Екипата на Арсенал ќе се насочи кон доведување на напаѓачот од Евертон, Доминик Калверт-Левин.

Репрезентативецот на Англија беше доведуван во врска со премин во Арсенал и во текот на летото но од разни причини трансферот не се реализира.

Тренерот на тимот од Лондон, во центарфорот на Евертон гледа идеална замена за Александар Лаказет кој е во последната година од договорот и се очекува да го напушти клубот во јуни.

Од Евертон стигнуваат информации дека за евентуална продажба на Калверт-Левин тие ќе одредат цена од 60 милиони фунти.

24-годишниот напаѓач ја отвори сезонава во одлична форма но набрзо заработи повреда од која сеуште се опоравува.

Тренерот на фудбалерите на Манчестер Сити, Пеп Гвардиола, ги негира шпекулациите дека „граѓаните“ преговараат со напаѓачот, Дани Олмо.

„Не, не сме во преговори со Олмо. Тој е фантастичен играч и сегашен член на Лајпциг“, изјави шпанскиот стратег.

Олмо има договор со германскиот состав до летото во 2024 година. Тој во претходната година го напушти Динамо Загреб и 22 милиони евра се пресели во Бундеслигата. Неговата трансферна сума на пазарот се движи околу педесет милиони евра.

Медиумите од Англија ја пренесуваат веста дека Ливерпул сака да го види во своите редови, играчот на Наполи, Фабиан Руиз.

Наводно, игрите на Руиз веќе подолг период се следени од тренерот Јирген Клоп и големи се шансите во јануари, Ливерпул да испрати официјална понуда за играчот која би изнесувала околу 45 милиони евра.

Договорот на 25-годишниот репрезентативец на Шпанија со Наполи е со важност до јуни 2023 година.

Голем интерес за Фабиан Руиз освен Ливерпул, покажуваат и најдобрите шпански екипи, Реал Мадрид и Барселона.

Арон Рамзи пристигна во Јувентус како големо засилување, но не ги оправда во целост очекувањата во Торино.

Рамзи е еден од најплатените фудбалери во тимот, па Јувентус сака да се ослободи од неговата висока плата.

„Газета дело Спорт“ пренесува дека Велшанецот е на излезни врати и веќе во јануари може да си замине од Јувентус.

За Рамзи интерес покажуваат неколку клубови од Премиер лигата, но најконкретен е Њукасл, кој веќе започнал преговори со неговиот агент.

Тренерот на Евертон, Рафаел Бенитез доби целосна поддршка од раководството на клубот пред натпреварот со Арсенал.

На состанокот кој го одржа управниот одбор на клубот, се донесе одлука со која му се дава поддршка на Бенитез за неговата идна работа. Членовите на одборот одлучија да му врачат отказ само на спортскиот директор на клубот, Марсел Брандс.

Популарните„карамели“ се во серија од осум натпревари без победа, а минатата недела на домашен терен загубија од градскиот ривал Ливерпул со 1:4.

 Серијата на лоши резултати го доведе тимот на 16. место од табелата во Премиер лигата, на само 5 бода од зоната за испаѓање.

Од Евертон соопштија дека ќе направат детална анализа на се што се случува во клубот и да се видат кои се долгорочните цели на екипата.

Тренерот на Барселона, Чави Ернандез, нема да може да рачуна на услугите од младиот Ансу Фати за натпреварот во Лигата на шампионите против Баерн Минхен. Од медицинскиот тим на каталонците потврдија дека Фати нема да биде спремен за настап и подобро е да не се ризикува со негово ангажирање на теренот.

Гостувањето на „Алианц Арена“ може да се испостави како клучно за понатамошното учество на Барселона во Лигата на шампиони. Тие мораат да победат ако сакаат да не зависат од резултатот на натпреварот помеѓу Бенфика и Динамо Киев. Шпанскиот клуб има 2 бода повеќе од Бенфика која е директен конкурент за втората позиција во групата.

Луис Суарез и Лео Меси беа еден од најдобрите тандеми во историјата на Барселона, а надвор од терените важат за големи пријатели.

Суарез, кој моментално настапува за Атлетико, откри дека Меси му се доверил за тоа кој му е најголемиот проблем во Париз.

„Нашиот однос е ист како кога игравме во Барселона. Секојдневно зборуваме за натпреварите, семејствата и слично. Ми кажа дека се уште не се адаптирал во Франција и има посебен проблем кога игра на екстремен студ или снег. Му треба време да се навикне на времето во Париз и Франција бидејќи во Барселона е многу потопло во текот на годината“, откри Суарез.

Најдобриот фудбалер во светот не игра на своето препознатливо ниво во ПСЖ и од почетокот на сезоната има постигнато само четири гола.

Германскиот судија Феликс Брих утре ќе ја заврши својата меѓународна судиска кариера. Тој по рекорден 70-ти пат ќе ја дели правдата во Лигата на шампионите на дуелот од 6. коло од групната фаза што ќе го одиграат Реал Мадрид и Интер.

46-годишниот Брих, сепак, нема да заврши со својата судиска работа, затоа што ќе продолжи да суди во Германија.

Фудбалскиот клуб Милан ќе настапи без Тео Ернандез и Рафаел Леао на дуелот против Ливерпул во рамките на 6.коло од групната фаза во Лигата на шампиони.

31-годишниот Ернандез натпреварот ќе го пропушти поради болест, додека неговиот клупски колега Рафаел Леао нема да настапи поради повреда која ја заработи на натпреварот со Салернтитана  во Серија А.

Дуелот помеѓу Милан и Ливерпул ќе се игра на 7 декември и е последен натпревар од групната фаза.

Лидер на Б групата е Ливерпул со 13 бода и тој веќе обезбеди учество во наредната фаза. Втор е Порто со 5 бода а екипата на Милан се наоѓа на третата позиција со освоени 4 бодови.