Жанг Жижен стана првиот кинески играч во Опен ерата кој успеал да се пласира во главниот ждреб на Вимблдон. Негов противник во првото коло е 25-годишниот Французин, Антоан Хоанг.

Жижен е 178. на АТП листата и единствен кинески тенисер кој се наоѓа помеѓу најдобрите 250. Во главниот ждреб на Вимблдон се проби така што во последното коло од квалификациите во четири сета го победи Франциско Черундоло.

Исто така, Жижен е само четвртиот кинески тенисер во Опен ерата кој ќе игра на главниот ждреб на некој Гренд слем турнир. Досегашните тројца, Ву Ди (2013., 2014., 2016.), Жанг Зе (2014., 2015.) и Ли Же (2019.) тоа го остварија на Австралија Опен и секој пат испаѓаа во првото коло.

За разлика од машкиот тенис, Кина во женска конкуренција имаше многу повеќе успеси, па така Ли На, која ја заврши кариерата во 2014. година, има две Гренд слем титули во индивидуална конкуренција, Роланд Гарос (2011.) и Австралија Опен (2014.).

Серена Вилијамс нема да игра на Олимписките игри. Една од најдобрите тенисерки одлучила да не патува во Токио.

Како што изјавува самата, постојат повеќе причини зошто се одлучила да не учествува на Олимпијадата.

„Донесов одлука и постојат многу причини зошто нема да играм. Не можам сега да кажам кои се, но некој друг ден ќе откријам.“ – изјавува Серена.

Помладата од сестрите Вилијамс има 39 години и злато од Олимписките игри во 2012 година.

Тренерот на Рафаел Надал, Карлос Моја ја коментираше одлуката на 20-кратниот шампион на Грен слем турнирите да ги пропушти Вимблдон и Олимписките игри.

„Сезоната на земјени терени се покажа како многу тешка, со голем физички и психолошки притисок. По Ролан Гарос, Рафа беше целосно исцрпен. Сега тој има заслужен одмор. Кариерата за врвен играч е маратон, трка на долги патеки со тешки одлуки што треба да се донесат и тој одлучи дека е најдобро да застане за да ги наполни батериите. Пред две години, Рафа достигна точка на екстремен психолошки замор, од кој беше многу тешко да се излезе. За жал, тој сега е повторно близу до таа состојба. Тој не може да си дозволи да игра Грен слем ако не е 100% подготвен“,  изјави Моја.

Надал по завршувањето на Ролан Гарос соопшти дека нема да учествува на Вимблдон и на Олимпијадата во Токио.

Рафаел Надал на својот Твитер профил објави дека нема да игра на Вимблдон и Олимписките игри.

„Тоа беше тешка одлука, но морав да го слушам моето тело и ова е најдобрата одлука. Главната цел е мојата кариера да потрае и да можам да продолжам да се борам за најголемите трофеи. Од Роланд Гарос до Вимблдон има само две недели, а тоа не е доволно време за опоравување. Последните два месеци беа одлични, но истовремено и големо оптоварување за мојот организам.“ – напиша Надал.

Шпанецот, кој неодамна наполни 35 години, од турнирите на земја ги освои Барселона и Рим, но беше поразен во полуфиналето на Роланд Гарос од Новак Ѓоковиќ.

На последниот Вимблдон во 2019. година играше полуфинале, а тој турнир го освојуваше во 2008. и 2010. година. На Олимписките игри во 2008. освои злато во сингл конкуренција, а во 2016. го освои златото во парови.

Видовме бизарни сцени во четвртифиналето на Роланд Гарос во текот на мечот помеѓу Ѓоковиќ и Беретини. Ѓоковиќ славеше со 3:1 и така избори полуфинале со Надал, но необична ситуација се случи во четвртиот сет, кога судијата го прекина мечот откако навивачите на трибините одбија да го напуштат стадионот.

Причина поради која организаторите бараа празнење на трибините е полицискиот час, кој во Париз поради пандемијата на коронавирусот стапува на сила од 23 часот.

Половина час пред стапувањето на полицискиот час, службениот спикер побара од гледачите да ги напуштат трибините, на што тие одговорија со песна. Ни по десетина минути не сакаа да заминат, па мечот беше прекинат во 22.47 часот, додека трибините не се испразнат.

Полицискиот час во Париз стапи на сила, но синоќа во текот на полуфиналето помеѓу Ѓоковиќ и Надал организаторите сепак се одлучија да „замижат“ и да ги прекршат правилата и законите. Одлучија да ги задржат гледачите на трибините, како до крај би можеле да уживаат во еден од најголемите тениски натпревари на земја одигран било кога.

