Германскиот бундеслигаш Волфзбург кој оваа сезона успеа да се квалификува во Лигата на шампионите има нов тренер. Предводникот на тимот Гласнер ги изненади челниците на Волфзбург кога објави дека нема да го продолжи договорот и ги напушти „волците“, па од клубот итно мораа да побараат негова замена.
Од клубот доцна синоќа потврдија дека нашле негова замена, па екипата следната сезона ќе ја води холандскиот стратег Марк ван Бомел.
44-годишниот холандски стручњак потпиша двегодишен договор со Волфзбург.
Турчинот Чахланоглу пред потпис со Ал Духаил од Катар
Хакан Чалханоглу нема да го продолжи договорот со Милан и кариерата ќе ја продолжи во Катар, пренесуваат италијанските медиуми.
Овој 27-годишнен играч за врска на кого договорот со Милан му истекува на крајот од сезоната добил понуда од екипата на Ал Духаил, а богатите Арапи му понудиле огромна сума.
Понудата која пристигнала до Чалхноглу изнесувала 32 милиони евра за три години, а играчот наводно ја прифатил. Милан веќе почна да бара негова замена, а прва желба е ѕвездата на Удинезе, Родриго де Пол.
Откриен планот на Анчелоти – седум фудбалери го напуштаат Мадрид!
Карло Анчелоти го напушти Евертон и се врати во Реал, каде потпиша тригодишен договор.
Анчелоти го водеше мадридскиот клуб од 2013. до 2015. година, кога ја освои Лигата на шампионите. Италијанецот со Реал не успеа да стане шампион на Шпанија, а на клупата во Мадрид оствари 89 победи и 16 порази.
Новиот тренер веќе започна со сложување на екипата за наредната сезона, а новинарот Жозп Педрерол објави дека клубот ќе го напуштат најмалку седум фудбалери.
Најголемите имиња на тој список се Серхио Рамос и Рафаел Варан. Тие веќе години беа срцето на одбраната на Реал, а сега Рамос одбива да го продолжи договорот, додека Варан сака да се проба во Англија. Додека Рамос ќе замине без отштета, Реал за Варан бара околу 40 милиони евра.
Се очекува Мадрид да го напушти и Иско, кој е незадоволен со статусот во екипата, а на трансфер листата се и Лука Јовиќ, Дани Себаљос, Мариано Диаз и Мартин Едегард.
Според информациите, во клубот ќе останат Герет Бејл и Марсело, иако и двајцата се поврзуваа со бројни клубови.
Информации за нови играчи се уште нема, а навивачите на Реал се надеваат дека најголемото име во овој трансфер период би можел да биде Килијан Мбапе.
Ветеранот Кваљарела и следната сезона ќе го носи дресот на Сампдорија
Напаѓачот на Сампдорија, Фабио Кваљарела, кој во претходната сезона одигра 33 меча и даде 13 голови, ја продолжи верноста кон џеновјани до јуни во 2022 година.
„Горд сум што ме гледаат како легенда на Сампдорија. Му благодарам на претседателот, им благодарам на навивачите и на соиграчите“, напиша Кваљарела на социјалните мрежи.
38-годишниот фудбалер најверојатно ќе ја одигра последната сезона пред да се повлече во фудбалска пензија.
Чаневски го напушти Еурофарм Пелистер, клубот го испрати со стил
РК Еурофарм Пелистер со церемонија пред почетокот на натпреварот против Охрид и свечени подароци го испрати својот капитен Градимир Чаневски. Капитенот на битолскиот клуб заминува на истек на договорот и слободен е да ја избере својата иднина.
Последниот натпревар за Еурофарм Пелистер го одиграа и Невен Стјепановиќ и Дарио Петровски, а како слободен ракометар клубот го напушта и Марин Вегар. Клубот им се заблагодари на професионалноста и залагањето.
Сезонава битолчани го освоија второто место во Суперлигата и играа финале на Купот, а во Европа ја минаа групната фаза на Лига Европа, па беа елиминирани од подоцнежниот победник, Магдебург.
У-21: Контролен натпревар против Словенија
Младата репрезентација на Македонија предводена од селекторот Благоја Милевски ги одработи последните подготовките за претстојниот контролен дуел со селекцијата на Словенија. Натпреварот ќе биде одигран денеска во словенечки Терме Чатеж.
Нашите фудбалери против Словенија ќе ја имаат последната тест подготовка за претстојните квалификации за пласман на Европско првенство во Романија и Грузија кои ќе почнат во септември оваа година.
