По одигрувањето на последните натпревари од квалификациите за Европското првенство, станаа познати и сите учесници на европската зона од претквалификациите за пласман на Светското првенство во Индонезија, Филипини и Јапонија во 2023 година. По Белорусија, Исланд, Португалија и Словачка кои се квалификуваа во првиот круг од квалификациите, преостанатите осум места беа пополнети со уште осум селекции од квалификациите за ЕвроБаскет 2022.
По неуспехот да се квалификуваат на 41. издание на водечката манифестација во Европа, Австрија, Данска, Летонија, Црна Гора, Македонија, Романија, Шведска и Швајцарија ќе го започнат патот кон Светскиот куп во 2023, од второто коло на Европските претквалификации, кои треба да се одржат во август 2021 година.
Овие 12. национални тимови ќе се натпреваруваат во четири групи од по три екипи за вкупно осум места на пласман на европските квалификации за Светскиот куп. Место во регуларниот дел од квалификациите ќе изборат најдобрите две нации од секоја група.
Датумот и распоредот на натпреварите, и ждрепката на групите ќе бидат потврдени во подоцнежна фаза.
Директен пласман во квалификациите за Мундобаскетот обезбедија 24. селекции, учесници на Европското првенство.
Од вкупната бројка на учесници во квалификациите за Светскиот Куп-32, место во завршниот дел ќе обезбедат 12. европски репрезентации.
Светскиот шампионат за прв пат од постоењето, ќе се игра во повеќе различни држави во светот, односно во Индонезија, Филипини и Јапонија.

Машката сениорска репрезентација на Македонија не успеа да обезбеди пласман на завршниот турнир од Европското првенство. На последниот турнир во Перм, баравме победа изразена со над десет поени разлика против Естонија. А под Урал, испадна малку поинаква ситуација. Кога моравме, прво ја победивме Италија, а потоа во мечот на одлука ја победивме и Естонија. Но не со десет, туку со два поени разлика. Тие осум поени ни пресудија, на крајот на трката останавме зад Италија, Русија и Естонија.
Доволно за селекторот Александар Тодоров да направи една првична анализа за овој квалификациски циклус, кој го завршуваме со ефект од две победи и четири порази.
Период во кој, како што вели Тодоров, се „измешаа“ разочарувањата и задоволството.
„Ако се осврнеме наназад на овие шест натпревари од овие квалификации, можам да кажам дека има два спротивставени моменти: едниот разочарувањето поради необезбедувањето пласман на ЕП, и вториот огромното задоволство дека бев дел од нешто ново што се создава и што ќе трае во наредните 10-15 години.
Имаме два порази во израмнети, до последните минути, средби со Русија и Италија. Имаме еден крајно лош натпревар со Русија, ама имаме и две победи, и едно катастрофално лошо полувреме во Скопје во првиот натпревар во овој циклус нè остави да го гледаме следното ЕП дома“.
„Сите 15 играчи кои беа тука, го дадоа својот максимум. Знаете дека ниту еден од нив не беше принуден да игра за репрезентација под закана од казни и санкции.
Знаете дека четворица од нив одлежаа 14 дена карантин во Естонија само заради желбата да играат за националниот дрес. И тоа се тие нешта што ме прават да сум горд што бев нивен тренер. – го „заклучува“ циклусот, Тодоров.

Машката сениорска репрезентација на Македонија ќе тргне во решавачката битка за пласман на Европското Првенство со истата група на играчи кои стигнаа до првата победа во овој квалификациски циклус.
Селекторот Александар Тодоров одлучи дека тимот кој победува не треба да се менува, па денеска, во 15.часот во Арената „Молот“ во Перм, ќе истрчаат истите 12. кошаркари кои вчера ја совлада Италија (87:78).
Дамјан Робев, Лука Савичевиќ, Бојан Крстевски, Дамјан Стојановски, Кристијан Николов, Андреј Магдевски, Бојан Трајковски, Теодор Симиќ, Џејкоб Вајли, Војдан Стојановски, Ненад Димитријевиќ и Стојан Ѓуроски.
Ненад Димитријевиќ и Дамјан Стојановски имаат повреди. Првиот ја заработи на средбата со Италија, вториот пак во пресметката со Русија.
Дамјан стисна заби, заигра, помогна во дуелот со аѕурите. Ќе биде во тимот, истото го очекуваме и од Ненад, чиј настап е ставен под знак прашалник се до почетокот на средбата со Естонија закажана за 15. часот.
„Денеска пред нас ќе имаме два тешки противника: силната естонска репрезентација и нашиот замор кој е уште поголем проблем, особено ако знаеме дека веројатно ќе играме без Ненад Димитријевиќ“- кажа селекторот Тодоров по големата победа над Италија која ни ги остави „живи“ шансите за учество на ЕП.