Во моментот кога еден од главните лица на Роланд Гарос прогласи дека нема да мораат да заминат навивачите, низ целиот стадион се слушна громогласно воодушевување.

Руската тенисерка Јана Сизикова е уапсена на Ролан Гарос под сомнение дека местела натпревари.

Полицијата во Париз синоќа ја уапсила Сизикова и русинката е задржана во притвор. Обезбедување на турнирот се обидело да го спречи апсењето на тенисерката кое се случило додека одела на масажа по натпревар.

Истрагата против неа е покрената во октомври минатата година поради тврдења дека натпреварот од првото коло од женската пресметка во двојки е наместен.

Локалните медиуми јавуваат дека Сизикова ги негирала наводите, а нејзиниот адвокат Фредерик Бело за „АП“ истакнал дека 26-годишната тенисерка сака да поднесе жалба поради клевета.

„Ставена е во притвор како криминалец. Таа истакна дека е невина и не сакаше да и помагам за време на испитувањето бидејќи се смета за жртва.“ – истакнал адвокатот на руската тенисерка.

Искусната тенисерка од Чешка, Петра Квитова мораше да го откаже понатамошното учество на францускиот грен слем турнир Ролан Гарос, како последица од повреда добиена од пад на прес-конференција.

Квитова на заминување од средбата со медиумите паднала и го повредила глуждот, а деталните прегледи покажале сериозна повреда, која се санира со мирување и терапија.

Чехињата која славеше во првата рунда од Ролан Гарос ќе влезе во рубриката од „верувале или не“, бидејќи во модерниот спорт прв пат се случува тенисер или спортист посериозно да се повреди на официјална прес-конференција.

Казахстанскиот тенисер Роман Хасанов е суспендиран денеска на десет години поради корупција. Како што соопшти Меѓународниот одбор за интегритет во тенисот (ITA), Хасанов во истрагата се изјаснил за виновен по обвинението за местење или обид за местење тениски натпревари. Одборот не обелодени за колку наместени натпревари од страна на Хасанов и за кои турнири станува збор, наведувајќи само дека тие биле одиграни во периодот од 2014 до 2018 година, кога Казахстанецот го имаше најдобриот пласман на АТП листата како 671 светски тенисер.

Дајана Јастремска е една од најголемите надежи на украинскиот тенис, но нејзината кариера во моментот не напредува, бидејќи на почетокот од годинава беше суспендирана поради позитивен тест на допинг.
Тенисерката која наскоро ќе наполни 21 година во досегашната кариера освои три турнири, а годинава требаше да биде година во која ќе се пробие во самиот тениски врв.
На почетокот од минатата година го оствари највисокиот ранкинг во кариерата, беше 21. тенисерка на светот, но почетокот од годинава и донесе големи неволји, откако беше позитивна на местеролон.
Откако беше суспендирана, изјави дека ќе се бори да ја спаси својата чест, бидејќи знае дека не користела ништо недозволено.
„Кај мене е пронајдено ниско ниво на месторолон. Со оглед на ниската концентрација и негативниот примерок две недели претходно, добив потврда дека позитивниот резултат е опција да биде како резултат на некоја врста на контаминација. Со тоа, известена сум дека оваа супстанција ја користат мажите како лек, односно не се препорачува кај жените поради штетни влијанија.“ – изјави пред пет месеци, а сега тврди дека знае и како недозволената супстанца стигнала до нејзиното тело.
Јастремска е уверена дека е позитивна поради нејзиниот поранешен партнер, кој супстанцата и ја пренел за време на полов однос. Тој тврди дека тоа не е вистина, а напиша и изјава за комисијата која е задолжена за овој случај.
Таткото на украинската тенисерка замоли да се предаде примерок од косата за анализа, но тоа беше одбиено и веќе не се соработува со одбраната на тенисерката. Расплетот на случајот треба да биде познат до крајот на месецот.

Чешката тенисерка, 35-годишната Барбора Стрицова, најави дека си заминува во спортска пензија, додавајќи дека се надева последниот натпревар да го одигра пред публика, но по нејзиното породување во 2022. година.
„Би сакала тоа да биде на Вимблдон, но доколку тоа не е можно, тогаш тоа ќе биде во мојата татковина Чешка.“ – вели Стрицова, која во 2019. година на Вимблдон ја освои титулата во женски парови, а во сингл стигна до полуфинале.
Во кариерата има две титули во сингл конкуренција и 31 титула во парови, додека во 2016. година ја освои бронзата во парови на Олимписките игри во Рио.
Во моментот се наоѓа на 52. место на ВТА листата, а најдобар ранкинг имаше во 2017. година, кога беше 16.