Фудбалерот од средниот ред на Македонија и член на екипата Злате Моравче, Томче Гроздановски вели дека Словенија е квалитетна репрезентација.
„Секогаш е посебно чувството кога играш за својата земја. Ми претставува огромно задоволство што сум дел од овој тим предводен од селекторот Благоја Милевски. Имаме одлична група на млади фудбалери што знаат колку вреди да се носи дресот со државен грб. Ги слушаме советите од селекторот, подготвени сме да дадеме се од себе за да ги исполниме неговите желби. Не очекува тежок натпревар, против репрезентација која има квалитет и располага со доста добри млади играчи. Ова за нас претставува последен тест пред претстојните квалификации, вели Томче Гроздановски.
Напаѓачот на Македонија Ѓ.П. Арби Воша верува во квалитетот на нашата репрезентација и очекува победа.
„ Се подготвуваме одлично за претсојниот предизвик во Словенија. Функционираме како една група, подготвени сме да дадеме се од себе на секој натпревар што го играме, а така ќе биде и на овој. Ги знаеме квалитетите на Словенија, земја која треба да се респектира, но ние одиме на победа. Очекувам добар натпревар, и се надевам дека ќе се покажеме во одлично светло.”, вели Арби Воша.
Нашата млада селекција првиот натпревар од квалификациите за пласман на Европско првенство во Романија и Грузија го игра против Франција на 2 септември.
Конте пред промоција за нов менаџер на Тотенхем
Италијанскиот стручњак Антонио Конте најверојатно ќе го преземе кормилото на Тотенхем, неполни десеттина дена после освојување на титулата во Серија А и заминување од Интер, пренесува агентот Фабрицио Романо. Тој наведува дека преговорите помеѓу Денис Леви од Тотенхем и Конте се во напредна фаза и во моментов се финализираат последните детали.
Конте ќе добие потполна слобода, односно да направи тим по своја мерка. Затоа во пакет со него во Лондон ќе пристигне и поранешниот спортски директор на Јувентус, Паратичи.
Како што пренесува Романо, Конте не бил никогаш опција за Реал Мадрид, кој во меѓувреме го назначи Карло Анчелоти за нов тренер.
Конте во Премиер лигата го предводеше Челси. Со „сините“ освои една титула во најквалитетната лига во лулката на фудбалот.
Бразилецот Емерсон од Бетис се враќа во Барселона
Емерсон Ројал ќе биде третото засилување за Барселона во актуелниот преоден рок. Барселона од Бетис ќе го откупи договорот на бразилскиот десен бек. Бетис и Барселона, во 2019 година, го откупија договорот на Емерсон од Атлетико Минеиро. Тогаш клубовите постигнаа договор, Емерсон првите две сезони да ги мине во Бетис, а потоа Барселона може да го откупи за девет милиони евра.
Претседателот на Барселона, Џоан Лапорта, решил да ја активираа клаузулата во договорот на Бразилецот.
Емерсон за Бетис одиграл 79 натпревари, постигнал пет гола и забележал десет асистенции.
Десниот бек ќе биде трето засилување за Барселона во преодниот рок, претходно без обесштетување во клубот пристигнаа Серхио Агуеро и Ерик Гарсија од Манчестер Сити.
Мурињо сака да го позајми Тринкао од Барселона
Барселона минатото лето плати 30 милиони евра за напаѓачот на Брага, Тринкао.
21-годишниот Португалец не доби шанса да го покаже својот квалитет бидејќи добиваше мала минутажа на „Камп Ноу“.
Тринкао оваа сезона постигна само 3 гола и запиша 2 асистенции, а Барселона е спремна да го продаде на лето.
Италијанските гиганти Милан и Рома ќе се обидат да ја искористат таквата ситуација и да го донесат во своите редови на лето.
Рома е во пол-позиција за неговиот потпис бидејќи менаџер на Тринкао е Жорж Мендеш, кој е менаџер и на Мурињо исто така.
Португалецот Нуно најсериозен кандидат за менаџер на Кристал Палас
Нуно Еспирито Санто е фаворит за новиот менаџер на Кристал Палас. 47-годишниот Португалец веќе неколку дена преговара со лондончани.
Откако го напушти Вулверхемптон по четири години поминати во клубот, тренерот сака брзо да започне нова работа. Тој исто така е поврзан со тренерската позиција во Тотенхем. Раководството на Кристал Палас размислува за иднината на клубот и опциите за нов менаџер.
Друг кандидат за оваа функција е менаџерот на Свонси, Стив Купер. Меѓу споменатите имиња се и Френк Лампард и Патрик Виеира.