Ентони Едвардс, 19-годишниот бек шутер од Џорџија, беше прв пик на овогодинешниот НБА драфт. Беше избран од Минесота без да ја заврши првата сезона на колеџ, во текот на која бележеше просек од 19,1 поен со 5,2 скокови и 2,8 асистенции. Едвардс со својата градба и стилот на игра потсетува на Донован Мичел од Јута, а стручњаците му предвидуваат повеќекратни настапи на Ол-Стар натпреварите. Снажен е и експлозивен со потенцијал да постигнува по 30+ поени, но му се замерува на недостатокот на ангажман и играта во одбрана. Сето ова Едвардс го покажа на почетокот на својата НБА кариера. Меѓутоа, Едвардс синоќа го изведе најефектниот потег не само на натпреварот, туку и на целата вечер. Ефектно и брутално заби преку десет сантиметри повисокиот Јуто Ватанебе, а НБА на официјалниот Твитер профил објави снимка од тој потег од повеќе агли:

На прес-конференцијата по одигрувањето на средбата со Русија, говореше селекторот Александар Тодоров. Како најава за пресот, Тодоров го потенцираше оној психолошки момент присутен во тимот откако имале прилика да ја видат играта и резултатот на првиот меч во „балонот“ во Перм, во кој Естонија ја изненади Италија и се приближи до пласман на ЕП. А нашата селекција, по овој втор пораз, ја стави во една императивна форма. Да победи на наредните два, прво во недела против Италија, а ден подоцна, и против Естонија. „Тешко беше да се сконцентрираме и психолошки да се подготвиме, не толку во однос на нашиот противник, колку што нè изненади првиот меч на програмата програма, меѓу Естонија и Италија. Мислевме дека одлучувачки ќе биде нашиот дуел со Естонија, но додека се подготвувавме во соблекувалната, ја дознавме лошата вест, дека ќе ни требаат две победи за да се пласираме на Европското првенство. Втор важен момент беа скоковите, а трет повредата на Дамјан Стојановски поради што моравме да ротираме тројца кошаркари на таа позиција во преостанатите 36 минути. Противникот имаше 24 скока повеќе од нас, 17 само во првото полувреме кога ја оствари клучната разлика. Без оглед на сè, мораме да ги кренеме главите и да продолжиме понатаму. Ни претстои слободен ден, а потоа два натпревари во два дена кои ќе одлучат. Играме за нашата земја и тоа е најголема мотивација што може да ја добиеме. За жал, лошо ги почнавме овие квалификации (против Естонија во Скопје) и сега поради еден лош натпревар го губиме целиот циклус“ – изјави Тодоров.

Селекторот на нашиот сениорски национален состав, Александар Тодоров ги пополни оние 12. места кои ќе влезат во официјалниот протокол за средбата со Русија. Се одлучи на натпреварот со домашната селекција која стартува од 15.30 часот (по македонско време), да им укаже доверба на следниве играчи: Дамјан Робев, Виктор Ефремовски, Бојан Крстевски, Дамјан Стојановски, Кристијан Николов, Андреј Магдевски, Бојан Трајковски, Филип Бакоч, Џејкоб Вајли, Војдан Стојановски, Ненад Димитријевиќ и Стојан Ѓуроски. „Нема да менуваме ништо. Она што го одигравме вчера вечер со Италија, ќе го играме и против Русија. Одиме на победа против домаќинот. Одиме да си покажеме на самите себе дека можеме да играме со големите репрезентации. Штета е што добрата игра со Италија не ја наградивме со победа. Но што е тука е, на крајот на денот излеговме со кренати глави по тој натпревар, кој ни даде некои насоки каде би можеле да ја унапредиме нашата игра“. – изјави Бојан Трајковски, кој беше еден од четворицата играчи во нашата селекција кои премиерниот меч од квалификациите за ЕП 2022 во Перм, го завршија со двоцифрен број на поени.

По утринскиот тренинг, во поголема мерка шутерски, селекторот на нашиот сениорски национален состав, Александар Тодоров ги пополни оние 12. места кои ќе влезат во официјалниот записник за средбата со Италија. Тодоров имаше неколку дилеми, кои ги тргна непосредно по одработените 45. минути. Се одлучи на средбата со Италија која стартува од 15.30 часот (по македонско време), да им укаже доверба на следниве играчи:
Дамјан Робев, Андреј Митревски, Бојан Крстевски, Дамјан Стојановски, Кристијан Николов, Андреј Магдевски, Бојан Трајковски, Теодор Симиќ, Џејкоб Вајли, Војдан Стојановски, Ненад Димитријевиќ и Стојан Ѓуроски.
„По точно една недела од првиот собир, од денеска ја почнуваме серијата од четири натпревари во период од пет дена. За нас ова е прв натпревар по пауза од точно една година. Се надевам дека ќе покажеме дека можеме да се ‘носиме’ со најсилните европски репрезентации како што беше случај минатиот февруари против Русија. Но во исто време и да потврдиме дека мечот со Естонија на домашен терен беше само лош ден“ – вели Тодоров пред почетокот на „балонот“ во Перм.