Словенецот Дончиќ добива нов договор по Олимписките игри
Лука Дончиќ по завршување на Олимписките игри (ОИ) во Токио се очекува да потпише со НБА екипата на Далас продолжување на договорот за уште пет години за што ќе добие 202 милиони долари, јавија вечерва американските медиуми.
Дончиќ има договор со Далас до крајот на следната сезона, а на Олимпијадата во Токио со словенечката репрезентација го очекува четвртфинална пресметка против Германија.
Дончиќ, кој беше избран за најдобар дебитант во НБА лигата во 2019 година, има просек, од 25.7 поени, 8.4 скокови, 7.7 асистенции во 199 натпревари откако се пресели во најсилната кошаркарска лига во светот.
МЗТ Скопје донесе двајца Американци и Рикиќ од Еуро Никел
МЗТ Скопје крои планови за тоа како да ја одбрани двојната круна во домашното првенство и дефинитивно размислува што подобро да се прикаже во регионалните натпреварувања, па на ден „Илинден“, објави дека се договорени три големи засилувања за новата натпреварувачка сезона.
Раководството на „металците“ успеа да го договори хрватскиот „џин“ кој минатата сезона настапуваше одлично во Еуро Никел, извонредниот Роберт Рикиќ кој е висок 219 сантиметри. Покрај него, МЗТ објави соработка со двајца Американци, но соопшти дека е обновен и договорот на Кристијан Николов.
„Управата на МЗТ Скопје Аеродром изминатиот период го мина во интензивни преговори со поголем број квалитетни кошаркари со цел да се дојде до вистинските засилувања за новата сезона во која ќе ја браниме двојната круна на домашна сцена. Изборот падна на двајца Американци, Дастин Ваер (31 год, 183 см) и Хуан Дејвис (24 год, 203 см), еден добро познат хрватски интернационалец, Роберт Рикиќ (31 год, 219 см), додека обновен е и договорот со македонскиот репрезентативец Кристијан Николов (24 год, 187 см)“, велат од клубот.
Капитен на екипата останува Дамјан Стојановски, а договорни обврски со нашиот клуб имаат уште и Бојан Крстевски, Адем Мекиќ и Дамјан Робев. Со ова, најверојатно, засега ќе го заокружиме ростерот со напомена дека останатите четири места во тимот ќе бидат пополнети со играчи од нашата младинска школа, пред се од вториот тим, со цел најголемите таленти да добијат шанса да се натпреваруваат со најдобрите со кои располага МЗТ Скопје Аеродром.
Ѓорѓевиќ е именуван за нов тренер на Фенербахче
Турскиот кошаркарски прволигаш Фенербахче го затвори најважното прашање и тоа околу наследникот на досегашниот предводник на тимот Игор Кокошков.
Кокошков одлучи да си замине за да одново биде дел од НБА лигата и тоа во Далас Маверикс, па поради тоа клубот од Истанбул беше во потрага по нов стратег, потрага која заврши со ангажман на Александар Ѓорѓевиќ.
Ѓорѓевиќ кој во изминативе две години беше дел од Виртус Болоња му кажа „ДА“ на Фенер и ќе го води истиот во наредните три сезони. Ова за за популарниот Сале ќе биде прв предизвик во Турција, досега како тренер има работено во Италија, Грција, Германија, а беше и селектор на српската репрезентација во периодот од 2013 до 2019 година.
Одреден терминот за почеток на новата НБА-сезона
Кошаркарската НБА лига објави дека новата 2021/22 сезона ќе почне на 19 октомври, а финалето на разигрувањето за титулата би требало да заврши најдоцна до 19 јуни 2022 година. Четири денови подоцна, на 23 јуни идната година, треба да се одржи драфтот.
Идентично како и во минатата сезона, во која шампионската титула ја освои екипата на Милвоки, повторно ќе се игра таканаречениот „плеј ин“ во кој тимовите ќе разигруваат за пласман во плејофот. јавија американските медиуми.
Шесте најдобри екипи од секоја конференција ќе обезбедат директен пласман во разигрувањето за титулата, додека по четири екипи (пласирани од 7. до 10. место) ќе разигруваат за преостанатите две места во секоја од НБА конференциите.
Вајли: Да ја однесеме Македонија во светските квалификации!
Даниел Џејкоб Вајли е повторно во Скопје и што е најважно, како што и самиот вели, максимално подготвен го чека приклучувањето во тренажниот процес со останатите свои репрезентативни соиграчи.
Од моментот кога си замина кон САД, се случија доста работи. Најважната беше промената на играчката средина. По играњето во Гран Канарија, следуваше преселба во Сарагоса. А ова лето, играњето во црвениот дрес го замени со она во „сино-белиот“ на екипата на Будуќност од Подгорица.
„Реков пред некое време, полека но сигурно станувам ‘балканец’. Претходно добив македонски пасош, сега ќе играм за екипата на Будуќност од Подгорица, тоа е доста блиску до Скопје, и искрено ме радува што е така. Решив да играм во екипа која има одличен тренер, исто таков ростер, која секогаш се стреми да биде при врвот на европската кошарка. Ќе играме во Еврокупот, во АБА лигата во националниот Куп и шампионат. Тоа се доста обврски, но подготвен сум за новиот предизвик“- вели Вајли по слетувањето на скопскиот аеродром.
Но, за нас многу поважен е оној претквалификациски предизвик. Да бидеме подобри од селекциите на Швајцарија и на Словачка.
