Македонија ги одработува последните подготовки за последниот квалификациски меч од циклусот за Европското првенство (ЕП). И тоа клучен, затоа што е со директниот ривал за второто место Литванија.

Селекторот Кирил Лазаров, кој го прославува 45. роденден непосредно пред средбата во Скопје, истакна дека Литванците се доста незгоден ривал и мора да се има сериозен пристап исто како протов Естонија во Талин.

„Треба да бидеме максимално спремни за овој дуел, но и претпазливи. Литванската репрезентација уште кога заминавме да играме таму, целата македонска јавност мислеше на кошарка, затоа што на тоа ти доаѓа асоцијација кога ќе кажеш Литванија. Но, не е така. Се работи за сериозна репрезентација, има искусен селектор кој има водено екипа од Лигата на шампионите. Има искусни играчи кои играат и играле во добри екипи. Амбициозна нова федерација и нова раководна гарнитура. Очекувам со Литванците еден врвен меч, класен меч, со добар и квалитетен ракомет и од наша и од нивна страна. Нема да биде воопшто лесно, но ние се подготвуваме и го анализираме противникот“, изјави Лазаров.

Натпреварот меѓу Македонија и Литванија се игра во СЦ „Јане Сандански“ на 11 мај со почеток од 18:00 часот.

Одредени се групите и финалниот распоред за годинешното четврто издание на Меморијалниот меѓународен ракометен турнир „Крсте Андоновски“ што ќе се одржи од 19 до 23 август во Охрид.

Во групата А се ГРК Охрид, Киндил Торшавн (Фарски Острови), Партизан (Србија) и Нексе (Хрватска). Во групата Б се екипите на Вардар 1961, Динамо Панчево (Србија), Еурофарм Пелистер и АЕК (Грција).

Распоред на натпреварите:
19.08.2025 (вторник)
16:00 часот – Вардар 1961 – Динамо Панчево
18:15 часот – ГРК Охрид – Киндил Торшавн
20:30 часот – Партизан – Нексе

20.08.2025 (среда)
16:00 часот – Киндил Торшавн – Нексе
18:15 часот – Еурофарм Пелистер – АЕК
20:30 часот – ГРК Охрид – Партизан

21.08.2025 (четврток)
16:00 часот – Партизан – Киндил Торшавн
18:15 часот – Динамо Панчево – АЕК
20:30 часот – Еурофарм Пелистер – Вардар 1961

22.08.2025 (петок)
16:00 часот – Динамо Панчево – Еурофарм Пелистер
18:15 часот – АЕК – Вардар 1961
20:30 часот – ГРК Охрид – Нексе

23.08.2025 (сабота)
11:00 часот – натпревар за седмо место
13:00 часот – натпревар за петто место
17:45 часот – натпревар за трето место
20:00 часот – финале

Ракометната репрезентација на Македонија дојде до првата од двете победи кои се потребни за пласман на следното Еврппско првенство во ракомет.

Македонија убедливо славеше кај Естонија во Талин со 17:36 (10:19) во претпоследниот квалификациски меч на пат кон Европското првенство. Естонците беа нерамноправен противник на нашата селекција која дојде до посакуваната предност уште на самиот старт на мечот. Сега останува в недела да се победи Литванија со барем три гола разлика во Скопје за сигурен пласман на уште еден континентален собир.

„Им честитам на играчите за прикажаната игра. Ме радува тоа што бевме константни во сите шеесет минути, имавме одличен пристап и пруживме вистинска борба. Заслужија ракометарите честитки и поддршка во недела за прикажаното. Во следниот дуел не очекува физички моќна и тркачки добра Литванија. Се надевам дека ќе бидеме на ниво, но, сеедно, очекувам тешка борба. Ќе ни бидат потребни и концентрација и свежина за да ја исполниме целта“, рече селекторот Кирил Лазаров.

Најсигурен во нашата репрезентација беше Мартин Серафимов со „пет од пет“, додека најефикасен со шест погодоци капитенот Филип Кузмановски, четири имаше Лазаревски, по три Костески, Ивановски, Пешевски. Кај голманите Мартин Томовски заврши со 12 интервенции, додека Никола Митревски во првиот дел имаше седум одбрани.

Македонската ракометна репрезентација се наоѓа на само една победа до пласман на Европското првенство во Шведска, Данска и Норвешка во 2026 година.

