Положани: Одигравме одлично во Словенија, проблем нѝ е реализацијата

Шкендија беше поразена со 2-1 од словенечкиот тим НК Браво во првиот натпревар од второто квалификациско коло на Конференциската лига на УЕФА. „Црвено-црните“ поведоа во 11-тата минута со голот од пенал на Ендрит Красниќи, но домашните успеаја да го свртат резултатот со головите на Копатин и Станковиќ.

И покрај поразот, Шкендија создаде неколку добри шанси за гол, додека квалификациите остануваат отворени за реваншот што се игра за една недела во Скопјe. По натпреварот, тренерот Артим Положани се појави пред медиумите за да ја даде својата анализа.

„Им честитав на момците за нивната изведба. Мислам дека одигравме одличен натпревар, натпревар со многу шанси против противник кој е исклучително тактички добро позициониран на теренот. Нормално, она што не функционираше, мислам, беше завршницата, бидејќи во моменти кога натпреварот во Европските купови произведува толку голем обем и создава шанси пред голот, што се можности за гол, мислам дека тоа е позитивно бидејќи има шанси. Сега дефинитивно мора да работиме на овој дел од завршницата бидејќи нормално во Европските купови секој гол е исклучително вреден, секој гол особено во полето на противникот е вреден, но она што ме мачи е фактот дека создадовме шанси, а завршницата недостасуваше“, изјави Положани.

Положани кажа дека на реваншот Шкендија ќе оди на победа.

„Во вакви натпревари никогаш не можеш да бидеш сигурен. Во Скопје ќе мораме да дадеме максимум да го добиеме натпреварот. Понекогаш негативен резултат е корисен и во однос на влегување на натпреварот, односно со поинаков пристап. Не дека ако резултатот беше позитивен немаше да влеземе со максимален пристап, но навистина жал ми е за момците затоа што одигравме одличен натпревар“, изјави Положани.