Поранешната светска шампионка во биатлон Симон осудена поради кражба
Француската биатлонка Жилија Симон е прогласена за виновна за кражба и измама со кредитни картички и осудена на условна казна затвор од три месеци, пресуди денеска францускиот суд, со што го доведе во прашање нејзиното учество на Зимските олимписки игри во февруари идната година.
Симон беше обвинета дека повеќе пати ги користела банкарските картички на нејзината колешка Жистин Бреза-Буше и на еден член на стручниот штаб на тимот за онлајн купувања во вкупен износ од повеќе од 2.000 евра.
„Не можам да дадам објаснување. Не се сеќавам дека сум го направила тоа. Ни самата не разбирам“, рече Симон за време на судењето.
Според локалните медиуми, за време на сослушувањето, Симон ги признала кражбите и им се извинила на жртвите, а покрај условната казна, била и парично казнета со 15.000 евра.
Француската скијачка федерација објави дека ја зема предвид одлуката на судот и дека дисциплинската комисија ќе се состане што е можно поскоро „за да утврди можни мерки на ниво на Федерацијата“.
Симон освои во кариерата десет светски титули, како и сребрен олимписки медал во мешаната штафета на Игрите во Пекинг во 2022 година.
Пораз на македонските фудбалерки од Русија
Македонската женска фудбалска репрезентација загуби денеска од Русија со 2-0 во првиот од двата контролни натпревари кои двете селекции ќе ги одиграат во Струмица.
Русија дојде во водство на стадионот „Младост“ во 10 минута со голот на Полина Јукљаева, а конечниот резултат го постави Азалија Залмиева во судиското продолжение.
Претходно денеска, на стадионот „Кукуш“ во Турново контролен натпревар одиграа и женските репрезентации на двете земји до 19 години, што заврши со победа на Русија од 2-1.
Вториот натпревар меѓу македонската и руската репрезентација е закажан за 27 ноември, а истиот ден во Турново по втор пат ќе се сретнат и селекциите до 19 години.
На 4. ноември во Нион, македонската женска репрезентација ќе ги дознае противничките селекции во групата од новите квалификации за пласман на Европско првенство.
Кил го продолжи договорот со Филип Јиха
Актуелниот освојувач на Германскиот Куп во ракомет, Кил, ја официјализираше најважната одлука за својата блиска иднина.
Главниот тренер Филип Јиха и раководството на „Зебрите“ постигнаа договор за продолжување на соработката, со што договорот на чешкиот стратег е пролонгиран за уште две години, односно до летото 2028 година.
Оваа одлука претставува јасен сигнал дека клубот е целосно посветен на визијата за враќање на апсолутниот врв на европскиот ракомет преку континуитет и развој на младиот тим.
Магдебург плаќа обештетување за Доминик Кузмановиќ
Европскиот ракометен шампион Магдебург е подготвен да плати 600.000 евра за да го доведе хрватскиот репрезентативен голман Доминик Кузмановиќ од Гумерсбах, пренесува „Спорт Билд“.
Магдебург активно бара замена за Сергеј Ернандес, кој ќе го напушти клубот по завршувањето на сезоната, а 23-годишниот Кузмановиќ се смета за главен кандидат да ја засили голманската позиција.
Хрватот се пресели во Гумерсбах во 2024 година и има договор до летото 2028 година.
Сепак, интересот од актуелниот европски шампион би можел да доведе до преговори за потенцијален трансфер, иако клубот од Гумерсбах засега не се изјаснил официјално.
Маркизио: Овој Јуве нема лидери во своите редови
Клаудио Маркизио повторно јавно проговори за ситуацијата во Јувентус. Седумкратниот шампион со торинскиот гигант е загрижен поради лошата форма на тимот кој уште од средината на септември не знае за победа и се наоѓа надвор од местата кои водат во европските купови.
Поранешниот играч од средниот ред целосно се согласува со тренерот Игор Тудор кој претходно посочи дека во тимот недостасуваат вистински водачи. Маркизио вели:
„На Јувентус му недостасуваат лидери, и на теренот и надвор од него. Исто така, им недостасува силна структура. Тудор има потреба од доверба бидејќи добро ја познава ситуацијата и беше одличен поранешен играч на Јувентус. Сепак, нема оправдување за календарот. Во Мадрид, тимот реагираше прекрасно, иако резултатот на крајот не беше добар“ изјави Маркизио.
