Членовите на Барселона со гласање на референдум го усвоија предложениот финансиски план за иднината на клубот, кој вклучува инвестирање на 1,5 милијарди евра за реновирање на стадионот „Камп Ноу“, спортската сала „Палау Блауграна“ и целата област околу новиот спортски комплекс.

Планот доби одобрување од 48.623 членови на Барселона што претставува 87,8 проценти од пријавените гласови. 

Приоритет за Барселона е реновирањето на стадионот, кое треба да заврши до крајот на 2025 година. Работата ќе започне во 2022 година, а по завршувањето на градежните работи, капацитетот на стадионот ќе изнесува 105.000 гледачи, со што каталонците ќе го имаат најголемиот стадион во Европа.

Серхио Агуеро поради здравствените проблеми беше приморан да ја заврши играчката кариера.

Аргентинецот изминатото лето потпиша за Барселона и одигра само неколку натпревари за каталонскиот клуб. На натпреварот против Алавес кој се играше на 30 октомври Агуеро имаше проблеми со дишењето и беше пренесен во болница. После деталните прегледи докторите открија дека Агуеро има срцеви проблеми и најдобро за неговото здравје е да ја заврши со професионалното играње фудбал. Таа одлука Агуеро ја соопшти минатата недела на прес-конференција.

Сега се појави информација дека Агуеро добил понуда од Манчестер Сити. Клубот во кој Агуеро ги помина најдобрите денови од кариерата му понудил да биде клупски амбасадор. Шпекулациите во овој момент се дека Агуеро ќе ја прифати оваа понуда.

Агуеро во Манчестер Сити помина десет сезони и стана најдобар стрелец во историјата на клубот.

Италијанските медиуми пренесуваат дека е можна разделба на Лацио со српскиот играч од средината на теренот, Сергеј Милинковиќ-Савиќ.

Тренерот на екипата, Маурицио Сари, не бил задоволен од односот и залагањето на фудбалерот за време на натпреварите и изјавил дека Сергеј делува арогантно.

Претседателот на Лацио, Клаудио Лотито, во минатото веќе одби неколку понуди за Србинот, за кои некои клубови нудеа и до 140 милиони евра. Сега останува да се види дали клубот е спремен да го продаде Милинковиќ-Савиќ во јануари и колку би изнесувал евентуалниот трансфер.

Спортскиот директор на Париз Сен Жермен, Леонардо, застана во одбрана на Лионел Меси за кој се тврди дека после неговото доаѓање од Барселона во ПСЖ, тој има пад во формата и не прикажува исти партии како за каталонците.

“Квалитетот на Лионел Меси е неспорен за мене. Ако почнете да го критикувате Меси, тоа ќе биде само затоа што не разбирате ништо од фудбалот. Ако ги погледнете статистичките бројки за неговата игра, ќе видите дека првите 6 месеци на Меси во тимот се неверојатни. Тој и Килијан Мбапе се вклучени во речиси сите голови на екипата. Тој е играч за одлуки. Не потпишавме со Меси за да правиме шоу на секој натпревар. Секако дека сме поконкурентни со него. Тој може да го одлучи секој натпревар”, изјави Леонардо во интервју за француските медиуми. 

34-годишниот Аргентинец потпиша договор со ПСЖ изминатото лето откако не најде заеднички јазик со новиот претседателот на Барселона, Жоан Лапорта.

Барселона сака да го обнови договорот со својот 17-годишен играч од средниот ред Гави.

Според изворот, во блиска иднина каталонскиот клуб ќе му понуди на играчот нов петгодишен договор. Гави потекнува од школата на Барселона. Договорот на играчот од средниот ред со клубот е до јуни 2023 година. Според него, играчот добива плата еднаква на онаа што ја имал во резервниот тим на Каталонците. Според интернет порталот Трансфермаркт, пазарната вредност на играчот е 25 милиони евра.

Гави оваа сезона дебитираше за главниот тим на Барселона. Од сите натпрерварувања Гави учествуваше на 21 натпревар, постигна еден гол и три асистенции.

Филип Гачевски се врати во редовите на Вардар.

Вчера Гачевски потпиша тригодишен договор и изрази големо задоволство за враќањето во Вардар.

“Огромна чест, задоволство и мотив ми претставува враќањето во Вардар. Цврсто верувам во овој нов проект на клубот и доаѓам со цел да помогнам што поскоро да се вратиме на местото кое ни припаѓа, во самиот врв на Македонскиот фудбал. Посебна благодарност до управата на клубот, до сопственикот Слободан Крстевски и спортскиот директор Александар Бајевски со кои лесно најдовме заеднички јазик, цели и амбиции. Со нетрпение го очекувам продолжетокот на првенството повторно да заиграм пред пред најдобрите навивачи Комити“, изјави Гачевски.

Емил Форсберг ќе биде надвор од терените околу два месеци поради повреда на бутот.

Шведскиот играч беше заменет за време на натпреварот на Лајпциг против Арминија Билефилд (0-2).

„Играчот се пожали на болка во колкот, дополнителните тестови покажаа оштетување на левиот бутен мускул во пределот на колкот. Сега Емил ќе пропушти најмалку 8 недели“, објавија на официјалниот сајт на клубот.

Сезонава Емил Форсберг одигра 25 натпревари за Лајпциг во сите натпреварувања, шест пати постигна гол и двапати асистираше на своите соиграчи. Швеѓанецот настапува за германскиот клуб од 2015 година кога се пресели од Малме. По 17 кола Лајпциг со 22 бода е на 10. место во Бундеслигата. На 8 јануари, избраниците на Доменико Тедеско ќе гостуваат на Мајнц.

Матијас де Лихт би можел да го напушти Јувентус следното лето. 

Менаџерот на играчот, Мино Рајола, во изјава за медиумите во Италија кажа дека холандскиот дефанзивец е „подготвен за нов чекор“ во кариерата, после трите години поминати во редовите на „старата дама“.

Како најзинтересиран клуб за услугите на 21-годишниот фудбалер, се споменува лондонски Челзи, кој на крајот од сезонава може да остане без услугите на Рудигер и Кристенсен кои најавуваат дека немаат намера да ги продолжат договорите и да останат во Челзи.

Извршниот директор на Борусија Дортмунд, Ханс-Јоаким Вацке, официјално ја потврди веста дека Реал Мадрид е најзаинтересираниот клуб за купување на напаѓачот, Ерлинг Халанд.

„Каде и да погледнете денес, има голем број на информации поврзани за евентуален трансфер на Халанд. Единствено што знам со сигурност е дека Реал Мадрид има голем интерес за него. Пред неколку дена имав добар разговор со менаџерот на Ерлинг,Мино Рајола. Тоа беше пријателски разговор и без сомнение ќе разговараме повторно во наредните недели. Ако има и најмали шанси ние како клуб ќе направиме се за тој да остане во Дортмунд. Лично мислам дека би било добро да остане во Бундеслигата некое време, но Рајола е паметен човек и знае што е најдобро за неговиот клиент“, изјави претседателот Вацке.

Клубовите кои се натпреваруваат во англиската Премиер лига, денес ќе одржат вонреден состанок на кој ќе се разговара за евентуален прекин на натпреварите за време на божиќниот период поради зголемениот број на позитивни случаи од Ковид-19 во екипите.

 Во последното првенствено коло од вкупно десет предвидени натпревари, шест беа одложени поради зголемената бројка на новозаразени од коронавирусот.

Според информациите од Англија, клубовите ќе побараат да се одложат натпреварите закажани за 28, 29 и 30 декември.