Нашите најдобри ракометари одиграа неверојатен меч во Талин и на полувреме водеа со 10-19. Разликата во квалитетот беше повеќе од очигледна. Во вториот дел Македонија продолжи со фантастичниот ракометар оствари огромен триумф.

Најефикасен ракометар во нашиот национален тим беше Филип Кузмановски со шест погодоци. Мартин Томовски забележа дванаесет одбрани во вториот дел, а Никола Митревски имаше седум во првото полувреме.

Натпреварот на одлука меѓу Македонија и Литванија се игра в недела од 18:00 часот.

Иван Галевски има одлична сезона за Алкалоид, а тоа му донесе нов повик во сениорскиот тим на Македонија каде ќе дели минутажа со Никола Митревски и Мартин Томовски. Младиот голман истакна дека секогаш е подготвен да го даде најдоброто од себе, без разлика каква минутажа ќе добие со Естонија и Литванија.

„Јас сум тука за да тренирам и да се докажувам, да го покажувам мојот квалитет, а дали ќе настапам ќе одлучи селекторот. Сепак, како што кажав, ќе го дадам најдоброто од себе, дали ќе добјам минута, две или пет, јас ќе бранам за Македонија. Веќе одигравме по еден дуел со следните два ривали, имаме материјал да ги анализираме. Добри сме и здрави, имаме време да ги спремиме, да се консолидираме и одиме на победа. Предизвик ќе биде по Светско првенство, да се игра на Европско првенство, но, сепак, ќе одиме чекор по чекор, прво да ги добиеме Естонија и Литванија, па ќе разговараме за тоа“, изјави Галевски.

Последните две средби од квалификациите за ЕП 2026, Македонија ги игра на гости и дома. Гостуваме кај Естонија на 8 мај, додека во Скопје гостува Литванија на 11 мај.

Европската ракометна федерација (ЕХФ) добро знае каква атмосфера се прави на мечевите меѓу лутите ривали, Вардар и Пелистер, па го смести ривалството меѓу најголемите пет во Европа.

На прво место според ЕХФ е ривалството меѓу Барселона и Кил, следува полското меѓу Кјелце и Висла Плоцк, на третото место е унгарското месѓу Веспрем и Пик Сегед, а на четврто меѓу ПСЖ и Монпелје, петтото место е за Вардар и Пелистер.

Капитенот на македонската машка ракометна репрезентација Филип Кузмановски изјави дека нашите репрезентативци се ќе направат да победат на последните два квалификациски меча во циклусот за ЕП 2026.

За Македонија прво следи гостување во Талин кај Естонија, па домашен меч со Литванија, селекции за кои средниот бек има почит, но тврди дека се цели на победи.

„Не треба никого да го потцениме, мора да имаме почит за секој ривал. Знаеме како игравме на претходните две средби со Литванија на гости и со Естонија на домашен терен. Сите играчи сме во форма, имаме доста повредени игррачи кои ќе ни фалат, но сите кои што сме тука ќе го дадеме максимумот. Ќе се спремиме максимално и сите треба да играме и да очекуваме на две убедливи победи со Естонија и Литванија.

На првиот меч со Естонците имаше многу голови. Пристапот ни беше малку лош, но се подобривме. Мора сите сериозно да ги сфатиме ривалите. Поквалитетни сме, очекуваме поддршка и се надевам ќе се радуваме заедно на ново Европско првенство.

Се наоѓаме во финишот на сезоната кој е најважен дел, сите играчи се во форма. Но, тоа ни го носи секоја година. Тука сме моментално најдобрите и селекторот го знае изборот. Ќе одиграме најдобро, целта ни е пласман на Европското првенство. “, изјави Кузмановски.

Натпреварот меѓу Естонија и Македонија се игра на 8 мај, додека дуелот Македонија – Литванија е закажан на 11 мај во СЦ „Јане Сандански“.

Во олимписката сала „Сунел Арена“ на 18 мај во Атина ќе се одигра првиот натпревар од ракометното финале на ЕХФ Европскиот куп меѓу АЕК и Алкалоид, а домаќините во текот на викендот одлучија која сала ќе ја користат.

Во олимписката сала „Сунел Арена“ на 18 мај во Атина ќе се одигра првиот натпревар од ракометното финале на ЕХФ Европскиот куп меѓу АЕК и Алкалоид, а домаќините во текот на викендот одлучија која сала ќе ја користат, јави дописничката на МИА од Атина.

