Кошаркарите на Хувентуд ќе мора да почекаат на заверката на пласманот во четвртфналето на Еврокупот. По трите победи во првиот круг, вечерва се поразени на гостувањето во Монако. Тимот од француското кнежевство славеше со сигурни (97-82), па по четири одиграни кола во групата „Е“ од ова натпреварување, двете екипи се на идентичен ефект (3-1), но Монако е во предност бидејќи вечерва победи со повисока разлика во однос на поразот пред една седмица во Бадалона (72-79). Ненад Димитријевиќ одигра доста добар натпревар. Беше прв стрелец во својот тим. Запиша 15.поени (1/1 за три, 3/7 за два и 6/7 за еден поен), дополни со четири скока, четири асистенции, исто толку загубени и една освоена топка за 26:34 минути во игра. Во наредното коло, на 2 март, Хувентуд ја пречекува Уникаха.

Македонската кошаркарска репрезентација, подготовките за февруарскиот квалификациски „прозорец“ за Евробаскетот кој за Македонија ќе биде реализиран во руски Перм, ќе ги стартува на 10 февруари во Скопје. Според плановите на стручниот штаб на „црвено-жолтите“, во Скопје ќе биде реализиран воведниот дел од подготовките. „Ќе работиме пет дена во Скопје, во салата на СЦ „Јане Сандански“. Планирано е во процесот да бидат вклучени 14-15 кошаркари. Најголем дел од нив ќе бидат со нас од првиот ден. Вклучително и капитенот Војдан Стојановски, но и Џејкоб Вајли, што е и тоа како битен момент за нас. Ќе настојуваме да тренираме во термините во кои ќе се играат квалификациските натпревари во Перм. Значи од 13:00 до 17:00 часот, да се раководиме по онаа четиричасовна временска разлика со Русија. Ќе работиме по еден тренинг дневно, во тие временски термини“, појаснува селекторот. Македонија за Русија тргнува на 15 февруари, а според планот за Перм ќе патуваат 15 кошаркари. Во периодот од 18 до 22 февруари, нашата сениорска селекција треба да одигра четири средби од квалификациите за пласман на Евробаскетот 2022 година.

Никола Јокиќ, центарот на Денвер Нагетс и еден од најдобрите кошаркари во НБА, избран е за најдобар играч на Западната конференција минатата недела. Познатиот новинар на ЕСПН, Боби Маркс ја носи веста дека Јокиќ би можел по истекот на договорот да потпише супермаксимален договор, резервиран за само неколку играчи во лигата. Маркс наведува дека Јокиќ би требало да биде избран во најдобрата петорка за сезонава, со што ќе стекне право на уште поголем договор. Јокиќ веќе еднаш се најде во најдобриот тим на лигата пред две сезони, додека минатата сезона беше во вториот тим. Српскиот кошаркар во 2018. година потпиша петгодишен договор вреден 148 милиони долари. Летото 2022. година би можел да потпише уште поголем договор, сличен на оној кој го има Јанис Антетокумбо. Неговиот договор, кој е вреден 228 милиони долари, е најголем во историјата на кошарката.

Мајк Џејмс и оваа сезона е најефикасен играч на ЦСКА Москва, бележи просек од скоро 20 поени по натпревар, на теренот е незаменлив и клучен играч во петорката на Димитрис Итудис. Сепак, постојат и проблеми. Неговиот карактер повторно се најде во фокусот, медиумите јавуваат дека Џејмс ги отследил сите кошаркари на ЦСКА од социјалните мрежи, а имало и тешки зборови во соблекувалната помеѓу него и Итудис со соиграчите. Грчките медиуми јавуваат дека му било забрането да патува за САД, а се наведува дека Џејмс наскоро и ќе ја напушти Москва. ЦСКА сезонава го дели првото место во Евролигата со Барселона, со учинок од 15 победи и 6 порази.

На денешен ден пред една година, во хеликоптерска несреќа на 50 километри од Лос Анџелес, загина Коби Брајант, заедно со неговата ќерка Џиана, пилотот и шест семејни пријатели. Тие патуваа на натпревар на екипата на Џиана, чиј тренер беше токму Коби Брајант, но поради густата магла пилотот ја загуби ориентацијата и удри во планината кај Калабасас. Беше тоа една од најболните спортски трагедии во историјата, бидејќи животот го загуби еден од најдобрите кошаркари на сите времиња и тоа во својата 41. година од животот, неполни четири години од крајот на една величествена кариера.

