Македонската фудбалска репрезентација до 21 година вчера ги стартуваше мини подготовките за новите натпревари во евро-квалификациите, кои избраниците на Драган Канатларовски ги очекуваат овој месец.

На 11 ноември, на тренинг центарот „Петар Милошевски“ гостува селекцијата на Украина, а пет денови подоцна, на Националната арена „Тодор Проески“, „црвено-жолтите“ го пречекуваат топ фаворитот во групата, селекцијата на Франција.

Фудбалерот од средниот ред на Жилина, Енис Фазлагиќ во изјава за ФФМ истакна дека, верува дека, со добра игра и пожртвуваност пред домашната публика може да се остварат позитивни резултати.

Нè очекуваат два многу тешки меча против Украина и Франција. Фокусот е максимално насочен кон првиот дуел со Украина, тежок противник кој се наоѓа во одлична форма и игра многу квалитетно во овие квалификации. Имаа одлични индивидуалци, но и колективно се многу добри. Ќе се подготвиме максимално, ќе дадеме сè од себе и се надевам дека ќе успееме да освоиме три бода од овој дуел. Одиме чекор по чекор, играме два натпревари на домашен терен, верувам дека со поддршката од нашите навивачи ќе можеме да освоиме бодови и на мечот со Франција, рече Фазлагиќ.

Потсети дека на претходниот квалификациски циклус во октомври и мечевите со Фарски Острови и Ерменија не беше во тимот поради повреда на зглобот, но, тоа, како што кажа, е зад него и е подготвен да даде сè од себе за Македонија на натпреварите со Украина и Франција.

Во досегашниот тек од квалификациите, Украина е второпласирана во групата со девет бодови, четири повеќе од македонската репрезентација на третата позиција.

Фудбалерот на ПСЖ, Нејмар беше двоен стрелец на натпреварот од француското првенство против Бордо (3-2).

29-годишниот фудбалер ги постигна 400-от и 401-от гол во кариерата. Нејмар има постигнато 90 гола за ПСЖ во сите натпреварувања, 136 за Сантос, 105 за Барселона и 70 за Бразил.

Бразилецот се искачи на 8. место меѓу најдобрите стрелци во историјата на парискиот клуб. Нејмар го помина Анхел Ди Марија, кој стигна до 89 гола во дресот на ПСЖ.

Рекордер на ПСЖ е Единсон Кавани (200). Во топ 7 се и Златан Ибрахимовиќ (156), Килијан Мбапе (139), Паулета (109), Доминик Рохто (100), Мустафа Далеб (98) и Франсоа Мпеле (95).

Марк Овермарс ја одби понудата на Њукасл да стане спортски директор во клубот. 48-годишниот Холанѓанец ја извршува функцијата во Ајакс од 2012 година и за тоа време стекна репутација како специјалист за откривање и развивање таленти од светска класа. Затоа новите сопственици на Њукасл сакаа да го привлечат во својот проект. Сепак, според одредени медиуми на Островот, Овермарс одлучил да остане во Холандија и да ја продолжи својата работа во Ајакс.

Во меѓувреме, Њукасл се очекува денеска да го објави назначувањето на Еди Хау, кој ќе го замени Стив Брус на менаџерската позиција. Поранешниот тренер на Бурнемаут во живо го следеше гостувањето кај Брајтон во саботата, а Њукасл е на претпоследното место на табелата во Премиер лигата само благодарение на подобрата гол-разлика од Норич.

Легендата на Ливерпул и актуелен тренер на Глазгов Ренџерс, Стивен Џерард е голем фаворит за преземање на клупата на Астон Вила, по отказот кој му беше доделен на довчерашниот тренер Дин Смит.

Според англиските медиуми, Џерард е на врвот на листата кај управата на Астон Вила, но како можни кандидати се споменуваат и имињата на Ралф Хазенхотл кој е актуелен тренер на Саутхемтон, и селекторот на данската фудбалска репрезентација,Каспер Хулманд.

Тренерот на Атлетико Мадрид, Диего Симеоне, го коментираше резултатот од натпреварот од 13. коло на шпанскиот шампионат со Валенсија (3-3).

„Противникот беше фокусиран. Ова е пристојно реми за Валенсија. Што имам да кажам, го кажав во соблекувалната. Тешко е да се загубат бодови, но не можам да бидам лут на тимот по работата што ја направија на овој натпревар и на натпреварот против Ливерпул. Во фудбалот треба да платите за грешките. Беше одличен натпревар, имавме 80-85 одлични минути, но за жал сите понекогаш грешиме. Кривицата за загубената победа не би ја префрлил на ниту еден од играчите. Ако треба да обвинете некого, виновен е тренерот, а не некој играч“, изјави Симеоне.

По 12 одиграни кола, Атлетико се наоѓа на четвртото место на табелата со 23 бода.

Спортскиот директор на ПСЖ, Леонардо, изрази мислење дека Парижаните не се обврзани да ги пуштат играчот од средниот ред Леандро Паредес и напаѓачот Лионел Меси во репрезентацијата на Аргентина за ноемвриските натпревари, поради фактот што играчите продолжуваат да закрепнуваат од повредите.

„Не се согласуваме дека сме обврзани да испраќаме фудбалери во репрезентацијата кои според нас се во слаба физичка форма или се во фаза на опоравување. Ова е нелогично и таквите ситуации заслужуваат ФИФА да го регулира овој процес од правна гледна точка“, рече Леонардо во својата изјава пред ноемвриските квалификации за СП. Да потсетиме дека Меси ги лекува коленото и тетивата, а неговиот сонародник штотуку се врати на тренинзите откако се опорави од повредата на колкот.

Лекарскиот тим на Аргентина се надева дека и двајцата играчи ќе се вратат во форма за натпреварот против Бразил на 17 ноември, додека нивниот настап против Уругвај четири дена претходно изгледа малку веројатен.

Екипата на Ливерпул сака во своите редови да го доведе играчот на Спортинг Лисабон, Педро Гонсалвеш.

Јирген Клоп се надева дека Португалецот ќе пристигне на „Енфилд“  во јануари со што ќе ги засили опциите во нападот на тимот.

Како главна причина за доведување на Гонсалвеш е фактот што Ливерпул ќе остане без услугите на Мохамед Салах и Садио Мане кои на почетокот од следната година ќе учествуваат на Африканскиот куп на нации.

Главен проблем при доведувањето на 23-годишниот фудбалер е неговата висока откупна клаузула со шампионот на Португалија која изнесува 67,5 милиони фунти.