feature

Само македонски екипи на Струшкиот ракометен турнир годинава

Шест македонски прволигаши ќе настапат на 49. издание на Струшкиот ракометен турнир, на кој годинава, спротивно на традицијата, нема да учествуваат екипи од странство.

Бранителот на трофејот Еурофарм Пелистер ќе игра во групата Б заедно со Металург и Тиквеш, додека актуелниот шампион Вардар за противници во групата А ќе ги има екипите на домаќинот Струга и Бутел.

„Меѓународниот ракометен турнир – Струга 2021“ своето 49. издание ќе го има од 12 до 15 август на отвореното игралиште на Женска плажа во Струга.

Финансиска помош за македонските спортисти од ИОК

Меѓународниот олимписки комитет (ИОК) ќе издвои 120.000 долари со кои ќе се финансираат подготовките на најдобрите македонски спортисти во квалификациите за настап на следните Олимписки игри во Париз.

Договорот со Маркетинг одделението на ИОК во Токио го потпиша претседателот на Македонскиот олимписки комитет – МОК, Даниел Димевски.

Договорот, како што соопшти македонската страна, предвидува MOK во следните четири години да добие донација во износ од 30.000 долари годишно, кои исклучиво ќе се користат за подготовки на најдобрите македонски спортисти и нивно учество на меѓународните натпревари кои се квалификациски за учество на Олимписките игри Париз 2024.

Иличиќ пред потпис со Милан

Joсип Иличиќ после четири години ќе ја напушти Аталанта, но веројатно ќе остане во Серија А.

Иличиќ не беше повикан за денешниот пријателски натпревар на Аталанта, па тоа е најава дека е пред заминување. Според информациите Иличиќ карирата ќе ја продолжи во редовите на Милан и неговиот трансфер ќе изнесува околу шест милиони евра.

Откако Чалханоглу си замина бесплатно во Интер на Милан му беше потребен офанзивен играч за врска, па изборот паднал на Иличиќ.

Иличиќ во Италија игра повеќе од 10 години претходно настапуваше за Палермо и Фиорентина. Благодарение на одличните настапи во дресот на Аталанта во последните сезони прерасна во еден од најдобрите играчи во Серија А.

Ребров е наследник на Шевченко на украинската клупа

Сергеј Ребров официјално ќе биде претставен како селектор на националниот тим на Украина. Од страна на фудбалската федерација на Украина на 9 август ќе биде официјално објавено назначувањето на Ребров на селекторската функција, а тогаш ќе следува и преставувањето на новиот селектор.

Познато е дека договорот со Сергеј Ребров ќе биде потпишан на две години. 47-годишниот фудбалски стрчњак ќе биде предводник на репрезентацијата во квалификациите за СП 2022 и ЕП 2024. Договорот може да се продолжи за уште една година по резултатите од селекцијата за Европското првенство.

Претходно беше објавено дека во договорот на Ребров со Ал-Аин од Обединетите Арапски Емирати ќе биде прекинат и искористена клаузулата дека ако биде поканет во украинската репрезентација, не треба да се плати надомест за прекин на договорот.

Интер и Челзи договорија враќање на Лукаку на „Стемфорд бриџ“

Челзи постигна договор со Интер за трансферот на Ромелу Лукаку, тврдат медиумите во Англија. Договорот ќе биде вреден 115 милиони евра (97,5 милиони фунти), што е клупски рекорд за лондончани.

Белгискиот репрезентативец се враќа на „Стемфорд Бриџ“ по седум години откако беше продаден на Евертон. Тој ќе потпише петгодишен договор, добивајќи нето плата од 195.000 фунти неделно.

Преговорите постигнаа значителен напредок во петокот. Првично, Челзи се испроба со две понуди, во кои беа вклучени двајца лондончани – Марко Алонсо и Давиде Запакоста. Сепак, Интер сакаше целосно финансиски договор, што на крајот успеаја да го постигнат.

