Нашата младинска репрезентација ќе игра против домаќинот во полуфиналето од ФИБА Челeнџерот во Шопрон.

Унгарците ја завршија групната фаза со максимален ефект, совладувајќи ги Белорусија, Словачка и Косово со вкупна кош-разлика од 73 поени. Во директниот дуел за првото место, Унгарија беше подобра од Белорусија со убедливи (93:81).

Таа е единствена селекција која оствари три победи во групите од Челинџерот во Шопрон. Натпреварот е на програмата в сабота од 19.30 часот.

Втората полуфинална двојка ја сочинуваат Швајцарија која беше првопласирана во групата со Македонија и Белорусија која на досегашните три меча победи на два од нив.

Машката сениорска репрезентација се врати од Маврово каде работеше во изминатите седум дена. На падините на Бистра нашите најдобри кошаркари го поминаа оној базичен дел од подготовките, секогаш најтежок во подготвителниот период.

Еден од најискусните во националниот тим, Бојан Трајковски, со свои впечатоци по сработеното на нашата планинска убавица.

„Она поради што и дојдовме во Маврово, според мене, го реализиравме во целост. Период на максимална, колективна соработка, онака како што треба да функционира една национална селекција. Дополнето со одлична работа од сите кои се дел од селекцијата. Она што е особено важно, е што ‘работевме’ и на покачување на оној тимски дух, и тоа како потребно за одлично функционирање на тимот кој треба да донесе резултат во претквалификациите за Светскиот Куп. Хемиjата, заедно со постоечкиот квалитет, е таа која треба да нè води на патот кон успехот на средбите со Словачка и со Швајцарија“- анализира Трајковски.

За новиот капитен на нашата сениорска репрезентација е важен и еден друг момент.

„Освен мали, ситни повреди, овие седум дена ги одработивме на едно максимално ниво, за кое многу ни помогнаа и луѓето од стручниот штаб. Сега, кога ја имаме основата, кога ја имаме хемијата во екипата, одиме понатаму во подготовките“.

Сениорите продолжуваат со реализација на планираните активности кои во наредниот период ќе бидат во големата сала на СЦ „Јане Сандански“ во Скопје.

„Ни недостасуваат натпревари, се надевам дека во периодот кој следува и тоа ќе дојде на ‘дневен ред’, и дека ќе провериме што досега сме работеле. Но реков добрата, работна атмосфера е предуслов за успех. Ќе настојуваме да ја подигнеме на уште повисоко ниво. Продолжуваме со работата во Скопје, и на сите нас кои сме тука, со тимот, останува да се подготвиме максимално за она што следува во август“- вели Трајковски. 

Екипите на Куманово 2009 и на ТФТ, двата наши претставници кои се пријавија за настап во ФИБА Еврокупот, имињата на своите противници во првиот круг од натпреварите ќе ги дознаат на 19. август.

За овој термин, во хотелот „Мериот“ во Фрејзинг, од 11. часот, е предвидена да се одржи ждрепката за натпреварувачките двојки во ова натпреварување, како и во женскиот сегмент (Евролигата и Евро Купот).

Неколку дена подоцна, на 25. август, преку видео-линија, клубовите кои се дел од овие натпреварувања, ќе имаат дополнителен состанок на кој ќе бидат дефинирани датумите и сатниците за одигрување на натпреварите.

Милвоки Бакс станаа НБА шампиони по цели 50 години. Јанис Антетокумбо во шестиот натпревар од финалната серија симболично постигна 50 поени и донесе победа од 105:98 за конечни 4:2 во серијата против Феникс.

Јанис во најголемиот натпревар од неговата кариера ја даде и најдобрата партија во кариерата. До 50 поени стигна со шут од игра 16/25, но и неверојатни за него 17 од 19 слободни фрлања. Овој пат ги погодуваше со импресивна смиреност, а второто го промашни дури во последните секунди, кога веќе се беше решено, можеби дури и намерно за да не ја „расипе“ бројката од 50 поени.

Со 50-те поени, Јанис запиша и 14 скокови, две асистенции и пет блокади. Крис Мидлтон постигна 17 поени, Боби Портис 16, а Џру Холидеј со традиционално одличната одбрана остана за чекор краток од „трипл-дабл“, со 12 поени, 11 асистенции и девет скокови.

Антетокумбо беше прогласен и за МВП на финалето, што заедно со штотуку освоениот прстен е најголемата награда во веќе доста успешната кариера за грчкиот кошаркар, иако има само 26 години.

Мечевите за пласман во главниот дел од квалификациите за Светскиот Куп 2023. година, нашата машка сениорска репрезентација ќе ги игра на свој терен во Скопје. ФИБА одлучи мечевите во салата на СЦ „Јане Сандански“ ќе се играат со почеток од 19.00 часот.

Според претходно одредениот календар, претквалификациите ќе ги стартуваме на 12. август, против селекцијата на Швајцарија.

Два дена подоцна, на 14. август, сениорите ќе ги одмерат силите и со селекцијата на Словачка.

На 16. август, го играме вториот натпревар против репрезентцијата на Швајцарија, а на 18. август, турнирот го затвораме со дуелот против Словачка.

