Медиумите во Англија пренесуваат дека калчолигашот Рома одреди цена од 120 милиони евра за својот голгетер Тами Абрахам.

Англискиот репрезентативец минатото лето се пресели во Рома од Челзи за 40 милиони евра и има одлична сезона со 23 гола на 37 натпревари.

Настапите на Абрахам предизвикаа интерес кај англиските клубови и некои од водечките тимови ќе се обидат да го вратат во Премиер лигата.

Рома преку одредувањето на високата цена ќе се обиде да го задржи 24-годишниот голгетер во своите редови и во наредните сезони.

Фудбалскиот клуб Бреша му врачи отказ на тренерот Филипо Инзаги. Тимот се бори за промоција во италијанската Серија А и на 7 кола пред крајот го зазема петтото место во Серија Б. Првите две екипи одат директно во Серија А, а за третото место меѓусебно ќе разигруваат екипите од третата до осмата позиција.

 Клубот преку соопштение му се заблагодари на Инзаги за сработеното и наведе дека за негов наследник ќе го назначи поранешниот играч на Бреша, Еугенио Корини.

48-годишниот поранешен италијански репрезентативец Филипо Инзаги ја презеде Бреша минатото лето, а претходно две сезони го водеше Беневенто, освојувајќи промоција во Серија А, а потоа испадна од елитата. 

Марко Асенсио во текот на летниот трансфер период дефинитивно ќе го напушти фудбалскиот состав на Реал Мадрид.

Тој има уште една година од договорот со „белите“, но, бидејќи не е задоволен од минутажата ќе побара да биде ставен на трансфер листата.Неговата вредност на пазарот се проценува меѓу 30 и 35 милиони евра.

За неговиот потпис се заинтересирани неколку екипи од Англија како и градскиот ривал, Атлетико Мадрид.

Карим Бензема целосно се опорави од повредата на потколеницата која го спречи да настапи на натпреварот од 29. коло на шампионатот на Шпанија со Барселона (0-4).

Тоа значи дека напаѓачот ќе може да настапи на следната средба на Реал Мадрид по пауза за настапите на репрезентациите. Бензема оваа сезона постигна 30 голови и имаше 12 асистенции на 33 натпревари за Реал Мадрид во сите натпреварувања. Тој стана најдобар стрелец во историјата меѓу француските играчи.

Реал Мадрид по 29 кола е на врвот на табелата во шпанското првенство со 66 бодови. Реал Мадрид во следното коло ќе се соочи со Селта Виго. Средбата е закажана за 2 април.

Фудбалерите на Барселона Роналд Араухо и Гави не можат да се договорат за нов договор со каталонскиот клуб, соопштува „Марка“.

Според истиот извор, Барселона сака да ги задржи играчите, па им понудиле нови договори со подобри услови. Забележано е дека ова е трета понуда на Барселона, сепак, Араухо и Гави се незадоволни од условите во договорите, па одбија да ги обноват договорите кои истекуваа во летото 2023 година.

Араухо (23) и се приклучи на Барселона во летото 2018 година. Уругвајскиот дефанзивец оваа сезона има 33 настапи во сите натпреварувања и постигна четири гола. 17-годишниот Гави е дел од школата на Бетис. Тој заврши во академијата на Барселона во 2015 година. Шпанскиот играч за врска оваа сезона постигна два гола и даде пет асистенции на 36 натпревари во сите натпреварувања.

Интер го објави новиот договор со играчот од средниот ред Марсело Брозовиќ. Претходниот договор му истекуваше следното лето и за него интерес покажаа клубови како Ливерпул, Њукасл, Реал Мадрид и Барселона, но на крајот играчот се одлучи да остане во Интер.

Брозовиќ сега е обврзан до летото 2026 година, а неговата плата порасна на 6 милиони евра според некои новинари, а според други на 6,5 + 1 милион евра.

29-годишниот хрватски интернационалец е шеста сезона во Интер, откако клубот го купи од Динамо за 5 милиони. Во овој период на „Џузепе Меаца“ освои една титула и еден Куп на Италија.

Одличните игри на Керем Актуркоглу во дресот на Галатасарај го привлекоа вниманието на фудбалските клубови надвор од Турција.

23-годишниот фудбалер сезонава „растура“ во дресот на турскиот великан, постигна осум гола и запиша пет асистенции, а имаше и забележителна улога во дуелот од Лигата на Европа против Барселона.

За турското крило се заинтересирани лондонските ривали Арсенал и Тотенхем, па лесно може да се случи талентираниот Актуркоглу следната сезона кариерата да ја продолжи во Лондон.

Неговиот актуелен договор со Галатасарај е со важност до 2026 година, а пазарната вредност му е проценета на 11 милиони евра.

Во Франција беше откриено колку ќе добие Маурицио Почетино доколку добие отказ од Пари Сен Жермен. Судбината на аргентинскиот стручњак се чини однапред одредена откако Парижаните уште една година потфрлија во Лигата на шампионите.

Според „Екип“, казната предвидена во договорот на Покетино во случај на негово предвремено раскинување изнесува повеќе од 20 милиони евра.

Ова се парите што ќе ги добијат тренерот и неговите помошници.

Битката за купување на Челзи продолжува со полна сила, пишува англискиот печат на своите страници утринава. Британскиот милионер Ник Кенди во текот на викендот значително ја подобри понудата за купување на тимот од Лондон, откако до петокот неговата понуда изнесуваше околу 2 милијарди фунти. Тој беше принуден да го стори тоа откако во борбата се вклучи уште еден меѓународен конзорциум, овој пат со корејско учество.

Кенди упати нова понуда до американската „Реин групација“, која беше ангажирана од владата да помогне во обликувањето на договорот за промена на сопственоста на клубот. Кенди се смета за една од најпреферираните опции за нов сопственик на клубот доколку тоа го дозволува финансиската страна на договорот.

Групацијата се очекува да состави конечна листа на најпреферирани понуди засновани на критериуми до средината на оваа недела, по што ќе започнат преговорите. Се очекува креирањето на самата зделка да трае околу еден месец.

Ник Кенди, кој е навивач на Челзи уште од дете, во понеделникот откри дека веќе водел првични разговори со технолошката платформа „PrimaryBird“ за да започне со развивање на модел за активно вклучување на навивачите во клубот и потенцијално одлучување.