„Свесен сум за тежината која со себе ја носи играњето во дресот на националниот тим на Македонија. Би додал дека подготвен го дочекувам влегувањето во сала. Тоа ќе биде само продолжение- континуитет на мојата индивидуална работа која ја реализирав во изминатиот период во некои ‘домашни услови’. Пред себе си поставив една цел, заедно со соиграчите да ја однесеме Македонија во оној поважен сегмент од квалификациите за Светскиот куп“.
Расел Вестбрук се сели во Лејкерс!
Расел Вестбрук од наредната сезона ќе настапува за Лос Анџелес Лејкерс. Веста ја пренесува и официјалната страница на лигата, додавајќи кој ќе се пресели во спротивен правец.
Вестбрук, кој беше најкорисен играч во лигата во 2017. година и кошаркар кој четири сезони, вклучувајќи ја и минататата во Вашингтон, завршуваше со просек трипл-дабл, ќе биде потврден како нов играч на Лејкерс по 6. август, кога се може да стане официјално.
Познато е дека во спротивен правец ќе одат Кајл Кузма, Кентавиус Колдвел-Поуп, Монтрезл Харел и Ајзеа Џексон, како и 22. избор од драфтот одржан синоќа.
Леброн Џејмс и Ентони Дејвис со оваа размена добија соиграч со кој ќе можат да се надеваат веќе наредната сезона повторно да атакуваат на титулата.
„Магичниот“ Дончиќ ја водеше Словенија до нова победа
Кошаркарите на Словенија ја запишаа и втората победа на исто толку натпревари одиграни на олимпискиот турнир во Токио.
Словенците во второто коло го победија домаќинот на турнирот Јапонија со 116:81. Лука Дончиќ, најдобриот словенечки кошаркар кој во првото коло постигна 48 поени против Аргентина, веќе во првата четвртина имаше 13 поени со шест скокови и четири асистенции. На крајот, натпреварот го заврши со 25 поени, седум скокови и седум асистенции, а Зоран Драгиќ додаде 24 поени. Дончиќ за 57 минути одиграни на Олимписките игри досега, има постигнато дури 73 поени.
Со оваа победа Словенија избори пласман во понатамошната фаза, а во последното коло од групата игра против Шпанија.
ТФТ и Куманово ги добија потенцијалните противници во ФИБА Европа купот
Двата македонски претставника во ФИБА Европакупот претстојната сезона, екипите на ТФТ и на Куманово 2009 ги добија имињата на потенцијалните противници во првата елиминависка фаза од ФИБА Евро Купот, ако и форматот по кој ќе се одредуваат учесниците во групната фаза од ова натпреварување.
Нашите претставници ќе мораат да го поминат квалификацискиот филтер кој нема воопшто да биде лесен. Пред се затоа што, учество во ова натпреварување пријавија 33 клуба, додека дополнителни 14 ќе им се приклучат од Лигата на шампионите, оние кои нема да ги поминат квалификациите.
Македонските прволигаши се меѓу 19. екипи кои ќе учествуваат во квалификациите, а бидејќи се најдоа во најслабиот „шешир“, ќе имаат и најтежок пат до групната фаза.
Ќе се играат четири квалификациски турнири од кои три ќе бидат со по пет, а еден со четири екипи. Најслаборангираните тимови, меѓу кои се Куманово и ТФТ ќе почнат од четвртфиналето. Ако триумфираат ќе играат полуфинале, а ако и оттаму излезат како победници, ќе се најдат во баражот за пласман во групната фаза.
Од квалификациите во групите ќе влезат четири екипи, а турнирите ќе се одржат во периодот од 28. септември до 1. октомври.
На крајот на турнирот во Шопрон, добро прво полувреме и пораз од Швајцарците со резултат 53:71.
Одигравме многу подобро во однос на претходниот меч против Унгарија. Особено во првото полувреме, но не успеавме да ја надминеме психолошката бариера по тие 40. минути.
По втор пат на турнирот во Шопрон, селекцијата на Швајцарија беше подобра од нашата младинска.
Уште еднаш имавме сериозни проблеми во одбраната. Им дозволивме на противничките кошаркари да реализираат доста лесни поени. Особено тоа се однесува на второто полувреме во кое Швајцарците креираа висока предност.
Нашите добри минути во првото, во кое резултатот беше нерешен (29:29), ги снема со почетокот на третиот период од мечот за третото место на турнирот. Примивме дури 23 поени, дадовме 14, па Швајцарија поведе со 52:43.
На средината од последната четвртина, негативата беше уште повисока, (51:67) и недостижна за нашиот тим „Под 20“ години. Останавме на само осум дадени поени во последните десет на првенството во Унгарија кое го завршуваме на позицијата број 4.
Пред нас се Унгарија, Белорусија и Швајцарија, зад нас Луксембург, Словачка, Романија и Косово.
Дончиќ на олимпиското деби постигна 48 поени
Лука Дончиќ со премиерната изведба на Олимписките игри најави дека е подготвен сам да ја води Словенија до медал.
Во првото коло од кошаркарскиот турнир, Словенија ја победи Аргентина со 118:100, а Дончиќ постигна дури 48 поени.
Веќе на полувреме имаше 31 поен и се чинеше дека би можел да го сруши рекордот на легендарниот Бразилец Оскар Шмит, кој во 1988. против Шпанија постигна дури 55 поени. Но, како натпреварот пред време беше решен, Дончиќ завршницата ја проследи од клупата.
Тој до 48 поени стигна за 31 минута игра, погоди 18 од 29 шутеви, меѓу кои 6 од 14 тројки. Запиша уште 11 скокови, пет асистенции и три блокади.
Клемен Препелиќ постигна 21 поен, Влатко Чанчар 12, а Аргентина ја предводеа Луис Скола со 23 поени, Кампацо постигна 20, додека Габриел Дек застана на 15 поени.
