Спрема пишувањата на шпански „АС“, во Реал Мадрид се повеќе од сигурни дека Килијан Мбапе ќе биде нивни играч следната сезона.

Причината за ваквото верување лежи во фактот дека Мбапе веќе му дал ветување на претседателот Перез дека Мадрид е негова следна дестинација.

„Кралскиот клуб“ се обиде да го доведе Мбапе уште во текот на изминатото лето, но нивната понуда тешка 180 милиони евра беше одбиена од челниците на Париз Сен Жермен.

Килијан Мбапе за помалку од еден месец ќе има право за преговори со заинтересираните клубови и да потпише пред договор со некој од нив.

Тој повеќе пати има истакнато дека Реал Мадрид е негова следна цел и дека таму ќе може да го покаже својот целосен играчки капацитет.

Манчестер Сити е последниот клуб кој се вклучи во битката за потписот на Душан Влаховиќ, пренесуваат англиските медиуми.

Влаховиќ има договор со Фиорентина до 2023 година, но откако одби да го продолжи договорот, јасно е дека ќе биде продаден. 21-годишниот напаѓач моментално е прв стрелец во Серија А и е на мета на многу европски гиганти, а сега во трката за неговиот потпис се вклучи и Манчестер Сити.

Гвардиола е во потрага по квалитетен напаѓач, а со оглед на фактот дека тешко ќе може да дојде до потписот на Кејн, сега се насочува кон Влаховиќ.

Баерн Минхен би можел да остане без уште еден важен фудбалер, кој одбил да ја продолжи соработката со германскиот гигант и сака нов предизвик далеку од Премиер лигата.

Meдиумите шпекулираат дека Серж Гнабри би можел да ги следи стапките на неговиот соиграч од Баерн кој потпиша за Реал Мадрид, Давид Алаба.

Австриецот минатото лето потпиша за Реал и дојде како слободен фудбалер, додека Гнабри има договор до 2023 година, но не сака да ја продолжи соработката.

Тоа значи дека Реал би можел да испрати понуда за Гнабри, а Баерн за неговиот трансфер ќе бара околу 60 милиони евра, а тоа е подобро отколку да останат без него и без пари.

Екипата на Јувентус би го продала Дејан Кулушевски на тим од Премиер лигата доколку до нив пристигне прифатлива понуда.

Шведскиот репрезентативец со македонски корени, подолг период прикажува лоши игри во дресот на Јуве и не би имал ништо против да замине во клуб каде би играл на својата преферирана позиција како класичен центарфор.

Наводна заинтересираност за Кулушевски има од премиерлигашите Арсенал и Тотенхем кои би сакале да го доведат веќе во јануари.

Жоан Лапорта зборуваше за текот на преговорите околу новиот договор на Осман Дембеле. Барселона прави се за да го задржи Французинот, а Лапорта смета дека Дембеле е подобар од Мбапе.

„Дембеле сака да остане и јас го знам тоа бидејќи со него имаме одлични односи. За мене тој е клучен фудбалер и сакам да остане тука. Според мене Демебеле е подобар од Килијан Мбапе. Неговите агенти мислат за најдоброто за играчот, а многу често тоа не се парите“, изјави Лапорта.

„Феран Торес? Неговото име е опција, како и многу други. Во постојан контакт сум со луѓето задолжени за трансфери и се работи на неколку имиња“, потврди Лапорта.

Новиот тренер на Манчестер Јунајтед се соочува со првите проблеми пред неговото деби во Премиер лигата. 

Ѕвездата на Манчестер Јунајтед, Кристијано Роналдо е под знак прашалник за настап на натпреварот против Кристал Палас на Олд Трафорд.

Португалецот осетил болки во коленото после победата со 3:2 во дербито со Арсенал. Извори од Јунајтед тврдат дека тој најверојатно се повредил при прославата на својот гол кој го постигна од пенал. Роналдо беше заменет во 88.минута од средбата и веднаш се упати кон соблекувалната. Нема подетални информации дали се работи за нешто посериозно или замената беше од превентивен карактер.

Германецот Рангник даде свое мислење за Кристијано Роналдо и неговата улога во тимот. „Секогаш треба да го приспособиш својот стил кон играч како Кристијано, тој е неверојатен, врвен професионалец. Досега не сум видел играч во негови години со таква физичка форма. Мораме да го развиеме целиот тим, не само него. Играме во најсилната лига во светот и сите негови соиграчи ќе мора да го сторат истото како него“, изјави Рангник.

Од фудбалскиот клуб Милан преку соопштение информираат дека над играчот Симон Кјаер е извршена операција на коленото и ќе биде надвор од терените околу 6 месеци.

Данскиот играч од одбраната заработи повреда на вкрстените лигаменти во победата од 3:0 против екипата на Џенова.

Веднаш после операцијата, Кјаер се очекува да започне со интензивна рехабилитација за што поскоро враќање на фудбалскиот терен.

Тренерот Стефано Пиоли призна дека е можно клубот во јануари да доведе замена за 32-годишниот дефанзивец.

По најавите во медиумите дека постои можност Барселона да го продаде својот играч од средината на теренот, Френки Де Јонг, со своја реакција се јави и тренерот Чави Ернандез.

„Клубот ќе се обиде да доведе засилувања во зимскиот преоден рок, меѓутоа во моментот не планираме продажба на никој од нашите играчи, а посебно не на Френки Де Јонг. Тој не е на продажба и нема да го напушти клубот“, потрди Чави.

Како најзаинтересирани клубови кои го посакуваат младиот Холанѓанец во своите тимови, се споменуваат градските ривали од Манчестер, екипите на Јунајтед и Сити.

Шампионот на Ла Лига, Атлетико Мадрид започна преговори со голманот на екипата,Јан Облак. Челниците на шпанскиот тим имаат намера да потпишат нов долгорочен договор со словенечкиот голман.

Актуелниот договор на Облак со Атлетико е со важност до јуни 2023, и со сигурност клубот ќе му понуди продолжување на истиот под подобрени финансиски услови. Проценетата вредност на голманот според Трансфермаркт изнесува 70 милиони евра.

27-годишниот Словенец, оваа сезона одигра 19 натпревари на кои прими 21 гол.

Во Реал Мадрид е планирано големо преструктуирање на тимот. Кралскиот клуб има намера да го ангажира Ерлинг Халанд од Борусија Дортмунд или Килијан Мбапе од ПСЖ.

Во овој случај, Карим Бензема ќе биде пред заминување од Реал Мадрид. Ливерпул сака да ја искористи ситуацијата околу францускиот напаѓач, пренесуваат медиумите во Шпанија.

За Бензема интерес има од ПСЖ, кој му нуди на Реал Мадрид да го вклучи Карим во договорот со Мбапе. Но, претседателот на „кралскиот клуб“ Флорентино Перез не сака да им го даде на парижаните свој играч, бидејќи ги смета за директен конкурент на европската сцена.

Во оваа насока, Ливерпул води во трката за правото да потпише со Карим Бензема.