Интер е спремен да го продаде Лаутаро Мартинез на лето.

Лаутаро е најплатен фудбалер во тимот, а Интер сака да ги намали трошоците и верува дека сега е идеален момент за продажба. Аргентинецот пред само неколку месеци потпиша договор до 2026 година, но Интер е спремен да го продаде поради финансиски проблеми.

Најсилен интерес за него покажува Манчестер Јунајтед, бидејќи приоритет на Тен Хаг ќе биде доведување на врвен напаѓач.

Во моментов Лаутаро е проценет на 75 милиони евра, сума која нема да биде проблем за „црвените ѓаволи“.

Бернардо Силва и понатаму настојува да ја промени средината на крајот на сезоната.

Португалецот минатото лето беше блиску до преселба во Барселона, но каталонскиот клуб се откажа од трансферот поради преголемата сума на пари што Сити ја бараше за обештетување. Манчестер Сити ова лето нема да му стои на патот и е спремен да го продаде доколку пристигне добра понуда.

Сега покрај Барселона, интерес за Португалецот покажува и ПСЖ, кој нема да жали пари да го доведе во Париз.

Бернардо Силва има големо искуство во Лига 1 каде одлично соработуваа со Килијан Мбапе во Монако.

Ансу Фати важеше за еден од најголемите таленти на „Ла Масија“, но има уште една слаба сезона за Барселона. Фати оваа сезона запиша само 16 настапи, но скоро сите беа само од клупите за резерви и вкупно на теренот помина околу 500 минути.

Агентот на Фати, Жорж Мендеш не е задоволен од третманот кој го има неговиот клиент во Барселона и веќе почнал да му бара нов клуб. Мендеш веќе го понудил Фати на четири клуба од Премиер лигата, меѓу нив и Манчестер Јунајтед, кој минатото лето покажа интерес за талентот.

На Барса и се потребни пари да ги среди финансиските документи и Фати изгледа како добра можност за солидна заработка.

Каталонскиот клуб е спремен да го продаде, а за неговата слобода бара 50 милиони евра.

Станува се поизвесно дека голем број играчи на Челзи ќе го напуштат клубот во претстојниот преоден рок. Сопственикот Тод Боли планира да го редуцира бројот на фудбалери во тимот, а новиот менаџер, кој најверојатно ќе биде Маурисио Покетино, веќе дал „зелено светло“ за продажба на дел од постоечкиот играчки кадар.

Мејсон Маунт е меѓу имињата што се очекува да заминат ова лето. Покрај него Челзи ќе се ослободи и од Рубен Лофтус-Чик и Тревох Чалоба, а голема е веројатноста за продажба и на Армандо Броја, кој е надвор од терените поради долготрајна повреда.

Рис Џејмс се поврзува со Реал Мадрид, а на излезна врата се и Кристијан Пулишиќ, Хаким Зијех, Пјер-Емерик Обамејанг, Едуард Менди, Кепа Аризабалага и Матео Ковачиќ.

Актуелниот тренер на германски Баер Леверкузен, Чаби Алонсо, според германскиот и холандскиот печат е еден од најсериозните кандидати за менаџерското место во англиски Тотенхем следната сезона.

За Алонсо не се заинтересирани само „мамузите“, но тие имаат предност во преговорите, велат добро упатени извори. Баер (Л) се обидува да го убеди Шпанецот да остане кај нив и следната сезона, но Германците се светсни дека доколку Тотенхем му понуди екстра приходи, Алонсо има огромна веројатност да си замине од „Бај Арената“.

Голманот на Баерн Минхен, Мануел Нојер планира за две до три недели да го започне првиот голмански тренинг по тешката повреда. 

Според информациите, Нојер за две до три недели сака да започне со лесни часови за трчање и специјални голмански вежби. Доколку нема потешкотии на овие тренинзи, голманот очекува да се врати на работа со тимот во јули за да се подготви за следната сезона. Тренерот на Баерн, Томас Тухел, смета на Нојер како главен голман во новата сезона.

Мануел Нојер се повреди по Светското првенство во Катар во 2022 година. Голманот ја скршил ногата додека се релаксирал во ски-центар.

Маркињос потпиша нов договор со Пари Сен Жермен. Договорот меѓу двете страни е до летото 2027 година.

Францускиот шампион ќе го објави договорот во подобро време за клубот, откако тимот од Лига 1 загуби со 3-1 дома од Лориен во неделата. Бразилскиот интернационалец е во Пари Сен Жермен од 2013 година, а претходно играше за италијанската Рома како и за Коринтијанс во својата татковина. 28-годишниот дефанзивец оваа сезона постигна два гола на 40 настапи во сите натпреварувања.

На пет кола пред крајот на сезоната, Пари Сен Жермен е на првото место на табелата во Лига 1 со 75 бодови. Второпласираната екипа на Олимпик Марсеј има пет бода помалку.

Фулам е блиску до договор за потпис на напаѓачот на Париз Сен Жермен, Мауро Икарди. Сумата на трансферот ќе биде околу 12 милиони евра. ПСЖ може да добие уште три милиони евра како различни бонуси. Преговорите меѓу Икарди и Фулам за договор стигнаа во завршна фаза.

Оваа сезона напаѓачот настапува за турски Галатасарај на позајмица. На 21 натпревар Икарди постигна 15 гола и осум асистенции.  Договорот на 30-годишниот аргентински напаѓач со ПСЖ е до јуни 2024 година, а за оваа екипа настапува од 2019 година.

Манчестер Јунајтед е заинтересиран за потписот на дефанзивецот на ПСЖ и Мароко, Ашраф Хакими. „Црвените ѓаволи“ биле пред Челзи во борбата за играчот. Лондонскиот клуб треба да вложи сериозни напори во блиска иднина за да обезбеди почитување на сите правила за финансиски фер-плеј. 

Сега Манчестер Јунајтед важи за главен фаворит за потписот на играчот.

Се дознава дека од „Олд Трафорд“ се подготвени да платат 60 милиони евра за Хакими.Таква сума би требало целосно да им одговара на газдите на ПСЖ. Парискиот клуб во неколку наврати јасно стави до знаење дека не е против продажба на мароканскиот дефанзивец во претстојниот преоден рок.

Оваа сезона Хакими забележа 37 настапи за ПСЖ во сите натпреварувања, во кои постигна четири гола и пет асистенции.