Јулијан Дракслер се повреди и отпадна од составот на германскиот национален тим за претстојните натпревари во ноември.

Четирикратните светски шампиони веќе се пласираа на Светското првенство во 2022 година, но имаат проблеми со составот пред натпреварот против Лихтенштајн во Волфсбург во четврток. Никлас Зуле е позитивен на коронавирус, а уште четворица играчи со кој бил во близок контакт веќе се ставени во карантин.

„Жал ми е за Дракслер“, изјави за медиумите селекторот, Ханзи Флик. Играчот од средниот ред на ПСЖ долго време нема играно за Германија, но нема да може да се врати во националниот тим поради повреда на мускулот.

Од германскиот тим поради проблеми со мускулите отпаднаа и Флоријан Вирц и Нико Шлотербек. Џонатан Та, Максимилијан Арнолд, Ридле Баку и Кевин Фоланд беа повикани од Флик. Натпреварот во четврток е збогување со поранешниот селектор на Германија, Јоаким Лев.

Работнички го именуваше Борче Христов за нов шеф на стручниот штаб. Тој потпиша договор до јануари 2023 година и го одржа првиот тренинг со тимот.

„Му посакуваме топло добредојде на Борче Христов на тренерската функција. Веруваме дека со неговото долгогодишно искуство ќе воведе новитети во работата со тимот и Работнички ќе се движи во позитивна насока. Сите заедно сме ќе бидеме во функција на светла иднина на клубот“, изјави спортскиот директор Горан Станковски.

Борче Христов ветува напорна работа и се надева дека многу брзо тимот ќе почне да функционира според неговите замисли.

„Сакам да се заблагодарам за довербата на раководството на клубот. Работнички е голем предизвик за мене, можам да ветам напорна работа. Тимот поседува голем потенцијал, млади и талентирани фудбалери и ќе се потрудиме да го развиваме во вистинска насока“, истакнува новиот шеф на стручниот штаб, Борче Христов.

Бекот на Атлетико Мадрид, Киран Трипиер подолг период ќе биде надвор од терените поради повреда на рамото, објавија од таборот на шпанскиот шампион преку официјалниот веб-сајт.

Тој се повреди на натпреварот со екипата на Валенсија кој заврши 3:3 и беше заменет во 8-та минута од средбата.

Англичанецот Трипиер ќе мора да оди на физикална терапија и дури потоа ќе се врати на тренинзите. Од мадридскиот клуб не наведуваат точни рокови за негово враќање на официјални натпревари.

Фудбалската репрезентација на Македонија, утре во 17 часот го игра претпоследниот натпревар од квалификацискиот циклус за настап на СП во Катар 2022, против селекцијата на Ерменија. Пред поаѓањето за Ереван, Енис Барди даде свое мислење за натпреварот и кажа дека навивачите треба да имаат трпение за нов успех со селекторот Милевски.

„После Европското првенство сите очекуваат повторно нешто големо, но ние мора да одиме од меч во меч. Со оваа сегашна генерација со новиот селектор со кој долго време се знаеме, а имаме и некои нови играчи, мора да сме трпеливи, зашто секој меч ни носи нешто ново, а ништо негативно, без оглед дали сме победиле или загубиле.Веројатно ќе решаваат ситници на утрешниот натпревар. Најважно е ние да сме подготвени и да знаеме што бараме на теренот “.

Со официјалното преземање на тренерската функција во Барселона, Чави Ернандез веднаш воведе и нови правила кои мора да ги почитуваат играчите и стручниот штаб на екипата од „Ноу Камп“.

1. Играчите треба да бидат во тренинг центарот час и половина пред започнување на тренинг сесиите.
2. Целиот стручен штаб треба да стигне на тренинг 2 часа пред почетокот на истиот.
3. Играчите мора да се хранат во тренинг центарот. Веќе нема опција играчите да јадат надвор од базата.
4. Се враќаат паричните казни за фудбалерите.
5. Казните ќе се дуплираат со секој нареден прекршок на играчот.
6. 48 часа пред почеток на натпревар, сите играчи треба да се во своите домови најдоцна до полноќ.
7. Ќе играат само оние кои најдобро тренираат и оние кои покажуваат најголема посветеност во работата. Останатите ќе бидат резерви или нема да бидат повикани на натпревар.
8. Контрола на дополнителните спортски активности кои би можеле да го нарушат настапот на играчот во неговата игра ќе ги анализира техничкиот оддел на стручниот штаб.
9. Забранети ризични активности како сурфање или возење електрични тротинети.
10. Добар изглед. Играчите треба да бидат пример за навивачите и мора секогаш да бидат пристојно облечени.

Тренерот на Рома, Жозе Мурињо,веќе имал направено листа со потенцијални засилувања за тимот во јануарскиот преоден рок.

Португалскиот стручњак размислува за доведување на 3 до 4 играчи кои би пристигнале во Рим. Мурињо ги посакува Рубенс Лофтус – Чик од Челзи и Хари Винкс од екипата на Тотенхем, како и играчот на Борусија Менхенгладбах, Денис Закарија.

Мурињо во неколку наврати од почетокот на сезоната изрази незадоволство од расположливиот играчки ростер во тимот и побара од управата на Рома поголеми вложувања во засилувања.

Спортскиот директор на Париз Сен Жермен, Леонардо, искажа незадоволство од фактот што селекторот на Аргентинската фудбалска репрезентација, Лионел Скалони, ги повика Лео Меси и Паредес да се приклучат на подготовките пред закажаните дуели против Уругвај и Бразил, во квалификациите за Мундијалот во Катар.

 Лионел Меси ги пропушти последните два меча на ПСЖ против РБ Лајпциг и Бордо поради непријатност и болки во коленото, но сега тој се приклучи на националниот тим и веќе одржа тренинг со останатите играчи. Од медицинскиот тим на Аргентина се оптимисти дека Меси ќе биде подготвен за настап на натпреварите против Уругвај и Бразил.