Бруклин официјално објави потпишување договор со Пол Милсап. 36-годишниот кошаркар на Денвер, следната сезона ќе биде дел од составот кој претендира да ја напрадне титулата во НБА лигата.
Претходно, имаше информации дека Милсап очекува да добие најмалку 5,9 милиони долари за новиот договор со Бруклин, откако одби да потпише минимален договор со Денвер.
Минатата сезона, четирикратниот Ол-стар учесник одигра 56 натпревари за Денвер со просек од 9 поени, 4,7 скокови и 1,8 асистенции.
Олимпија Милано ќе ја водат двајца капитени во новата сезона
Олимпија Милано се одлучи на необичен потег во пресрет на новата сезона. Имено, според генералниот менаџер на италијанскиот кошаркарски гигант, екипата следнава сезона ќе има двајца капитени – Николо Мели и Серхио Родригез.
Иако е практика тимовите да имаат капитен и заменик, во Милано одлучија да направат промена и Мели и Родригез ќе имаат иста титула.
„Заедно ја донесовме одлуката да именуваме двајца играчи кои значат многу за овој клуб. Николо поради неговата историја, Серхио поради сe што претставуваше неговото доаѓање за нас. Ова не е симболичен потег, тие се пример за секого поради нивната професионалност и посветеност, во која е препознаен целиот клуб“, вели генералниот менаџер на Армани Милано, Христос Ставропулос.
Ново засилување за Бруклин, повторно ќе атакува на титулата
Пол Милсап, четирикратниот Ол-стар играч, стана нов член на Бруклин Нетс.
Последните четири сезони 36-годишниот крилен центар ги помина во Денвер, а по крајот на минатата сезона стана слободен играч. Откако бираше помеѓу Голден Стејт, Чикаго, Клиперс и Бруклин, тој се одлучи за последната екипа, која минатата сезона беше еден од главните фаворити за титулата, но не успеа во конференциското полуфинале против Милвоки, кој подоцна стана и шампион.
Милсап во последната сезона во Денвер забележа просек од 9 поени по натпревар и 4,7 скокови. Пред Денвер, настапуваше и за Јута и Атланта.
Милсап е второто засилување за Бруклин, откако во клубот претходно дојде Пети Милс. Со Милсап и Милс, Нетси добија двајца одлични играчи по што се големи фаворити за титулата.
Бајиќ: „Нека размислуваат противниците за нас, а не ние за нив!“
Драган Бајиќ, селекторот на нашиот сениорски национален тим присуствуваше на церемонијалот на одредување на квалификациските групи по кој Македонија за противници ги доби националните репрезентации на Шпанија, Грузија и Украина.
„Добивме група која не изгледа како атрактивна, но не е ниту лесна“- е првиот коментар на нашиот селектор по дознавањето на противниците во квалификациите за СК 2023. „Но мојата тренерска филозофија вели дека повеќе сакам противниците да размислуваат за нас, отколку ние за нив. Така е и овојпат. Во разговорите со колегите кои се тука во Женева, дознав дека се вложува многу. И во Грузија, и особено во Украина, тоа се сериозни селекции, за шпанската не сакам да дискутирам. Но во мојот речник не постои зборот предавање“.
Селекторот вели дека овие најмалку шест натпревари се всушност продолжение на планираните активности откако дојде на кормилото на нашиот сениорски национален тим.
„Јасна е визијата, сакаме низ овие натпревари да им дадеме уште поголем прилика на помладите. Верувајте во секој прозорец тоа ќе биде и видливо. Овие мечеви би биле само континутитет на реализација на плановите. Искрено се надевам дека во наредниот циклус ќе ги имаме на располагање и играчите кои не беа во можност да бидат дел од селекцијата, што не беше случај овој месец. И сите заедно да уживаме и да напредуваме низ овие квалификациски натпревари. Се надевам дека зад нас ќе останат проблемите со короната, дека ќе се врати оној стар систем на натпреварување. Дека публиката ќе се врати во салите, без тоа е сосема поинаку“- вели селекторот.
Мекиќ: Добивме добра група, а ќе играме и против светскиот шампион
Адем Мекиќ беше еден од најдобрите, најстандардни наши репрезентативни играчи на претквалификациите за Светскиот Куп.
Тој, исто како и неговите репрезентативни соиграчи ги чекаше исходот на ждрепката за онаа главна фаза – квалификациската, која за противници во групата „Г“ ни ги донесе селекциите на Шпанија, Украина и на Грузија.
„Онака, од прва, се чини дека добивме една добра група. Противници, што се вели по мерка. Од една страна, ќе играме против светскиот шампион, Шпанија, што несомнено е една голема чест. Да се бориш против најдобриот во светот, а во исто време, ги имаме Украина и Грузија. Селекции со кои можеме да бидеме компетитивни, каде имаме простор за резултат“ – вели крилото на нашиот национален состав.
Она што Мекиќ лично посакува е веќе од ноември, кога стартуваат квалификациите, екипата да биде комплетна.
