Mакедонскиот дефанзивец, Никола Серафимов доби место во идеалниот тим во Унгарија на полусезоната.

Трансферот во редовите на Залагересег за Серафимов се покажа како одличен потег. Неговиот тим е петти на табелата, а Серафимов има учинок од 16 натпревари и четири постигнати гола.

Екипата на Севиља, е принудена што побргу да купи напаѓач, бидејќи Мунир и Ен-Несири ќе патуваат на Купот на афрички нации, па тимот на тренерот Лопетеги ќе остане само со Рафа Мир како единствен голгетер.

Според информациите од Скај спорт, спортскиот директор на Севиља, Мончи, ќе проба веднаш по  Нова година да го доведе Антони Марсијал од Манчестер Јунајтед. 

25-годишниот Французин, падна во втор план во екипата од „Олд Трафорд“ и постои шанса тој да ја промени средината.

Директорот Мончи верува дека доаѓањето на Марсијал ќе направи разлика во тимот бидејќи иако е млад тој има огромно искуство и гарантира постигнување на голем број голови.

Турскиот гигант Фенербахче, ќе им помогне на Барселона да се ослободи од дефанзивецот Самуел Умтити. Екипата од Истанбул е во потрага по нов тренер но сака и нови засилувања кои ќе му помогнат на тимот да прикажува подобри игри и оствари повисок пласман на табелата.

Челниците на Фенербахче се одлучија за трансфер на Французинот Умтити, кој веќе подолго време не е првотимец на „Камп Ноу“ и по се изгледа дека не е во идните планови на тренерот Чави. Од Барселона би биле задоволни доколку се во можност да се ослободат од играчот за кој издвојуваат прилично висока плата.

Фенербахче на Умтити ќе му понуди ангажман до крајот на сезоната со што играчот би се обидел да направи рестарт на формата и кариерата. 

Фудбалскиот клуб Реал Сосиедад го потврди пристигнувањето на Рафиња од Париз Сен Жермен.

Како што потврдуваат од клубот, Рафиња за Сосиедад ќе игра како позајмен играч до 30. јуни, но клубот од Шпанија нема обврска да го откупи неговиот договор после позајмицата.

Рафиња Алкантара потекнува од позната младинска школа на Барселона „Ла Масија“,од каде беше испратен на позајмица во Селта а потоа и во Интер. Во 2020 Барселона без обештетување го испраќа во екипата на ПСЖ, каде немаше забележителна улога. Тој во Париз одигра вкупно 39 натпревари, без постигнат гол, но забележа 7 асистенции.

Рафиња во дресот на Реал Сосиедад ќе биде жесток противник на Барселона во борбата за пласман во Лигата на шампионите.

По се изгледа, екипата на Њукасл Јунајтед конечно ќе започне со купување на нови засилувања. Медиумите во Англија пренесуваат дека веќе е договорен трансферот на Киран Трипие од Атлетико Мадрид.

31-годишниот англиски репрезентативец, ја игра последната година од договорот со актуелниот шампион на Ла Лига, па евентуална примамлива понуда од Њукасл сигурно би била прифатена од челниците на Атлетико.

Трипие е проценет на околу 20 милиони евра, пари кои реално не би биле проблем за богатите сопственици на Њукасл. Доведувањето на искусниот и квалитетен Англичанец би ги зголемиле шансите на популарните „чавки“ за опстанок во Премиер лигата.

Ајакс го договори првото засилување за зимскиот преоден рок.

Станува збор за 19-годишниот холандски напаѓач Брајан Броби кој во овој момент е член на Лајпциг. Според последните информации тој на Ајакс ќе се придружи за вториот дел од сезоната како позајемн играч, но без опција за откуп. Тоа значи дека ако нема договор во меѓувреме ќе се врати во германскиот клуб.

Ќе потсетиме, Броби во јули оваа година токму од Ајакс премина во Лајпциг и до овој момент на 14 натпревари во сите натпреварувања подели три асистенции.

По се изгледа дека нема повеќе дилеми, Инсиње е решен да го напушти Наполи. Тој заминува од клубот после 11 сезони и одиграни преку 300 натпревари.

Неговиот договор завршува во јуни и за него огромен интерес покажуваа екипите на Интер и Милан, како и некои англиски прволигаши. Но Инсиње не може да оддолее на понудата од Канада, односно на членот во МЛС Лигата, Торонто.

Имено фудбалскиот клуб Торонто на 30-годишниот Инсиње му понуди неверојатна плата од 9,5 милиони евра по сезона. За споредба платата на играчот во Наполи е 4,5 милиони евра. 

Инсиње се очекува да ја продолжи успешната приказна на сонародникот Џовинко кој повеќе сезони настапуваше за Торонто и остави одличен впечаток во МСЛ Лигата.

Фудбалскиот клуб Париз Сен Жермен е наводно заинтересиран за голгетерот на Баер Леверкузен, Патрик Шик.

Шик својата популарност најповеќе ја стекна на изминатото Европско првенство каде имаше одлични партии во дресот на Чешката репрезентација. Тој во моментот е втор најдобар стрелец во Бундеслигата, веднаш зад Роберт Левандовски од Баерн Минхен.

Бившиот играч на Сампдорија, Рома и Лајпциг не крие дека постои интерес од ПСЖ но во моментот тој е фокусиран само на настапите за популарните „фармацевти“.

„Јас и моето семејство сме презадоволни од нашиот престој во Германија. Кариерата ми се движи во одличен правец и во моментот не размислувам за напуштање на Бундеслигата. Дефинитивно, никој не ме присилува да го напуштам Леверкузен но ќе видиме што ќе донесат наредниве месеци“, вели Шик.

Извонредниот Чешки голгетер, од почетокот на сезоната во Бундеслигата, на 18 натпревари има постигнато 16 гола.

Златан Ибрахимоиќ има желба да игра и следната сезона, па затоа преговара со раководството на Милан за продолжување на соработката.

Според последните информации ако Ибрахимовиќ сака да игра и следната сезона во дресот на Милан ќе мора да прифати значително намалување на платата. Ибра и понатаму прави разлика на теренот, но без него тимот игра поинаку, побрзо и со повеќе пресинг. Тука се и честите повреди кои ги имаше откако дојде на „Сан Сиро“, па затоа раководството сериозно размислува за платата и времетраењето на договорот.

Најавите се дека Милан на Златан ќе му понуди нов едногодишен договор со помали примања. Тренерот Стефано Пиоли би го користел Ибрахимовиќ помалку со цел да се намали можноста за нови повреди, па Ибра и почесто би поминувал време на клупата.

Серхи Роберто, е еден од капитените на Барселона, а сега се согласи на драстично намалување на платата.

Според актуелниот договор Роберто заработува девет милиони евра по сезона, меѓутоа сега се согласи за двегодишен договор вреден шест милиони евра. Тоа значи дека во следните две години ќе заработува само третина од она што го има според сегашниот договор.

„Чави сака Роберто и понатаму да биде дел од Барселона. Управата на клубот се сложува, а и Роберто сака да ја продолжи кариерата на „Камп Ноу“. Наскоро ќе пристигне и официјалната објава за договорот“, пишува каталонскиот „Спорт“.

Роберто е дете на Барселона, за првиот тим дебитираше уште во 2010 година. Сезонава поради повреда одигра само 560 минути. На терените би требало да се врати на пролет.