Роберт Левандовски не е сигурен за својата иднина во Баерн Минхен и вчера ја префрли топката кон раководството на клубот, потенцирајќи дека таму треба да се бараат одговори за фактот што се уште нема започнато преговори за нов договор.

Хасан Салихамиџиќ во ексклузивното интервју за германски „Скај“ призна дека Баерн е во напредни преговори за Гравенберх од Ајакс, но исто така му ја затвори вратата на Левандовски, без оглед на оптимистичната изјава од Жоан Лапорта кој пред неколку дена порача дека верува во ангажман на Полјакот.

„50 милиони за Левандовски? Не! Левандовски има договор до 2023-та година и нема да го продадеме. Тука е многу почитуван од сите, фановите го сакаат. Разговарав со Левандовски, ќе разговарам и со неговиот агент. Има договор до 2023-та година и го имаме целото време на овој свет за преговори. Го имаме најдобриот напаѓач во светот и не сме започнале преговори досега. Но тоа ќе го направиме сега откако ја осигуравме титулата“, изјавил Брацо.

Иако викендов математички ја обезбеди титулата, ПСЖ наскоро би требало да му врачи отказ на тренерот Маурицио Почетино.

Од старт е јасно дека работите меѓу тренерот и ПСЖ не „кликнаа“ и дека ниту клубот не е задоволен од него, но дека не е претерано среќен ниту во Париз. Тој има договор до јуни 2023 година, но речиси сигурно е дека нема да ја дочека следната сезона на „Паркот на принцовите“ бидејќи се очекува многу брзо да добие отказ.

Како негов наследник на клупата се споменува Антонио Конте. Сепак, парижаните имаат желба да го ангажираат Зинедин Зидан, но тој наводно имал за цел да биде селектор на Франција по Дидие Дешам, па Конте сепак е пореална опција.

Реал Мадрид е силно заинтересиран во своите редови да го доведе дефанзивецот на Челзи, Рис Џејмс. Во шпанскиот гигант го гледаат 22-годишниот Џејмс како долгорочно решение за десната бековска позиција и сакаат да го доведат на лето.

Џејмс ги помина сите младински категории на Челзи, каде е од 2006 година и моментално е стандарден во првиот тим на „сините“.

Особено блеска оваа сезона каде директно учествуваше во 16 погодоци за Челзи, па се етаблираше во еден од најдобрите десни бекови во Премиер лигата.

Наполи доживеа големо разочарување со поразот на гостувањето кај Емполи, посебно што избраниците на Лучијано Спалети имаа предност од два гола на десетина минути до крајот на дуелот.

Овој пораз го оддалечи Наполи од борбата за скудетото, бидејќи има Интер има пет бода предност и натпревар помалку во однос на тимот на нашиот Елиф Елмас, кој до крајот на сезоната ќе одигра уште само четири натпревари.

Веднаш по шокантниот пораз, Наполи објави дека сениорскиот тим оди во карантин, односно популарниот „ритиро“, каде фудбалерите ќе се подготвуваат за следниот предизвик, натпреварот со Сасуоло следниот викенд.

Кратко по првичната информација, Наполи испрати дообјаснување дека одлуката е на тренерот Спалети, а била прифатена од клубот.

Милан е во потрага по квалитетен напаѓач за следната сезона, кој може да биде долгорочна замена за Златан Ибрахимовиќ.

Прва желба на „росонерите“ е голтерегот на Ајакс, Себастијан Халер, пренесува „Газета дело Спорт“. Халер игра фантастична сезона во Ајакс каде на 38 меча постигна 33 гола, а во групната фаза од Лигата на шампиони постигна 10 гола.

Овој 27-годишен напаѓач претходно беше во Вест Хем, но не се прослави во Премиер лигата, а сега во Ајакс игра во животна форма.

Милан стапил во контакт со неговиот агент и е спремен да понуди 45 милиони евра за неговиот потпис.

Манчестер Јунајтед можеби ја поправи сликата од ужасното издание против Ливерпул, но повторно беше поразен во дерби натпреварот против Арсенал.

Јунајтед загуби против Арсенал со 3-1, можеа „црвените ѓаволи“ да изедначат на 2-2, но не ги искористија шансите при 2-1 водство за домаќините. Пол Сколс е еден од критичарите на Рагник уште од моментот кога Германецот седна на клупата, а сега откри дека атмосферата во Јунајтед не била добра.

„Ќе ви откријам еден разговор од пред неколку дена. Разговарав со Лингард и се надевам дека нема да ми се налути што ќе го кажам ова. Ми порача дека атмосферата во соблекувалната е катастрофална“, изјави Сколс.

Весникот „Марка“ пренесува дека дефанзивецот на Челзи, Маркос Алонсо може да ја продолжи кариерата во Атлетико Мадрид. 

Шпанецот е главна трансфер цел на тренерот Диего Симеоне. Договорот на Алонсо со Челзи истекува во летото 2023 година.

Играчот кој потекнува од школата на Реал Мадрид, оваа сезона одигра 22 натпревари за Челзи во Премиер лигата, на кои забележа 2 гола и 3 асистенции.

Атлетико Мадрид на лето ќе биде активен на трансфер пазарот бидејќи приоритет на клубот е да привлече нов напаѓач кој ќе го замени Луис Суарез. Уругваецот нема да добие предлог за нов договор и најверојатно кариерата ќе ја продолжи во МЛС.

Според „Мундо Депортиво“, главниот тренер на „јорганџиите“ Диего Симеоне веќе се фокусирал на фудбалер со карактеристики на Суарез, кого сака да го види на „Ванда Метрополитано“. Се работи за Лаутаро Мартинез. Аргентинскиот шпиц на Интер има 15 гола во Серија А оваа сезона, но се очекува да биде продаден при добра понуда.

Не е тајна дека Мартинез беше пред договор со Атлетико во 2017 година, кога стана најдобар стрелец на Копа Америка за играчи до 20 години. Неколку месеци подоцна, напаѓачот потпиша со Интер.

Лаутаро би го чинел Атлетико ни помалку ни повеќе туку 70 милиони евра.

Калвин Филипс и Пау Торес се првите две трансфер цели на новиот тренер Ерик Тен Хаг кој на лето ќе го преземе Манчестер Јунајтед, објавија британските медиуми.

26-годишниот играч од средниот ред Филипс е лидер на екипата на Лидс, додека 25-годишниот централен дефанзивец Торес е член на Виљареал.

Раководството на 20-кратниот шампион на Англија ќе направи се што е во нивна моќ да ги купи двајцата играчи за кои ќе треба да издвои десеттина милиони евра.