„Посакувам да бидеме комплетни, во екипата да имаме и играчи кои не беа дел од претквалификциите преку кои и дојдовме до една ваква можност да одиграме најмалку шест натпревари против велесила како Шпанија, и силни, квалитетни репрезентации како Украина и Грузија. Да немаме проблеми со повредите. Да не се потценуваме, но ниту да ги преценуваме противниците без оглед што ја имаат фаворитската улога. И најважно од се, да веруваме во нашите способности, во нашите квалитети. Се надевам дека ќе бидеме конкуретни во ова друштво од квалификациите за Светското првенство“- посакува Мекиќ.
Рондо се врати во Лос Анџелес Лејкерс
Ветеранот во НБА лигата, Ражон Рондо, ќе го напушти Мемфис и ќе се активира во екипата на Лос Анџелес Лејкерс.
Кошаркарот ќе се врати во редовите на „езерџиите“ за кои настапуваше од 2018 до 2020 година кога го освои вториот шампионски прстен во кариерата.
Рондо е петтиот играч кој направи кам-бек во градот на филмската и телевизиската индустрија . Пред него тоа го направија и Двајт Хауард, Кент Бејзмор, Вејн Елингтон и Тревор Ариза.
Само вакцинирани судии ќе водат натпревари во НБА лигата
НБА лигата објави дека е постигнат договор со асоцијацијата на НБА судии, и ќе бара сите судии кои ќе делат правда на натпреварите од најсилната кошаркарска лига на светот, задолжително да бидат вакцинирани со вакцина против Ковид-19. Исклучок може да се направи само ако некој судија од медицински или религиозни причини не смее да се вакцинира.
Судии кои нема да сакаат да се вакцинираат, нема да може да судат во НБА.
Со ова, се зголемува листата на лица од кои НБА бара да бидат вакцинирани. Вакцини им се потребни и на тренерите, лекарските тимови, обезбедувањето во салите, тимовите за комуникација, раководни луѓе од клубовите. Мајами хит и Сакраменто кингс побараа од сите вработени да се вакцинираат, а некои клубови од публиката ќе бараат доказ за вакцинација при влез во нивната арена.
Бруклин се раздели со Деандре Џордан
НБА тимот Бруклин Нетс одлучи да се раздели со центарот Деандре Џордан. Според информацијата, ако Бруклин не успее да тргува со Деандре Џордан, неговиот договор може да се откупи. Забележано е дека ситуацијата е комплицирана од фактот што Нетс се соочуваат со тешкотии со потенцијална размена на кошаркар, бидејќи тимот нема вредни драфтови што може да се понудат на другата страна од договорот.
Џордан е во Бруклин Нетс од 2019 година. Неговиот просек во регуларната сезона 2020/2021 беше 7,5 поени, 7,5 скокови, 1,6 асистенции.
ФИБА го објасни системот за квалификации за Мундобаскетот
Квалификациите за Мундобаскетот ќе се играат во две фази од по три „прозорци“, во периодот од ноември 2021 до февруари 2023 година.
ФИБА одлучи малку да го промени системот, па во првата, 32 репрезентации во европските квалификации ќе бидат поделени во осум групи од по четири. Првопласираните три од секоја група одат во следната фаза каде се спојуваат со друга и ги пренесуваат бодовите од првата фаза.
Тоа значи дека во втората етапа ќе има четири групи од по шест репрезентации, но нема да се почнува од „нула“. Пласман на Мундобаскетот обезбедуваат првите три репрезентации од новоформираните групи, односно од втората фаза.
Првата етапа ќе се игра во три прозорци: од 20 до 30 ноември 2021, од 21 февруари до 1 март 2022 и од 27 јуни до 5 јули 2022 година. Во втората етапа ќе се игра од 22 септември до 30 август 2022, од 7 до 15 ноември 2022 и од 20 до 28 февруари 2023 година, со по два натпревари во секој прозорец.
Ждрепката за квалификациите за Светското првенство ќе се одржи на 31 август (12.часот), во Куќата на кошарката „Патрик Бауман“ во Мие, а на неа првпат во историјата ќе учествува и македонската репрезентација.
Формирани групите во првата фаза на БИБЛ лигата
Првата фаза од новата сезона во БИБЛ лигата е реализирана.
Во седиштето на Лигата на Балканот во Софија беше извршенa ждрепката на двете натпреварувачки групи за сезоната 2021/2022 во која Македонија ќе има три свои претставници во екипите на Куманово 2009, ТФТ и за прв пат во кратката историја на постоењето, Академија ФМП.
Согласно со системот за натпреварување, во новата сезона ќе се натпреваруваат десет екипи, поделени во две групи по пет. Со оглед на тоа дека имаме три претставници, за очекување беше дека во една од групите, во овој случај, групата „А“, ќе следиме „македонско дерби“.
За пласман во втората, елиминациска фаза ќе играат Куманово 2009 и ФМП Академија. Покрај во првиот круг ќе играат Хапоел Галил Гилбоа, Балкан од Ботевград и косовскиот Пеќ.
Екипата на ТФТ е во групата „Б“ во која ќе се натпреваруваат уште и екипите на Ирони Нахарија, Академик од Пловдив, Берое – Стара Загора и Сигал Приштина.
Менаџментот на БИБЛ лигата остави простор во групите да има уште по една екипа од некои од заинтересираните федерации како Романија и Црна Гора.