Првопласираните две селекции од групата „Ф“ ќе се пласираат во квалификацискиот сегмент за Мундобаскетот во 2023. година.

Кевин Лав нема да биде дел од американскиот кошаркарски „Дримтим“ на Олимписките игри во Токио.

„Разочаран сум што нема да бидам во Токио со колегите од репрезентацијата на САД, но да учествувате на Игрите, треба да бидете во најдобра можна форма, а тоа не е случајот со мене во моментот.“ – рече Лав.

Крилниот центар на Кливленд не стигна да се опорави од повредата на десниот лист поради која пропушти и голем дел од НБА сезоната.

Тоа е ново откажување за селекторот Грег Попович, кој остана без низа играчи. Поради разни причини, досега се откажаа Леброн Џејмс, Ентони Дејвис, Стеф Кари, Кавај Ленард и Бредли Бил.

Нов тим на нашиот млад репрезентативец, Андреј Јакимовски  е Лојола Мериленд од градот Балтимор, во близина на Филаделфија.

Овој универзитет ќе има свој претставник на претстојниот НБА драфт и тоа шпанскиот интернационалец Санти Алдама, кој е исто годиште како Јакимовски.

„Имав понуди од над 15 универзитети од САД, некои од нив беа од ТОП 10 во НЦАА како Арканзас, Тексас Тек… Внимателно ги разгледував сите опции, секаде ми гарантираа дека ќе имам голема минутажа, но во оваа година во САД ми стана јасно дека не може да им се верува на сите.

Бев гостин на универзитетот една недела минатиот месец, се уверив дека имаат одлична програма и одличен тренер, помошникот е Србин со кого остварив прекрасна комуникација и тој ми ги кажа сите важни работи. Затоа одлучив да ја прифатам понудата од Лојола, бидејќи таму се најголеми шансите да бидам еден од најзначајните играчи што ми беше најважно во овој момент“ – појаснува младиот кошаркар кој ланската сезона ја помина како играч на Вашингтон Стејт.

„Минатиот месец имав полесна операција и потребно е време за рехабилитација. Тоа нема да трае долго, но засега не сум во можност да тренирам со полн капацитет. Најверојатно претстојниот викенд ќе се приклучам на репрезентацијата на подготовките во Маврово, но ќе тренирам одвоено, со кондицискиот тренер. Веројатно нема да бидам во најдобра форма во претквалификациите, но ќе се обидам да помогнам колку што можам“ – додавa големата надеж на македонската кошарка.

Пред заминувањето за Шопрон каде ги чекаат натпреварите од ФИБА „Челенџер“ турнирот, селекторот на нашата машка репрезентација „Под 20“ години, Тони Симиќ го направи конечниот избор на 12. кошаркари кои ќе се појават на овој турнир во Унгарија.

Изборот не е оној кој го посакуваше младиот тренер, особено ако се земе предвид дека носителите на играта на оваа селекција, Лејсон Зекири, Марко Миловановиќ и Андреј Андоноски се прекомандувани во А селекцијата.

Но затоа пак добра вест за стручниот штаб во кој освен Симиќ се уште и Нермин Пепиќ и Никола Велев е враќањето на тренинзите на Лука Савиќевиќ.

Бекот на МЗТ Скопје Уни Банка веќе одработи неколку заеднички тренинзи, и се очекува до почетокот на натпреварите во ова ново ФИБА натпреварување да биде подготвен да го даде својот максимум.  

Македонија е дел од групата „Д“ во која се уште и селекциите на Романија, Луксембург и Швајцарија.

За Шопрон патуваат: Данаил Иванов, Дарио Митевски, Богдан Мирковски, Љубиша Димитровски, Павел Данаиловски, Лука Савиќевиќ, Давид Наумовски, Виктор Исајлоски, Таулант Ибраими, Филип Ѓорѓиев, Никола Груевски, Кристијан Столевски.

Македонската репрезентација го започнува базичниот дел од подготовките кои ќе ги одработи во туристичкиот центар Маврово.

Таму, нашиот сениорски национален тим ќе остане на повисока надморска висина до 21 јули кога ќе се врати во Скопје и ќе почнат активностите околу подготвителните натпревари.

Покрај стручниот штаб, предводен од селекторот Драган Бајиќ, неговите асистенти, Александар Јончевски и Адмир Прасовиќ, кондицискиот тренер Алекандар Кукриќ, во автобусот за Маврово се најдоа и: Андреј Магдевски, Кристијан Николов, Бојан Крстевски, Адем Мекиќ, Бојан Трајковски, Бобан Стајиќ, Горјан Марковски, Дамјан Робев, Виктор Ефремовски, Андреј Андоноски, Марко Миловановиќ, Лејсон Зекири, Валмир Какруки, Андреј Настовски, Оливер Двојковски, Теодор Симиќ.

Од 12. до 18. август, Македонија ќе ги игра натпреварите во претквалификациската група во која за противници ги имаме селекциите на Словачка и на Швајцарија. Првопласираните две селекции на турнирот во Скопје, ќе се пласираат во оние главни квалификации за пласман на Светскиот Куп во 2023 година.