Манчестер Јунајтед преку официјално соопштение го потврди назначувањето на Ралф Рангник за привремен тренер кој ќе ги води „црвените ѓаволи“ до крајот на сезоната.

Од „Олд Трафорд“ пренесуваат дека германскиот стручњак останува во клубот и по завршувањето на сезоната, и во наредните две години ќе работи на позицијата консултант.

„Возбуден сум што станав дел од Манчестер Јунајтед и целосно сум фокусиран оваа сезона да биде успешна. Екипата располага со голем број таленти и ќе се обидам максимално да го искористам нивниот потенцијал, индивидуално и тимски“, изјави 63- годишниот Рангник.

Масимилиано Алегри се откажа од борбара за титулата и изјави дека целта на тимот оваа сезона е пласман во Топ 4. Јувентус загуби од Аталанта на домашен терен и додатно се оддалечи од врвот, а прилично засотанува и од четвртото место на табелата.

„Не ги користиме шансите кои ги создаваме. Аталанта имаше еден удар, ја искористи нашата грешка, и победи. Имаме многу добар состав, но некогаш тешко даваме голови. Постои анксиозност, играчите избрзуваат. Никогаш не сум сметал дека сме фаворити за титулата. Целта е да се избориме за Топ 4. Ако бидеме реални, и притисокот ќе се намали. Штом сме на оваа позиција после 14 кола, значи ова ни е нивото во моментов“, изјави Алегри.

Реал Мадрид во еден од најинтересните натпревари во шпанската Примера во 15. коло ја совлада Севиља со 2-1.

Рафа Мир ја доведе Севиља во водство во 12. минута, но 20 минути подоцна работите на почетокот ги врати Карим Бензема. Победничкиот гол за Реал Мадрид во 87. минута со одличен удар го постигна Винисиус Жуниор и така ги остави „кралевите“ на првата позиција на табелата.

Со вчерашниот гол Бензема влезе во историјата на Франција. Имено, ова му беше 361 гол во клупскиот фудбал со што се издвои на листата на француските фудбалери пред легендарниот Тиери Анри кој има 360.

295 голови Бензема постигна за Реал Мадрид, а преостанатите 66 во дресот на Лион од каде што во 2009 година дојде на „Сантијаго Бернабеу“.

За вечерва во Париз е закажана свечената церемонија за доделување на престижната фудбалска награда „Златна топка“.

Покрај доделувањето на главната награда во категоријата најдобар фудбалер, на свеченоста ќе бидат објавени и победниците во категориите за најдобра фудбалерка, најдобар голман и најдобар млад фудбалер до 21 година.

Фаворит број 1 за добивање на најпрестижната награда која ја доделува Франс Фудбал е аргентинецот Лионел Меси кој е рекордер со освоени 6 трофеи „Златна топка“. 

Главен конкурент на Меси се очекува да биде голгетерот на Баерн Минхен, Роберт Левандовски, додека како потенцијално изненадување се споменува италијанскиот репрезентативец и член на Челзи, Жоржињо.

Фудбалерот на Париз Сен Жермен, Нејмар, заработи повреда при крајот на дерби натпреварот против екипата на Сент Етјен кој заврши со победа на Парижаните со 3:1.

Бразилецот во 87.минута од натпреварот го свитка скочниот зглоб на левата нога и мораше на носилки да биде изведен надвор од теренот.

Од клубот од Париз сеуште нема официјална информација околу сериозноста на повредата и дали Нејмар ќе биде приморан да отсуствува во наредните натпревари на својот тим.

Водечките луѓе на Уругвајскиот фудбалски сојуз започнаа преговори со актуелниот тренер на Ривер Плата, Марсело Гаљардо, околу можноста за негово водење на репрезентацијата на Уругвај.

45-годишниот Аргентинец е избран како можен наследник на легендарниот Оскар Табарес кој неодамна беше разрешен од селекторското место. 

Табарес беше селектор на Уругвај повеќе од 15 години и под негово водство тимот играше полуфинале на Светското првенство во 2010 година, а во 2011 година беше победник на Копа Америка.

Неговиот потенцијален наследник, Марсело Гаљардо е поранешен фудбалер и актуелен тренер на Ривер Плата со кого пред неколку дена стана шампион на Аргентина. Неговиот договор со Ривер Плата истекува во 2022 година.

Дерби натпреварот помеѓу двете екипи од Солун, ПАОК и Арис, не го дочека својот крај бидејќи беше прекинат од страна на домашните навивачи.

Навивачите на ПАОК кои се познати по својата жестина во бодрењето на својот клуб, направија прекин на натпреварот после водството од 0:1 на Арис. Бесни од развојот на средбата и водството на гостите, тие почнаа со фрлање на пиротехнички средства на теренот по што судијата го прекина мечот. 

Следуваше интервенција и од полицијата која беше присутна на стадионот „Тумба“ во Солун но не успеа да се справи со лутите симпатизери на домаќините и средбата мораше да заврши.

Екипата на ПАОК е на третото место од првенствената табела во Грчката Супер лига со освоени 19 бода, 10 помалку од лидерот Олимпијакос.

Рафаел Варан ова лето се пресели во Манчестер Јунајтед од Реал Мадрид, но веќе сака да ја напушти Премиер лигата.

Имено, францускиот репрезнетативец не е задоволен на „Олд Трафорд“ и веќе му соопштил на својот агент да му бара нов клуб. Варан требаше да биде големо засилување за „црвените ѓаволи“, но сезоната за Јунајтед почна лошо. Притоа, Варан не е задоволен од животот во Англија.

Најсилен интерес за него покажува Интер, кој е спремен да го продаде Де Врај и да понуди 40 милиони евра за францускиот стопер.

Единствен проблем може да биде високата плата, па доколку Варан сака да се пресели во Милано, ќе мора да прифати намалување на платата.

Александар Лаказет, нема намера да ја продолжи кариерата во лондонски Арсенал. Според информациите објавени во Англија, фудбалерот веќе му дал зелено светло на својот агент да избере опции за летниот трансфер период.

„Се разбира, моите агенти почнуваат да ја разгледуваат опцијата. Како и да е, оваа тема нема да се покрене барем до јануари, сакам да бидам фокусиран на сопствената игра“– изјави фудбалерот во врска со евентуалниот трансфер.

Александар Лаказет игра за Арсенал од 2017 година. Во дресот на оваа екипа Французинот одигра 135 натпревари, на кои постигна 51 гол. Со доаѓањето на Микел Артета на тренерската позиција, Александар престана да биде во стартниот состав и да биде важен дел од ростерот. Претходно беше објавено дека интерес за Лаказет има од Атлетико Мадрид и Јувентус.

Палмеирас викендов го освои Копа Либертадорес, со што стана последниот учесник на претстојното клупско светско првенство.

Претходно, Челзи (Англија), Ал-Хилал (Саудиска Арабија), Ал-Али (Египет), Монтереј (Мексико), Оукленд Сити (Нов Зеланд) и Ал-Џазира (Катар) беа екипите кои имаа обезбедено настап во ова натпреварување.

Ждрепката за натпреварите ќе се одржи следниот понеделник на 29 ноември. Вреди да се напомене дека Челзи и Палмеирас турнирот ќе го започнат од полуфиналната фаза. Претстојното светско клупско првенство ќе се одржи во ОАЕ во јануари 2022 година.