Јувентус се наоѓа под голем притисок и многу е јасно дека мора да го пронајде вистинскиот одговор за да се врати на посакуваното ниво.
Атлетико Мадрид продаден за две милијарди евра на американски фонд
Пиринејскиот Полуостров е на нозе, постигнат е еден од најважните договори во историјата на шпанскиот фудбал.
Локалниот дневен весник „Возпопули“, кој главно се занимава со политички, економски, финансиски прашања и теми од банкарскиот сектор, објави дека Мигел Анхел Хил Марин, генерален менаџер и клучен акционер на Атлетико Мадрид, постигнал договор за продажба на клубот за рекордна сума од над две милијарди евра.
Атлетико Мадрид ќе биде во мнозинска сопственост на американскиот инвестициски фонд „Аполо“, кој минатата година официјално управуваше со средства вредни над 700.000.000.000 долари.
Целиот договор треба да биде официјализиран во јануари следната година, но точниот датум или рамка за затворање на договорот ќе зависи и од другите партнери, пред сè од фондот „Арес Менаџмент“, кој е создаден од луѓе од „Аполо“, како и од фондот „Квантум Пацифик Груп“, кој е поддржан од израелскиот милијардер Идан Офер, инаку газда на кошаркарскиот клуб Хапоел од тел Авив.
Според информациите на споменатиот извор, крајниот рок за завршување на преговорите бил средината на октомври, но по договорот на сите страни, било одлучено да се помести, со оглед на тоа што е постигнат голем напредок. Претставници на американскиот фонд беа во Мадрид претходните денови за да ги договорат сите детали од договорот.
Милан едвај извлече реми со новајлијата Пиза
Фудбалерите на Милан и Пиза одиграа нерешено 2-2 во првиот натпревар од осмото коло во Серија А.
Росонерите пропуштија одлична шанса да ја задржат лидерската позиција во дуелот со екипа која е во зоната за испаѓање. Вака Милан, со натпревар повече има два бода повеќе од Интер, Наполи и Рома
Дуелот започна според планот на Масимилијано Алегри. Рафаел Леао го доведе Милан во водство по седум минути.
Сепак, аутсајдерот не се предаде. Прво, во 60-та минута, колумбискиот ветеран Хуан Квардадо израмни од пенал, а во 86-та минута Нзола го шокира „Сан Сиро“.
Милан од пораз го спаси дефанзивецот Атекаме, златната резерва на Алегри, со нерезонски удар од 23 метри во 93-та минута.
Мојсов поднесе оставка по непредвидениот пораз од Арсими
Фудбалерите на Тиквеш ќе ја продолжат сезоната во Првата македонска фудбалска лига (ПМФЛ) со нов тренер, откако клупското раководство вечерва ја прифати оставката на досегашниот шеф на стручниот штаб Ѓорѓи Мојсов.
Оставката на Мојсов по денешниот пораз на Тиквеш во Кавадарци од Арсими со 4-3 во рамки на 10 коло во ПМФЛ.
„По денешниот пораз, управата на клубот ја прифати оставката на стручниот штаб предводен од тренерот Ѓорѓи Мојсов, помошниот тренер Христијан Кировски и кондициониот тренер Трајче Орешков, како резултат на неочекувано слабите резултати оваа сезона. Им се заблагодаруваме за долгогодишниот ангажман во ГФК Тиквеш, особено на Мојсов и Орешков со кои клубот го постигна историскиот успех и им посакуваме успех во нивните кариери“, се наведува во клупското соопштение.
По десет одиграни кола, Тиквеш е деветтото пласиран на табелата со осум бодови, пред следниот дуел против Пелистер на 30 ноември на гостински терен.
Во соопштението на кавадаречкиот прволигаш се наведува дека „клубот е во преговори за ангажман на нов стручен штаб кој ќе го предводи клубот во иднина“.
