Тренерот на Реал Мадрид, Карло Анчелоти по победата од 5-2 над Селта вели дека тимот одиграл според договореното.

„Речиси се помина добро. Играта се уште не е совршена. Навивачите многу ни помогнаа. Имавме две дефанзивни грешки на кои треба да работиме. Во исто време, нашиот напаѓачки потенцијал е неверојатен. Секако, мора да бидеме подобри во одбраната. Добро реагиравме и тоа ни помогна да победиме, но не треба да ги даваме тие топки така лесно. Треба да постигнеме рамнотежа. Ќе зборуваме за она што не успеавме да го направиме“, вели Анчелоти.

Тренерот на фудбалерите на Интер, Симоне Инзаги, изрази жалење поради ремито 2-2 на гостувањето кај Сампдорија во денешниот меч од Серија А. Неговиот тим двапати  водеше, но, домаќините се изборија за еден бод.

„Моравме и можевме да го добиеме мечот. Се соочивме со добар тим кој беше добро организиран, згора на тоа повредата на Сенсеине остави со играч помалку. За жал, вестите не се добри. Сепак мора да бидеме задоволни. Имаме седум бодови од три натпревари и тоа два беа на гости. Ќе работиме да напредуваме“, вели тренерот на Интер.

Ливерпул го победи Лидс со 3:0 на гостувањето во четвртото коло од Премиерлигата. За „црвените“ погодуваа Мохамед Салах, Фабињо и Садио Мане.

Во 60. минута од натпреварот беше исклучен дефанзивецот на Лидс, Паскал Струијк, кој заработи црвен картон по бруталниот прекршок над 18-годишниот Харви Елиот.

Струијк со лизгачки старт од зад грб ја скрши левата нога на Елио.

Елиот веднаш беше префрлен во болница, па му следи повеќемесечно опоравување. Во болницата, играчот на Ливерпул беше пречекан од неговото семејство, а тој направи голем гест.

Во собата до него лежеше дете со скршена рака, а Елиот му го подари дресот кој го носеше на натпреварот против Лидс.

Детето беше воодушевено, а фотографијата веднаш стана вирална на социјалните мрежи.

Со враќањето на Масимилијано Алегри, фудбалерите на Јувентус не го вратија веднаш шампионскиот менталитет од првиот мандат на италијанскиот стручњак, а за тоа сведочат нивните резултати од првите три кола.

Клубот од Торино има само еден бод по три одиграни натпревари, по натпреварот со Удинезе во кој беше 2: 2.

Поразите против Емполи и Наполи го означија повторувањето на најлошиот старт во последните 52 сезони.

Тоа е единствената сезона во споменатиот период, освен оваа година, во која Јувентус не забележа победа во првите три кола.

Тие беа шампиони таа сезона, а тренер беше токму Алегри.

Манчестер Сити ја следи ситуацијата околу договорот на Лука Модриќ со Реал Мадрид, јавуваат шпанските медиуми.

Според информациите, 36-годишниот капитен на хрватската репрезентација е голема желба на Пеп Гвардиола, менаџерот на Манчестер Сити. Модриќ има договор со Реал до крајот на оваа сезона и се уште не се започнати преговори за продолжување на истиот, па веќе во јануари како слободен играч може да потпише преддоговор со друг клуб.

Сити, тврдат медиумите, има план како да го доведе Модриќ. Би му понудиле сезона да игра во Манчестер Сити, а потоа опција да се пресели во МЛС.

Медиумите пишуваат дека „кралскиот“ клуб би можел да му понуди нов договор на хрватскиот фудбалер бидејќи се воодушевени од формата во која тој се наоѓа. Така, Модриќ би го исполнил својот сон и кариерата би ја завршил во клубот за кој настапува веќе девет години.

Барселона е подготвена силно да тргне по потписот на играчот за врска на РБ Лајпциг , Дани Олмо во јануарскиот преоден рок.

Каталонскиот клуб е подготвен да плати 70 милиони евра за 23-годишниот играч. Тој е приоритетна цел на Каталонците оваа зима.

На последниот ден од летниот преоден рок, Барса и Олмо се договорија за петгодишен договор, но клубовите не успеаја да се договорат за откупната цена. Се очекува во блиска иднина клубот да започне преговори со Лајпциг.

Актуелниот договор на Олмо со германскиот тим истекува летото 2024 година.

Со натпреварот помеѓу Рома и Сасуоло беше затворена неделната програма од третото коло во италијанското првенство, а натпреварот одигран во Рим, јубилеен за Жозе Мурињо за кого ова беше 1000 меч во функција на тренер, заврши со резултат 2:1 за неговата екипа.

Рома во водство ја доведе Брајан Кристанте во 37. минута на асистенција на Лоренцо Пелегрини, а на 1:1 израмни Филип Џуричиќ во 57. минута. Сасуоло во првите три натпревари од Серија А постигна четири гол, а во три од нив учествуваше српскиот репрезентативец. Двапати погодуваше, а еднаш запиша асистенција.

Конечните 2:1 за продолжување на совршената низа на Рома во која има три победи во исто толку натпревари ги постави Стефан Ел Шарави во втората минта од судиското продолжение.

Мурињо на тој начин го одработи 1000 натпревар во тренерската кариера во која освои 25 трофеи. Ова за него беше 639. победа.

Македонскиот репрезентативец Александар Трајковски викендов за прв пат настапи за својот нов тим Алборг во Данската Суперлига.

Алекс Трајковски го имаше дебито за Алборг во дуелот со Виборг. Неговиот тим славеше со 2:3 во драматичен натпревар, кој на крајот имаше среќен крај за македонскиот репрезентативец.

Трајковски влезе во игра во 76. минута, а неговиот тим имаше водство 1:2, па домаќинот стигна до 2:2, и на крајот Алборг погоди за триумф од 2:3.

Напаѓачот на Манчестер Јунајтед, Кристијано Роналдо изјави дека враќањето во таборот на „црвените ѓаволи“ е најдобрата одлука што ја донел.

„Враќањето во Манчестер Јунајтед е најдобрата одлука што сум ја донел. Ова беше направено во погоден момент. Сакам да пишувам историја, да му помогнам на Манчестер Јунајтед да постигне големи резултати и да освојува трофеи“, рече Роналдо.

Да потсетиме дека Кристијано Роналдо веќе играше за Манчестер Јунајтед во периодот од 2003 до 2009 година, откако се пресели таму од Спортинг Лисабон, во кој ја започна својата кариера. Напаѓачот играше за Јувентус од 2018 година. 36-годишниот Португалец минатата сезона стана најдобар стрелец на италијанското првенство со 29 гола. Од 2009 до 2018 година, Кристијано Роналдо беше дел од Реал Мадрид.