Јувентус покажува силен интерес за голманот на Челзи, Кепа Аризабалага, пренесуваат италијанските медиуми.

„Старата дама“ бара замена за Шчесни и планира да испрати понуда за 27-годишниот шпански голман.

Кепа е најскапиот голман во светот, но во Челзи го загуби местото во стартниот тим и моментално е резерва на Менди.

Кепа има договор со Челзи уште четири години, но и самиот сака да ја промени средината.

Серхио Бускетс смета дека резултатот во Ел Класико не ја дава вистинската слика на прикажаното. Реал Мадрид победи на Камп Ноу со 2:1, а Бускетс особено ја остакна играта на двајца фудбалери на „кралскиот“ клуб.

„Не мислам дека одигравме слаб меч, сметам дека поразот не е заслужен. Резултатот не одговара на покажаното. Знаевме дека ќе ни остават простор со топката, но со Винисиус и Родриго се многу брзи и ни правеа штета при контрите. Доста добро ги контролиравме, но доволно е еднаш да не го направите тоа и примате гол. Тоа менува се и комплетно го промени текот на мечот. Не заслуживме да загубиме, но таков е фудбалот“, додаде капитенот на Каталонците.

Џошуа Кимих е една од големите фудбалски ѕвезди, кои засега одбиваат да се вакцинираат во обидот да бидат позаштитени од вирусот ковид-19.

Фудбалерот на Баерн Минхен јавно зборувал за својата одлука и зошто засега одбива вакцина.

„Одбив да се вакцинирам затоа што не сум сигурен дека се доволно испитани и безбедни. Свесен сум за мојата одговорност, ги почитувам хигиенските мерки, а на секои два-три дена се тестираме за вирусот. Но, мора да кажам дека не сум од оние кои не ја признаваат опасноста од вирусот, ниту пак сум анти-ваксер. Исто така не велам категорично дека нема да се вакцинирам, постојат реални шанси тоа да се случи во иднина“, рекол Кимих.

Легендата на Арсенал и на холандската репрезентација, Марк Овермарс, започна преговори со екипата на Њукасл за местото фудбалски директор, пренесува англискиот “Мирор“.

Холанѓанецот Овермарс, е високо ценет во светот на фудбалот, благодарение на неговите играчки денови во екипата на Арсенал и на позицијата шеф за развој и регрутирање на млади таленти во Ајакс од Амстердам.

Дони ван де Бек е уморен од чекање шанса да се пробие во првиот тим на „црвените ѓаволи“. 24-годишниот Холанѓанец веќе бара нов клуб за продолжување на кариерата. Интересно, тој се сврте кон Реал Мадрид, тврдат одредени медиуми во Англија.

Ван де Бек никогаш не можеше да го убеди Оле Гунар Солскјер почесто да биде во составот на Манчестер Јунајтед. Минатата сезона одигра само 19 натпревари во Премиерлигата, а од почетокот на тековната сезона забележа скромни шест минути на теренот. Затоа Холанѓанецот веќе гледа кон излезната врата на „Олд Трафорд“.

Тој му наложи на својот агент да се обиде да договори трансфер во Реал Мадрид. Од друга страна Реал Мадрид имаше интерес за Ван де Бек пред да се пресели во Манчестер Јунајтед. Сега играчот се надева дека интересот сеуште постои. Холанѓанецот верува дека може да се бори за поголема минутажа на „Сантијаго Бернабеу“, особено доколку се оствари планот да си заминат Иско и Дани Себаљос.

Од друга страна, конкуренцијата во средниот ред на Реал Мадрид останува доста сериозна, особено по доаѓањето на Едуардо Камавинга, кој стана миленик на Карло Анчелоти.

Англиската фудбалска икона, Дејвид Бекам, ќе стане заштитно лице на претстојното Светско првенство во Катар 2022. Договорот помеѓу организаторот Катар и Бекам се очекува да биде потпишан следниот месец.

Според најавите, Англичанецот ќе добива по 15 милиони фунти секоја година  а договорот ќе биде со важност од десет години, што значи дека Бекам вкупно ќе инкасира 150 милиони фунти.

На почетокот на овој месец, Дејвид Бекам помина неколку дена во Доха во обиколка на неколку стадиони кои се во изградба и се сретна со високи претставници задолжени за организација на натпреварувањето. Светското првенство ќе се одржува од 21 ноември до 18 декември 2022 година.

Играчот на Интер, Алексис Санчез, во јануарскиот преоден рок најверојатно ќе го напушти клубот од Милано и веќе стигна првата понуда за него, и тоа од премиерлигашот Евертон.

Медиумите од Англија откриваат дека тренерот на Евертон, Рафаел Бенитез, сака да ја засили кокнуренцијата во нападот на популарните“карамели“ и поради тоа е силно заинтересиран за доведување на Чилеанецот Санчез.

Алексис Санчез е далеку од стандарден во тимот на Интер и оваа сезона настапи на само 5 натпревари и тоа со влегување од клупата за резерви. Се очекува Интер да се согласи на раскинување на договорот со Санчез, само да се ослободат од големата плата што ја прима репрезентативецот на Чиле.

Ако потпише за Евертон, тоа би било враќање на Санчез во Премиер лигата каде се прослави играјќи во дресот на Арсенал,а потоа помина и неславен период во Манчестер Јунајтед.

Екипата на Баерн Минхен забележа победа од 4:0 против тимот на Хофенхајм во Бундеслигата, а натпреварот имаше посебно значење за голманот на баварскиот гигант, Мануел Ноер. Тоа беше 300-та победа за Ноер во германското првенство. 

На голманот на германската репрезентација му требаат само уште 10 победи за да го израмни рекордот на поранешниот голман на Баерн Минхен, Оливер Кан, кој во кариерата забележа 310 победи во Бундес лигата и е на првото место по вкупен број на победи во германското првенството.