Според објавата во германските медиуми, германскиот клуб Штутгарт, за евентуална продажба на Дарко Чурлинов ќе бара три милиони евра. 

Македонскиот репрезентативец игра како позајмен играч во Шалке 04, кој изрази желба да го задржи во своите редови и по завршетокот на сезоната. Одличните игри на Чурлинов ја зголемија неговата пазарна вредност, и сега останува да се види дали Шалке ќе се одлучи да ги исплати потребните средства на Штутгарт кој има договор со фудбалерот до 2024 година.

Дефанзивецот на Наполи, Калиду Кулибали е на радарот на Јувентус, пренесe „Тутоспорт“. „Старата дама“ бара замена за Џорџо Киелини, кој се разделува со „бјанконерите“ по 17 години верна служба во клубот.

Кулибали веќе стекна доволно искуство со дресот на Наполи во Серија „А“, со тоа што договорот на Сенегалецот со „небесно сините“ истекува во летото 2023 година. Кулибали е трансфер цел и на шпанскиот гигант Барселона.

Сенегалецот настапува за Наполи од 2014 година, кога италијанскиот клуб го купи од белгиски Генк. Кулибали моментално е проценет на 45 милиони евра. 30-годишниот централен дефанзивец има три гола и три асистенции на 34 натпревари на сите турнири во сезоната 2021/22.

Ерик тен Хаг ја одржа првата прес-конференција како менаџер на Манчестер Јунајтед.

Во неa, Холанѓанецот зборуваше за мотивите за прифаќање на овој предизвик, потенцијалот на играчите кои моментално се во составот, а конкретно за улогата на големата ѕвезда Кристијано Роналдо и капитенот Хари Мегваер.

Поранешниот тренер на Ајакс вчера го гледаше поразот на Кристал Палас во последното коло во Премиер лигата, а од денеска и официјално почнува да ги извршува своите обврски.

Клубот потврди дека негови помошници ќе бидат Мичел ван дер Хаг и Стив Мекларен.

„Денес сум многу среќен што ве запознав и што сум овде. Бев пречекан многу топло од сите во клубот. Едвај чекам да се фатам за работа. Ова е веќе мојот дом и сакам да успеам овде. Имам добро чувство поради луѓето околу мене и средбите што ги имав со нив. Имаме план и целта е да го оствариме. Дали ни требаат нови играчи? Сè уште сум во процес на анализа. Сакам да работам со овие играчи. Минатата сезона овој тим заврши на второто место во Премиер лигата, па потенцијалот е огромен“, истакна тој.

Рафаел Леао одигра фантастична сезона со Милан и вчера беше избран за МВП на сезоната во Серија А.

Португалецот се етаблираше во еден од најдобрите млади фудбалери во Европа, па неколку европски гиганти веќе покажуваат силен интерес за неговиот потпис.

Сега во траката за неговиот потпис се вклучи и Реал Мадрид, откако стана јасно дека нема да успее да го донесе Мбапе.

Милан сака да го „блиндира“ со нов договор и му понудил тројно зголемување, па е спремен да ја одбие секоја понуда која ќе пристигне за Португалецот.

Сепак, италијанските медиуми пренесуваат дека Реал ќе се обиде да ги искористи добрите односи со Милан и спрема понуда која со бонуси може да достигне до 90 милиони евра.

После објавувањето на новиот договор на Килијан Мбапе се очекуваат многу промени во клубот кој ќе започнат веќе од утре.

Француските медиуми пренесуваат дека во понеделник ќе бидат објавени отказите на Маурицио Почетино и спортскиот директор Леонардо.

„Леонардо ќе биде прв кој ќе го напушти ПСЖ и веќе се бара негова замена, а следен е Почетино“, објави познатиот новинар Фабрицио Романо.

Мбапе добил ветување од раководството на клубот дека ќе решава за важни прашања на клубот, па така ќе има главна улога и при ангажирање на фудбалери, но и тренер.

Најголема желба на раководството, но и на Мбапе е ангажман на Зинедин Зидан, а за нов спортски директор најверојатно ќе биде назначен Луис Кампос.

Екипата на Милан заслужено го прославува освојувањето на Скудетото иако на почетокот од сезоната не им се даваа големи шанси. Меѓутоа, росонерите ги демантираа прогнозите и на крајот заслужено се радуваат на титулата које е прва после 11 години.

Главниот оперативец на клубот, легендарниот Паоло Малдини успеа да направи вистинско чудо со ограничен финансиски буџет. Сега нова цел ќе биде одбрана на титулата и играње значајна улога во Лигата на шампионите.

Клубот во наредните месеци ќе биде купен од инвестицискиот фонд Ред Бирд Капитал за сума од 1,3 милијарди евра.

Приоритетни трансфери за следната сезона се тандемот на Лил, дефанзивецогт Свен Ботман како и Португалецот Ренато Санчез, кој е замената на Кеси. Во нападот на тимот најверојатно ќе се приклучи и Дивок Ориги од Ливерпул.

„Ова е само почеток на нашиот пат“, изјави Малдини за време на големата прослава со навивачите на клубот.

Германскиот првак Баерн денес го потврди новиот договор со Мануел Нојер. 36-годишниот капитен на германските шампиони потпиша нова соработка со Баварците која ќе трае заклучно со 2024 година.

Мануел Нојер со Баерн има освоено десет титули на Германија, пет купови и шестпати стана освојувач на Суперкупот. По двапати ја освои и Лигата на шампионите, Светското клупско првенство и Суперкупот на Европа.

Еден ден после завршетокот на Премиер лигата, фудбалскиот клуб Ливерпул, преку своите социјални мрежи ја објави информацијата дека Фабио Карваљо и официјално е нов фудбалер на „црвените“.

Младинскиот репрезентативец на Португалија, ќе се приклучи на тимот предводен од Јирген Клоп на 1.јули. Карваљо е роден во Лисабон, но стана член на фудбалската академија на Фулам, клуб за кој настапуваше во англискиот Чемпионшип. Тој е прогласен за најдобар млад играч во лигата, и сезонава постигна 10 гола и осум асистенции.

Французинот во дресот на Монако, Орилиен Чуамени летово го напушта клубот. Медиумите известуваат дека тој ги договорил личните услови со гигантите Реал Мадрид и Ливерпул.

Сега останува клубовите да започнат официјални преговори за откуп на неговиот договор. Чуамени се надева дека ќе има можност за игра како во Реал така и во Ливерпул, бидејќи и двата тима во средината имаат фудбалери кои се во поодминати години, а младиот француски фудбалер би бил одлична поддршка и нивна замена.

Трансферот на Чуамени се очекува да достигне сума од 80 милиони евра

Тренерот на Барселона, Чави Хрнандез, синоќа ги сумираше резултатите од мечот со Виљареал во Примера кој неговиот тим го загуби со 2-0, како и од целокупниот настап во сезоната во шпанската лига.

„Игравме добро во првото полувреме, имавме шанси и моравме да постигнеме гол. Но, дозволивме две индивидуални грешки. После тоа, моравме да ги сведеме грешките на минимум. Не ја завршивме сезоната на најдобар начин. Таа ни остави тежок товар, но сега можеме да се опуштиме и да бидеме концентрирани. Направивме големи морални напори. Можеме да бидеме задоволни, но не и среќни. Но, генерално, резултатите не можат да се сметаат за негативни. Во ноември бевме на дното, но на крајот ја завршивме сезоната втори. Фудбалот заврши, работата почнува во канцеларијата. Треба многу да се смени за да бидеме поконкурентни и да се бориме за трофеи“, рече Чави.