Инвестицискиот фонд од Саудиска Арабија и официјално го презеде Њукасл и е спремен да вложи голема сума во тимот.

Англиските медиуми пишуваат дека Њукасл ќе може да потроши меѓу 200 и 250 милиони евра во зимскиот преоден рок, а така нема да го загрози финансискиот фер-плеј (ФФП). Прва мета е Филипе Кутињо, кој е на излезна врата од Барселона, па Њукасл ќе се обиде да го донесе уште во јануари. Трансферот би можел да се реализира за 20 милиони фунти, а Кутињо ќе ја добие истата плата која ја заработува на „Камп Ноу“.

Другата трансферна цел во зимскиот преоден рок ќе биде дефанзивецот на Баерн Минхен, Николас Зуле. Договорот на Зуле истекува на крајот на сезоната, а Баерн е спремен да го продаде во јануари.

Милан започнал преговори со ѕвездата на Лил и португалски репрезентативец Ренато Санчез.

24-годишниот играч за врска ја „оживеа“ својата кариера во Лил и е мета на многу европски гиганти. Санчез одигра одлично и на Европското првенство, а моментално се опоравува од повреда и наскоро ќе се врати на терените.

Милан е во потрага по засилување за средниот ред и во него гледа идеална алтернатива за Кеси, па веќе започнал преговори со неговиот агент Жорж Мендеш.

„Росонерите“ се спремни да испратат понуда од 35 милиони евра за да го донесат на „Сан Сиро“ во јануари.

Екипата на Јувентус е заинтересирана за играчот од средниот ред на на Манчестер Сити, Бернардо Силва. Како што тврди “Калчомеркато“, тренерот на Јуве, Масимилијано Алегри, сака да доведе креативен играч околу кого ќе ја гради играта на тимот, и со таа цел се фокусира на доведување на Силва.

27-годишниот Бернардо од почетокот на сезоната прикажува доста добри игри во дресот на Манчестер Сити, но се чини дека неговото место сеуште не е загарантирано и нема да биде изненадување доколку го напушти тимот од “Етихад“.

Португалецот и во изминатите два преодни рока беше поврзуван со заминување од Сити но таков трансфер сеуште не се реализира.

Фудбалерот на Манчестер Јунајтед, Џеси Лингард е подготвен во јануари да замине од клубот и да се пресели во екипа каде ќе биде стандарден играч со голема минутажа. Целта на Лингард е да се избори за место во репрезентацијата на Англија за учество на Светското првенство во Катар.

Договорот на Лингард истекува на крајот од сезоната и како што објавуваат англиските медиуми, тој ја одбил понудата за продолжување на соработката со Манчестер Јунајтед незадоволен од добиената минутажа во екипата.

За негово доведување интерес пројавија Барселона и Милан и се надеваат дека ќе го доведат Џеси Лингард како слободен играч веќе ова лето.

Како што пренесуваат медиумите во Англија, новите  челници на фудбалскиот клуб Њукасл, стапиле во контакт со прославениот Зинедин Зидан со понуда да седне на клупата на Њукасл во улогата на нов тренер. 

Одговорот на Зидан бил негативен а причините зошто ја одбил понудата изгледа лежат во фактот дека популарниот “Зизу“ преферира да биде селектор на Француската репрезентација или пак тренер на Јувентус.

Зидан е трето тренерско име кое го одбил Њукасл. Прво тоа го стори Антонио Конте, а по него и Брендон Роџерс од Лестер.

Стивен Џерард, кој седи на кормилото на Глазгов Ренџерс, нема намера да прифати понуда од новите сопственици на Њукасл.

Богаташите од Саудиска Арабија ќе му дозволат на Стив Брус да дојде до илјадитиот меч и веднаш потоа веројатно ќе ја прекинат соработката. Воедно самиот тренер изјави дека очекува разделба со оглед на тоа што пристигнуваат нови газди. На тоа реагираше Џерард.

„Нема да лажам, ги следам случувањата во Њукасл, но, само поради една причина. Брус ќе го води 1000-от меч како менаџер. Максимално го почитувам“ , вели поранешниот англиски фудбалер.

Италијанските медиуми пренесуваат дека Интер започнал преговори за продолжување на соработката со Николо Барела.

Барела е еден од најдобрите играчи на Интер и се етаблираше во еден од најдобрите играчи за врска во Европа. Тој го привлече вниманието на многу европски гиганти, но Интер сака по секоја цена да го задржи на „Џузепе Меаца“.

Неговиот договор истекува во 2024 година, но Интер сака да го награди со подобар договор и му ја ветил капитенската лента од следната година. Медиумите откриваат дека Интер му понудил петгодишен договор и плата од пет милиони евра по сезона, плус од следната сезона да биде нов капитен на тимот.

Дефанзивецот на Челзи, Цезар Азпиликуета може да се пресели во Барселона. Според извори до каталонскиот клуб, се очекува Барса да го донесе дефанзивецот следното лето, кога тој може да стане слободен играч. Покрај тоа, Барселона е заинтересирана за уште еден дефанзивец на лондончани, Андреас Кристенсен.

Во септември беше објавено дека Челзи планира да го продолжи договорот со Азпиликуета. Клубот е подготвен да му понуди договор на шпанскиот фудбалер до 2023 година со можност за дополнително продолжување за уште една сезона.

Филип Костиќ е трансфер цел на Њукасл, објави германски „Билд“.

По неуспешниот трансфер во Лацио летово, офанзивниот фудбалер остана во Франкфурт, каде повторно има одлични игри, па англискиот клуб кој има новибогати сопственици во него гледа на едно рационално засилување оваа зима.

Новото раководство на Њукасл сака целосно да го промени тимот, па сега се во потрага по нови засилувања. Доколку „страчките“ одлучат да испратат официјална понуда за српскиот репрезентативец, Ајнтрахт тешко дека ќе може да одолее финансиски.