Маратонот против Маџари со „хепиенд“ за Пелистер
Пелистер ја забележа и третата победа во низа од стартот на Супер-лигата, многу потешко од очекувањата откако битолчани по голема битка славеа над Маџари со 101-90. Конечниот триумф делува убедливо, но беше извојуван по маратонска битка и две продолженија, за на крајот да биде скршен отпорот на гостинскиот состав и „пелистерци“ да го задржат стопроцентниот ефект од стартот на сезоната во македонскиот шампионат.
„Пелистерци“ заспани влегоа во мечот, па гостите од Скопје набрзина стигнаа до водство од 0-8. Митревски ги постигна првите поени за битолчани, но по серијата од три реализации на Хот тимот на Маџари поведе со 5-15. Тајмаутот на Даскаловски за момент го разбуди Пелистер, следеше серија од осум поени на битолскиот тим, но по тајмаутот што следеше од гостинскиот тренер Маџари повторно влезе во ритам и ја заврши четвртината со 14-25, со тројката на Хот.
Гостите стигнаа и д 14-27 на самиот старт од втората четвртина, Стајиќ и Прајс погодија во серија, но Пелистер се мачеше да се врати во мечот, па тренерот Даскаловски беше принуден да побара нов тајмаут при 25-36 (15. Минута). Прајс погоди уште една тројка, но проблемите на Пелистер продолжија и битолчани заминаа на одмор со двоцифрена негатива од 33-45.
Пелистер подобро го отвори второто полувреме, експресно намалувајќи на 40-46, а потоа и не користејќи два напади за целосно враќање во мечот. „Зелено-белите“ продолжија со далеку подобра игра отколку во првиот дел, намалувајќи и на 51-54, а потоа и на 53-54 по положувањето на Лука Стојановски, по што гостинскиот тренер побара тајмаут. Крстевски од контранапад донесе прво водство на Пелистер на мечот (30. Минута, 59-58), резултат со кој воедно се влезе и во последната четвртина.
„Пелистеци“ набрзина поведоа и со 64-59, но Маџари не се предаде и израмни на 64-64. Повторно дојде до криза во играта на домашниот тим, што гостите од Скопје го искористија за да поведат и во последните три минути да влезат со водсво од 67-71. Стајиќ постигна важна тројка за Пелистер, а потоа по серијата грешки на двете страни Миревски донесе израмнување од 73-73 на една минута до крајот. Двата тима беа непрецизни во завршната минута, па победникот мораше да биде решен со продолжение.
Пелистер беше на чекор до победа водејќи со 83-79 на помалку од 30 секунди до крајот, н гостите постигнаа пет поени за помалку од десет секунди, па „зелено-белите“ од линијата за слободни фрлања преку Дејвис се изборија и за второ продолжение. Отпорот на гостите конечно беше скршен во второто продолжение што беше отворено со серија од 7-0, трасирајќи си го патот до победата изразена со конечните 101-90.
Прајс беше прв стрелец на Пелистер и на овој меч постигнувајќи 24 поени, Вилсон имаше дабл-дабл од 17 поени и 14 скокови, Стајиќ имаше 16 поени, а Брејси Дејвис дабл-дабл од 14 поени и 10 скокови.
Пеколниот ритам на натпревари на Пелистер продолжува веќе в недела, со новиот домашен меч од Супер-лигата во кој за противник ќе го имаме тимот на Феникс.
Конрад Лајмер добива нов договор во Минхен
Баерн размислува да му понуди нов договор на еден од своите најстабилни играчи, Конрад Лајмер, објави „Билд“. Тековниот договор на Австриецот е до летото 2027 година.
Првичните разговори меѓу двете страни се одржани, но сè уште нема писмена понуда од Баварците за 28-годишникот. Преговорите наскоро ќе бидат забрзани и се очекува договор до крајот на годината.
Баерн го потпиша Конрад Лајмер во летото 2023 година како слободен трансфер од РБ Лајпциг. Австриецот се етаблираше како еден од најважните играчи во тимот на Винсент Компани. Најчесто се користи како десен бек, но може да игра и лево од одбраната и како играч од средниот ред.
Оваа сезона има 12 натпревари во кои постигнал еден гол и направи пет асистенции.
