Со жрепката одржана во седиштето на УЕФА во Нион, избрани се полуфиналните парови од Лигата на нации.

Во првото полуфинале ќе се сретнат репрезентациите на Шпанија и Италија, додека вториот полуфинален дуел ќе биде помеѓу селекциите на Холандија и Хрватска.

Домаќин на завршницата во Лигата на нации ќе биде Холандија. Натпреварот помеѓу Холандија и Хрватска ќе се одигра на 14.јуни во Ротердам, додека Шпанија и Италија ќе се сретнат на 15. јуни во Еншеде.

Големото финале е закажано за 18.јуни во Ротердам.

Турскиот фудбалски клуб Адана Демирспор, е заинтересиран за ангажман на македонскиот репрезентативец, Аријан Адеми.

Според некои написи во хрватските медиуми, турскиот прволигаш веќе испратил понуда до Динамо Загреб за купување на капитенот на екипата Адеми, и се чека одговор од шампионот на Хрватска.

Италијанецот Винченцо Монтела, кој е тренер на Адана, имал високо мислење за фудбалските квалитети на Адеми, и инсистирал тој да биде доведен во клубот за време на јануарскиот преоден рок.

Португалскиот тренер Фернандо Сантош и официјално е назначен за нов селектор на фудбалската репрезентација на Полска.

Сантош потпиша договор со Фудбалскиот сојуз на Полска до јуни 2026.година. Искусниот 68-годишен португалски стручњак на селекторското место ќе го замени Чеслав Михневич,кој доби отказ после несупехот со Полска на Светското првенство во Катар.

„За мене е голема чест да ја водам Полска, бидејќи станува збор за земја со богата фудбалска историја кој ја одбележа мојата генерација. Репрезентацијата на Полска има доста квалитетни фудбалери, и се наоѓа меѓу најдобрите светски селекции. Од денес сум Пољак, и сум еден од вас. Уверен сум дека ќе ја оствариме целта“, изјави Сантош при официјалната промоција.

Сантош поднесе оставка на функцијата селектор на Португалија после елиминацијата од Мароко во четвртфиналето на Мундијалот во Катар.

Јувентус спрема реконструкција на средниот ред и ќе ја отвори
вратата на некои фудбалери од тимот.
Италијанските медиуми пренесуваат дека „жртва“ може да биде
Винстон Мекени кој ќе биде ставен на трансфер пазарот. Со
враќањето на Погба на терените, Мекени ќе добива уште помала
минутажа, па Алегри дал зелено светло за негова продажба.
Најсилен интерес за Американецот покажува Лидс, кој веќе почнал
преговори со „старата дама“.
Јувентус за неговата слобода бара 20 милиони евра, а
премиерлигашот наводно е спремен да ја плати таа сума.

Фудбалерот, Тиаго Силва, кој има договор со Челзи до крајот на
сезонава, веројатно ќе остане на „Стемфорд Бриџ“ до 2024 година,
најави „Гардијан“.
Бразилскиот дефанзивец кој пред три сезони беше купен од
францускиот ПСЖ, се претвори во една од главните ѕвезди кај
лондончани.
38-годишниот играч кој на времето настапуваше и за италијанскиот
Милан сега е главниот столб во одбраната на „сините“. Затоа Челзи
сака да го задржи барем уште една сезона.

Англискиот Скај спортс објавува дека Аргентинецот Марсело Биелса ќе стане нов тренер на Евертон.

Според информациите на овај медиум, раководството на популарните „карамели“, одлучило токму искусниот Биелса да биде замена за Френк Лампард, кој доби отказ после серијата на слаби резултати на екипата.

Аргентинскиот стручњак има искуство со водење тим од Премиер лигата, бидејќи претходно беше тренер на Лидс Јунајтед. Тој во богатата тренерска кариера ги има водено Њу олд бојс, Атлас, Америка, Еспањол, Атлетико Билбао, Олимпик Марсеј, Лацио, Лил и Лидс Јунајтед.

Биелса како селектор ги предводеше репрезентациите на Аргентина и Чиле.

Илија Несторовски не игра многу во Удинезе, а еден од најпознатите италијански новинари, Џанлука Ди Марцио најавува негово заминување. Договорот на Несторовски истекува на крајот од сезоната, меѓутоа според Ди Марцио Нестор може да замине и порано. Наводно, во својата екипа Несторовски сака да го види Пипo Инзаги кој ја води Реџина.

Реџина била најсериозна, но интерес покажале уште Модена и Венеција.

Тимот на Реџина можеби би била и најпримамливата опција за прилепчанецот затоа што станува збор за тим кој е второпласиран и се бори за промоција во Серија А. Од друга страна Модена е десетта и еден бод заостанува зад плеј-оф позициите. Венеција е во долниот дел од второлигашката табела и ја чека борба за опстанок.

Клубовите од англиската Премиер лига го срушија рекордот на потрошени пари за трансфери во јануарскиот преоден рок. Според објавите, клубовите за трансфери потрошиле износ од 440 милиони фунти.

Бруто потрошувачката во овај трансфер период го надмина претходниот рекорд од 2018.година, кога клубовите од Премиер лигата потрошиле 430 милиони фунти.

Најмногу пари во јануари издвои Челзи, кој за нови фудбалери потроши 180 милиони фунти. Потрошената сума на клубовите за трансфери сигурно ќе биде повисока, бидејќи до крајот на зимскиот преоден рок остануваат уште неколку денови.