тренер ќе го инспирираат нашиот тим. Знаеме дека Мартино ќе има големо влијание на и надвор од теренот“, рече Ко-сопственикот на Интер Дејвид Бекам.

Интер е на последното место во поредокот на МЛС Источната конференција со само 15 бодови. Следниот натпревар клубот од Мајами го игра на 2 јули на домашен терен против Остин.

Ливерпул е заинтересиран за напаѓачот на Наполи, Виктор Осимен. „Црвените“  на барање на менаџерот, Јирген Клоп, сакаат да го ангажираат  24-годишниот Нигериец.

Црномурестиот напаѓач кој имаше блескава сезона и ја освои наградата за најдобар стрелец во Серија А се наоѓа на списокот за трансфери на Манчестер Јунајтед, Челзи, Њукасл, Пари Сен Жермен и Баерн Минхен.  

Познато е дека Наполи за неговиот потпис бара големи 180 милиони евра.

Лаутаро Мартинез, може да добие понуда да замине во Реал Мадрид доколку шпанскиот тим не успее да го ангажира Килијан Мбапе од ПСЖ, најавија дел од медиумите.  

Аргентинецот има договор со Интер до летото 2026 година што значи дека откупната клаузула ќе биде многу висока.

Напаѓачот пристигна кај „нероаѕурите“ во 2018 година од Расинг Клуб за 25 милиони евра.

Фановите на Севилја не сакаат да го гледаат Серхио Рамос во нивниот состав, тврдат денеска медиумите во Шпанија.

Според радио Кадена СЕР, искусниот стопер кој го напушти летово ПСЖ има намера да се врати во матичниот клуб од кој во 2005 година направи трансфер во Реал Мадрид.

37-годишниот Шпанец е слободен агент што значи дека Севилја може да го ангажира без обештетување.

Италијанската фудбалска федерација му изрече десетдневна суспензија на Жозе Мурињо поради навреда на судијата Даниеле на мечот со Монца одигран на 3 мај.

Тоа значи дека тренерот на Рома нема да седи на клупата на стартот на новата сезона. Португалскиот тренер ќе треба да плати и казна од 50.000 евра.

Пред извесен период и УЕФА го казни „специјалниот“ со четири натпревари поради вербални навреди упатени кон судијата Ентони Тејлор по поразот од Севилја во финалето во Лига Европа.

Во изминатите денови низ италијанските медиуми се пишува за иднината на македонскиот напаѓач, Илија Несторовски.

Несторовски во финишот од сезоната добиваше поголема минутажа во Удинезе, но откако тимот го обезбеди опстанок, па последните натпревари беа искористени како тест да се види на кого тимот има намера да смета во новата сезона. Како што стојат работите, Нестор не го поминал „тестот“ и не ги задоволил очекувањата на раководството на клубот од Удине. Сега од Палермо стигна потврда дека преговараат да го вратат во своите редови.

„Преговараме со Несторовски“, објави „Џиорнале ди Сицилија“.

Несторовски најдобрите денови од својата кариера ги помина во Палермо каде што остави длабока трага, а си замина откако клубот поради финансиски проблем беше исфрлен во најинзок ранг, сега полека се враќа и се натпреварува во Серија Б.

Засега информациите се дека Палермо на Несторовски му нуди договор на една година, додека македонскиот напаѓач бара двегодишен договор. Претходно се пишуваше дека АПОЕЛ е заинтересиран за Нестор, меѓутоа во овој момент клубот од Сицилија е фаворит.