Актуелниот шампион на кошаркарската Евролига  Анадолу Ефес од Истанбул, во своите редови го доведе бекот Елајџа Брајант.

26-годишниот Американец  во екипата на Ефес пристигна од Милвоки Бакс, тимот со кој минатата сезона ја освои НБА лигата. Договорот е потпишан со траење од две години.

Брајант веќе има искуство со играње во Европа кога настапуваше во Израел за екипите на Хапоел Елиат и Макаби Тел Авив.

Тимот на Хјустон Рокетс реши да го отпушти кошаркарот од Австралија, Данте Ексум.

Плејмејкерот Ексум никогаш и не заигра за екипата од Тексас, поради повреда на листот во предсезоната.

Инаку Данте Ексум беше петти пик на Јута Џез на НБА драфтот во 2014 година. 

Зајон Вилијамсон ќе го пропушти почетокот на сезоната во НБА лигата поради повреда на стапалото, за која исто така беше потребна операција за време на предсезоната.

Дејвид Грифин, потпретседател на „Пеликанс“, вели дека лекарите се охрабрени од начинот на кој коската закрепнува, но сепак, нема точен датум кога Вилијамсон ќе се врати на терените. Првите претпоставки се дека тоа ќе се случи за две и пол недели, кога Зајон повторно ќе биде прегледан.
„Целта на сите нас е Зајон да се врати на теренот што е можно побезбедно. Тој сигурно нема да биде на теренот првата недела од сезоната“, изјави Грифин.

Кошаркарот на ЦСКА Москва, Токо Шенгелиа, поради повреда на рамото ќе паузира најмалку два месеци, објави клубот во официјално соопштение. 

Шенгелија го повреди зглобот на десното рамо на натпреварот на неговата екипа против Зенит од Санкт Петербург во рамките на Евролигата. 

Според првичните проценки на лекарите, Шенгелиа ќе отсуствува најмалку два месеци. 

Шенгелиа беше прогласен за МВП во последните две кола, и беше втор најдобар стрелец во лигата со просек од 21 поен по натпревар. 

Грег Попович може да се повлече од тренерската функција во Сан Антонио по завршувањето на сезоната 2021/22. 72-годишниот кошаркарски стручњак треба да победи уште 26 натпревари за да го сруши рекордот на Дон Нелсон и да избие на врвот во историјата на НБА по бројот на победи како тренер.

Попович сега е на третото место со 1.310 победи, зад Дон Нелсон (1.335) и Лени Вилкенс (1.332).

Актуелниот помошник тренер на Бостон, Вил Харди се смета за најверојатен кандидат за наследник на Попович во случај на негово заминување. Поранешните играчи на Спарс, Тим Данкан и Ману Џинобили исто така, претендираат на тренерското место на тимот од Тексас.

Словенскиот репрезентативец и член на Далас Маверикс, Лука Дончиќ, во интервју за официјалниот сајт на НБА лигата не ги криеше своите амбиции за сезоната која претстои и желбата да го освои шампионскиот прстен  со својот Далас.

“Сакам да станам НБА шампион, но знам дека тоа не е само моја желба и цел, истото ова го посакува секој играч пред стартот на новата сезона. Целта е зацртана, сега останува да видиме како ќе се одвиваат работите“, изјави Дончиќ.

Летово Лука Дончиќ потпиша нов петгодишен договор со тимот на Далас Маверикс.

Унијата на кошаркари и челниците на НБА постигнаа договор дека секој кошаркар кој ќе пропушти натпревар бидејќи не е примил вакцина, нема да биде платен за тој меч.

Според проценките, повеќе од 90% од играчите се вакцинирани додека помал број не сакаат да го направат тоа. Колку одлуката ќе удри по кошаркарите, наведен е примерот на Кајри Ирвинг.

Тој за секој пропуштен натпревар на Бруклин ќе остане без 380.000 а доколку не игра во поголемиот дел од годината ќе загуби речиси 15 милиони долари.

Екипата на Орландо Меџик која настапува во НБА лигата, како слободен агент во своите редови го доведе Џеремаја Тилмон.

Џеремаја кој настапува на центарската позиција, по напуштањето на колеџот во Мисури, не беше драфтуван од ниту една НБА екипа.

Во американската колеџ лига на 24 натпревари тој имаше просек од 12,4 поени и 7,3 скокови. Тилмон одигра еден натпревар за Орландо во НБА летната лига во Лас Вегас и постигна три поени и освоени три скока.

Предсезонските натпревари во НБА лигата  штотуку започнаа и од таму стигна информација која предизвика интерес на тема антидопинг тестови.

Познатиот кошаркарски новинар на ИСПН, Адријан Војнаровски, на твитер објавува дека според своите сознанија, во нареднета сезона од НБА лигата, играчите нема повеќе да се тестираат на марихуана, што во пракса значи дека ќе биде дозволена за конзумирање од нивна страна.

Антидопинг контролите ќе продолжат и понатаму и ќе се однесуваат на сите недозволени супстанци кои ги подобруваат физичките перформанси.

Прославениот шпански кошаркар Пау Гасол, за 5-ти Октомври најави конференција за медиумите на која ќе објави крај на својата играчка кариера.

Гасол во измината сезона беше член на Барселона со која загуби во финалето на Евролигата, додека со репрезентацијата на Шпанија настапи на Олимписките игри во Токио и стигна до четвртфиналето.

Со своите 41 година, Гасол остава богата кошаркарска кариера зад себе, освојувајќи два шампионски НБА прстени со екипата на Лос Анџелес Лејкерс, додека како репрезентативец на Шпанија освои три титули шампион на Европа.

Има настапувано за екипите на Мемфис, Чикаго Булс,Лејкерс и Сан Антонио Спурс. На кратко се задржа и во тимот на Милвоки Бакс, а кариерата ја заврши како член на Баселона.