Во грчките спортски медиуми и во оние на АЕК во изминатиот период се споменуваше дека челниците на клубот размислува натпреварот да се одигра во Атина или во Халкида, со оглед на тоа што салата што досега ја користеше атинскиот тим не ги исполнува условите за европско финале.

Извори од АЕК за МИА потврдија дека натпреварот што е закажан за 19 часот по локално време в недела на 18 мај, ќе се одигра во „Сунел Арена“.

Станува збор за спортска сала во западниот дел на Атина, изградена за Олимписките игри во 2004 година, а реновирана пред четири години.

Има капацитет да прими околу 9.000 гледачи, а од 2019 година ја користи КК АЕК за натпреварите во грчката кошаркарска лига, но е приспособена за одржување и на ракометни натпревари.

Спортскиот портал на АЕК „Еноси“, пишува дека било желба и на играчите и на тренерот на АЕК првото финале да се игра во „Сунел Арена“, бидејќи веруваат дека ќе се создаде атмосфера што ќе им помогне не играчите да го добија „потребниот психолошки поттик за да го направи големиот чекор кон освојување на европскиот врв“.

Луѓето од АЕК ја донесоа оваа одлука бидејќи се убедени дека навивачите на тимот ќе го наполнат стадионот и ќе создадат „пеколна“ атмосфера, туркајќи го тимот кон победа против Алкалоид, што воедно ќе му даде големо водство пред реваншот во Скопје, пишува порталот.

На жрепка во седиштето на Европската ракометна федерација во Виена минатата седмица беше одлучено Алкалоид прво да гостува во Атина, со што ќе има шанса пред своите навивачи да го освои трофејот во Европскиот куп.

Реваншот во Скопје ќе биде една седмица по натпреварот во Атина, односно на 25 мај.

Селекторот на македонската ракометна репрезентација, Кире Лазаров верува дека можеме да стигнеме до победи над Естонија и Литванија и да го продолжиме континуитетот на учество на големите натпреварувања. Македонија треба да ги совлада Естонија и Литванија, откако загубивме двапати од Словенија, а бевме поразени и од Литванците на нивен терен.

Денес ракометарите се собраа пред двата клучни и последни меча од квалификациите за Европското првенство.

„Секогаш сум оптимист, таков бев и како играч, таков сум и сега како тренер. Но сум и претпазлив, мора да бидам таков поради проблемите со повреди кои ги имаме. Ни недостасуваат многу играчи, тие ќе бидат заменети со нови“, вели Лазаров.

„Нема да биде лесно, немаме ни многу време за подготовки, имаме само два-три дена пред мечот со Естонија. Немаме право на грешка, ќе внимаваме на она што е најважно од анализата на противникот. Очекувам два тешки меча и физички и психолошки. Сепак верувам во тимот, верувам дека ќе се прикажеме во вистинско светло. Голем дел од ракометарите имаат играно вакви мечеви на кои немате право на грешки. Прво се фокусираме на Естонија, а потоа ќе мислиме на Литванија“, додава селекторот.

Лазаров нема да може да смета ниту на Велковски и Стојковиќ.

„Мислам дека Велковски 99 проценти нема да може да настапи, дојде тука само да се поздрави со момците. Има повреда на листот која ја заработи на мечот со Вардар. Денеска на болки се пожалии Марко Стојковиќ, па ќе мора да бидат направени тестови. Велковски отпадна, а најверојатно ќе отпадне и Стојковиќ. Знаев дека може да дојде до нешто вакво, затоа повикав 21 ракометар“.

Ракометната репрезентација на Македонија го имаше првиот собир пред последните два дуели од квалификациите за Европското првенство (ЕП) кое ќе се игра во месец јануари 2026 година.

Селекторот Лазаров има мали проблеми, затоа што има неколку повредени играчи, меѓу нив триото на Алкалоид, Мартин Велковски, Марко Митев и Никола Ѓорѓиев, како и крилото на пелистерци Цветан Кузманоски.

Ракометарите најпрво ќе се соочат против Естонија на 8 мај од 18 часот, а три дена подоцна играат против Литванија во истиот термин.

Избраниците на селекторот Кире Лазаров по четири одиграни кола се на третата позиција во групата 1 со два бодови, додека пред Македонија се Литванија со шест и Словенија со осум бода.