Размената на Џејмс Харден во Бруклин минатата недела ги „раздрма“ четири НБА тимови, а за еден од играчите вклучени во истата тоа значеше и спасување на животот!
Карис ЛеВерт од Бруклин преку Хјустон заврши во Индијана, но се уште не дебитираше за новиот клуб и не се знае кога ќе се случи тоа. На лекарските прегледи откриен му е непознат израсток на левиот бубрег. Лекарите не се сигурни за што се работи, па ги чекаат резултатите кои ќе покажат дали се работи за нешто што е канцерогено, односно дали се работи за тумор или циста.
„Немав никакви симптоми, играв и не пропуштив ниту еден натпревар сезонава. Се чувствував 100 отсто здрав. Овој трејд дефинитивно ми разоткри што се случува со моето тело. Размената можеби и ми го спаси животот.“ – вели ЛеВерт, кој во 12 натпревари за Бруклин сезонава имаше просек од 18.5 поени.
„Најважно ми е да оздравам и да си осигурам долг живот. Тоа е поважно и од кошарката. Секако дека сакам и понатаму да играм, сакам тоа да се случи што поскоро, но здравјето е најважно.“ – додава кошаркарот.
Во случај тој да ја прекине кариерата, ЛеВерт ќе може барем да се „утеши“ со тоа што пред кратко време потпиша тригодишен договор вреден 52.5 милиони долари.

Денес беше реализирана ждрепката за претстојниот завршен турнир од Купот на кралот во Шпанија.
Во „Ви Зинк“ во Мадрид, каде од 11 до 14 февруари ќе се игра турнирот, беа определени четирите четвртфинални двојки, односно натпреварувачкиот „костур“, според кој ќе се стигне до новиот освојувач.
А екипата на Хувентуд, за која со успех настапува македонскиот репрезентативец Ненад Димитријевиќ, за противник во првиот елиминациски круг го доби актуелниот шпански шампионат, екипата на Басконија. Според распоредот, ако Димитријевиќ и соиграчите го победат тимот од Виторија, во полуфиналето, кое се игра на 14 февруари, ќе играат со подобриот од дуелот Барселона – Уникаха.

Големото финале ќе се игра на 14 февруари.

Четвртфиналето:
Реал Мадрид – Валенсија
Тенерифе – Бургос
Барселона – Уникаха
Басконија – Хувентуд

Лука Дончиќ го одигра статистички најдобриот натпревар сезонава и со 29. трипл-дабл во кариерата веќе во третата сезона во НБА го надмина Мајкл Џордан во целата кариера. Меѓутоа, неговиот Далас беше поразен од Чикаго со 117:101, а словенецот ја презеде одговорноста. Дончиќ го заврши натпреварот со 36 поени и рекордни сезонава 16 скокови и 15 асистенции, постигна шест тројки, но во целото второ полувреме остана на само шест поени. Освен повратникот Порзингис, Дончиќ немаше на располагање ниту еден друг соиграч од првата петорка. Поради повреди и КОВИД протоколи, натпреварот го пропуштија Хардавеј, Ричардсон, Фини-Смит, Брансон и Клебер. Охрабрен од првото полувреме во кое постигна 30 поени, Дончиќ во продолжението проба се да реши сам. „Во второто полувреме играв ужасно. Јас сум виновен, бев пресебичен дека имав 30 поени во првото полувреме. Тоа не бев јас во продолжението. Мораме да играме доста подобро, а и јас морам многу подобро.“ – изјави Дончиќ. За него, ова беше четврт трипл-дабл сезонава, а сите ги оствари во последните шест натпревари, додека во преостанатите два му недостасуавше само еден скок или асистенција. По само 11 настапи во третата сезона има 29, еден повеќе од учинокот на Мајкл Џордан во целата кариера.

Кошаркарот од Босна и Херцеговина, Јусуф Нуркиќ кој настапува за Портланд, ќе мора на операција на зглобот на десната рака, откако се повреди на натпреварот против Индијана. По таа повреда, тој ќе паузира најмалку два месеци. Тоа е нов пех за Нуркиќ, кој во 2019. година имаше скршеница на ногата, а се врати на крајот од минатата сезона. Пред таа повреда, имаше просек од 17 поени и 10 скокови по натпревар. На почетокот на оваа сезона, навивачите го критикуваа поради лошите партии. Нуркиќ ги пропушти подготовките бидејќи сакаше да помине повеќе време со семејството, откако неговата баба почина по компликации од коронавирусот. „Луѓето се однесуваат како да сум мртов. Не сум многу загрижен за тоа, но очигледно е дека сите сме луѓе и се соочуваме со нешто што се случува надвор од теренот и во нашите семејства. Сакам да му помогнам на екипата, поминаа само неколку натпревари и знам дека ќе биде се во ред. Не заборавив да играм кошарка и се обидувам да одам напред.“ – изјави 26-годишниот центар.