На „Стемфорд Бриџ“, се среќни што ќе го вратат Лукаку за помалку од 100 милиони фунти. Самиот Лукаку исто така изрази желба да се врати во Челзи, каде играше помеѓу 2011 и 2014 година.

Чикаго го доведе Демар Дерозан

Поранешниот кошаркар на Сан Антонио Спарс, Демар Дерозан ќе стане нов кошаркар на Чикаго Булс. Тој ќе потпише тригодишен договор со новиот клуб вреден 85 милиони долари.

Во замена за него, Спарси ќе го добијат Тед Јанг, пик од првиот круг на НБА драфтот, како и два пика од вториот круг.

„Биковите“ веќе ги донесоа Лонзо Бол и Алекс Карузо што значи дека продолжуваат да прават добра селекција за следната сезона. Дерозан во текот на минатата сезона имаше просек од 21,6 поени, 4,2 скока и 6,9 асистенции по натпревар.

Американката Феликс е најтрофејна светска атлетичарка

Алисон Филикс ја завршува својата уникатна атлетска кариера како најтрофејната спортистка во историјата на Олимписките игри, откако го освои својот единаесетти медал со штафетата на САД на 4×400 метри и ја надмина легендата Карл Луис, кој има десет олимписки медали во својата кариера.

35-годишната Феликс, за која првото олимписко учество беше во 2004 година во Атина, денес го освои својот седми златен олимписки медал, откако американскиот квартет на 4х400 метри во женска конкуренција победи со 3:16,85 минути.

Штафетата на Полска заврши на второто место, со нов национален рекорд од 3:20,53 минути. Третата позиција и бронзениот медал и припадна на претставничките на Јамајка со 3:21,24 минути.

Уапсени 11 лица кои расистички ги навредуваа англиските фудбалери по финалето против Италија

Британската полиција уапси 11 лица кои ги навредуваа играчите на Англија, Букајо Сака, Маркус Рашфорд и Џејдон Санчо по финалето на ЕП 2020 против Италија.

Од илјадниците навредливи пораки објавени на социјалните мрежи, 123 се од профили на луѓе кои не се од Велика Британија.

Има луѓе кои мислат дека можат да се кријат зад профилот на социјалните медиуми и да објавуваат такви одвратни коментари неказнето. Треба повторно да размислат – имаме истражители кои активно бараат навредливи коментари во врска со овој натпревар, и ако се утврди дека се прекршување на законот, тогаш и други луѓе што ги објавиле ќе бидат уапсени. Нашата истрага напредува со добро темпо и ние сме благодарни на луѓето што не информираа за расистичките објави, изјави истражителот Марк Робертс.

За потсетување, Сака, Рашфорд и Санчо не реализираа во пенал-серијата во финалето на Европското фудбалско првенство 2020.

Роси објави пензија на крајот од сезоната

Еден од најдобрите возачи во историјата на мотоциклизмот, Италијанецот Валентино Роси најави дека заминува во спортска пензија на крајот на оваа сезона.

Одлучив да се повлечам. За жал ја почнувам последната половина од сезоната како возач во Мото ГП. Тоа е тежок момент и поприлично тажен, изјави Роси на средба со новинарите спроти трката во Австрија. Следните години мојот живот ќе се промени. Беше тоа многу долго патување, но исполнето со многу забава, додаде летендарниот италијански мотоциклист, кој освои вкупно девет светски титули во сите категории и забележа 115 победи.

Оваа сезона, меѓутоа, Роси е далеку од самиот врв со само еден пласман меѓу најдобрите десет возачи.

Меси закажа прес-конференција на „Камп Ноу“

Лионел Меси за утре во 12 часот на „Камп-Ноу“ во Барселона, закажа прес-конференција на која ќе каже што се случи околу неговото напуштање на тимот. Ова го објави новинарот Фабрицио Романо, а оваа конференција сигурно ќе предизвика огромно внимание.

Пред неколку дена Барселона соопшти дека Меси и официјално го напушта клуб, за кого настапуваше цели 17 години и освои сè што може да се освои на клупски план.

«< 1199 1200 1201 1202 1203 >»