Кошаркарската Евролига го одложи натпреварот помеѓу Фенербахче и Реал Мадрид.

Причината за одложувањето е објавата од Реал Мадрид кој пријави уште двајца играчи кои се позитивни на Ковид. Претходно, екипата на Реал информираше дека дури 6 играчи во тимот вклучувајќи го и тренерот Пабло Ласо се заразени со вирусот и тие не настапија на дуелот со ЦСКА Москва каде изненадувачки славеа победа.

Наредниот термин за одржување на средбата ќе биде објавен после консултациите со надлежните тела во Евролигата.

Тимот на Лос Анџелес Клиперс објави дека еден од најдобрите играчи во екипата, Пол Џорџ, има повреда поради која ќе паузира подолг период.

Имено, се работи за скинати лигаменти во десниот лакт за кои ќе треба да се извршат дополнителни прегледи после кои ќе се знае дали играчот ќе мора да оди на операција.

Пол Џорџ веќе подолго време го мачат проблеми со десниот лакт, поради кои две недели не настапуваше за својот тим. Заради сериозноста на повредата се очекува тој да пропушти најмалку 15 натпревари на Клиперси.

Членот на Њујорк Никс, Дерик Роуз, имаше операција на скочниот зглоб поради која осум недели ќе отсуствува од настапи за својот тим.

Роуз, кој е поранешен МВП на НБА лигата, својата повреда ја заработи на натпреварот против Хјустон Рокетс. После деталните прегледи лекарите утврдија дека е потребен хирушки зафат после кој го очекува подолга пауза.

33-годишниот играч, оваа сезона во дресот на Њујорк Никс, има просек од 12 коша, 3 скока и 4 асистенции.

Кошаркарот од Аргентина, Ману Џинобили, е номиниран за влез во кошаркарската куќа на славните за 2022 година.

Џинобили беше член на Сан Антонио Спарс во периодот од 2002 до 2018 година и успеа да освои 4 шампионски прстени во НБА лигата.

Со репрезентацијата на Аргентина тој успеа да го освои олимпиското злато во 2004 година на игрите во Атина.

Кошаркарите кои ќе влезат во изборот за влез во куќата на славните ќе бидат претставени на Ол-стар натпреварот од НБА лигата чиј домаќин е Кливленд, а се одржува во февруари.

Американските медиуми пренесуваат дека кошаркарот на Лос Анџелес Лејкерс, Ентони Дејвис, ќе мора да паузира четири недели поради повреда на лигаментот од левото колено.

Центарот на Лејкерс, повредата ја заработи при поразот од екипата на Минесота Тимбервулвс кога поради болки во коленото предвреме го напушти натпреварот. 

После деталниот преглед кај 28-годишниот Дејвис е откриено истегнување на лигаментот поради што е потребно мирување.

Ентони Дејвис во текот на сезонава во просек остваруваше 23,3 коша и 9,9 скокови. Тој од вкупно 30, пропушти настап на само 3 натпревари.

Играчот на Бруклин Нетс, Кевин Дурант, ја доби наградата за најдобар кошаркар во репрезентацијата на Соединетите Американски Држави. 

Дурант оваа престижна награда ја добива по трет пат во својата кариера, во 2010 година самостојно а во 2016 заедно со Кармело Ентони.

Кевин Дурант беше предводник и најкорисен играч во американскиот Дрим тим при освојувањето на златото на Олимписките игри во Токио. Тој во просек забележа 20,7 поени, 5,3 скокови и 3,7 асистенции.

„Ова огромно достигнување за мене. Ми беше чест да ја претставувам мојата земја пред најдобрите светски спортисти. Многу големи играчи настапувале за националниот тим низ историјата, а јас сум на самиот врв со нив, што е голема чест за мене.Благодарен сум што ја добив оваа награда“, изјави Дурант.

Стив Кер кој е главен тренер на НБА тимот Голден Стејт Вориорс, ќе биде наследник на Грег Поповиќ на селекторското место на кошаркарската репрезентација на САД.

Кер кој досега беше дел од стручниот штаб на легендарниот Поповиќ, ќе ја предводи репрезентацијата на Светското првенство во 2023 и Олимпијадата во Париз 2024 година.

Стив Кер е трикратен НБА шампион со тимот на Голден Стејт.

Со освоени 197.4 поени, машката сениорска репрезентација на Македонија е рангирана на 29. место на европската рејтинг листа на ФИБА. А во исто време, нашиот најдобар тим е поставен на 52. позиција во вкупниот светски поредок на Светската кошаркарска фeдерација.

Тоа значи дена „црвено-жолтите“ направија еден чекор понапред во вкупниот рејтинг кој го креира ФИБА во тековната календарска 2021 година.

Новата година нашите противници во „Г“ квалификациската група за Светскиот Куп 2023 ја дочекуваат на доста повисоки позиции. Во овој момент, селекцијата на грузија, со која ќе се соочиме во оној февруарски „прозорец“ на ФИБА, е на 38. место во светот, а на 19. место кога се класифицираат европските национални тимови во машка конкуренција.

Селекцијата на Украина е на 32. место во светот на кошарката , а на 16. во европската зона на ФИБА, додека пак Шпанија е веднаш зад неприкосновените Американци.

„Црвената фурија“ има 724.1 поени, и после двете победи во нашата квалификаиска група, заостанува уште помалку во однос на водечкиот САД кој 2021 година ја затвора со 763.3 освоени ппени во поредокот.

Кошаркарот Кајри Ирвинг е категоричен дека нема да се вакцинира против коронавирусот и се чини дека ќе мора да го напушти Бруклин Нетс доколку сака да игра кошарка.

Впрочем, во последните неколку часа се појавија информации кои велат дека Нетс се заинтересирани да прифатат евентуална добра понуда, а интерес постои. Наводно го покажале Филаделфија и Њу Орлеанс.

Според инсајдерот Шамс Чаранија, ниту Ирвинг не е подготвен да го промени своето мислење за вакцинацијата, ниту пак Нетси планираат да го променат ставот и да го држат надвор од тимот.

„Кајри Ирвинг не е блиску да се вакцинира и нема да игра кошарка доколку не биде трејдуван, освен ако Нетси не дојдат и не кажат дека може да игра на гости и само да тренира на домашен терен. Но, тоа нема да се случи. Доколку не се вакцинира, Ирвинг повеќе нема да игра за Нетси“, изјави Чаранија.

Ќе видиме дали е можно да се случи помасовен трејд. Се споменува дека Ирвинг би можел да оди во Филаделфија (град кој не бара задолжителна вакцинација), така што во целата приказна Зион Вилијамсон би завршил во Бруклин, а Бен Симонс во редовите на Пеликанс.

Шпанскиот кошаркар Марк Гасол по 13 години поминати во НБА лигата, се врати во родната земја и ќе настапува за тимот на Гирона кој е член на втората шпанска лига.

36-годишниот Марк беше дел од американската НБА лига од 2008 година каде играше за екипите на Мемфис, Торонто и ЛА Лејкерс.