Јувентус и Милан одиграа нерешено 0-0 на стадионот „Алијанц“ во саботата навечер, а тимот на Игор Тудор повторно се мачеше пред голот. Јувентус се обидуваше да дојде до погодок, но не успеаја да го најдат вистинскиот пат до голот на противникот, продолжувајќи ја својата серија натпревари со малку голови под водство на хрватскиот тренер.

„Тоа беше натпреварот што го очекувавме – тежок, против силен тим. Сакавме да победиме, двата тима создадоа шанси и на крајот нерешениот рерзилтат е реален “, рече Тудор.

Тренерот ги објасни своите промени во нападот посочувајќи на заморот во неговата напаѓачка линија.

„Јилдиз, Консеисао и Давид беа уморни – играа толку многу. Се обидовме да завршиме со поголема конзистентност и енергија“, додаде Тудор.

Централниот дефанзивец Бремер сè уште се опоравува од повредата што го оддалечи од теренот поголемиот дел од минатата сезона. Дефанзивецот настапи во натпревари за „Бјанконерите“ оваа сезона, но Тудор одлучи да не презема никакви ризици со него.

Хари Мегваер би можел да го напушти Манчестер Јунајтед и да се пресели во Саудиска Арабија, откако станува сè поизвесно дека нема да добие нов договор. Со само уште една година преостаната од актуелниот договор, 32-годишниот дефанзивец веќе го привлекува вниманието на клубови од Саудиската Про Лига, особено Ал-Наср и Ал-Етифак. 

Мегваер пристигна на Олд Трафорд во 2019 година од Лестер, за тогаш рекордна сума за дефанзивец. Иако беше честа мета на критики, неговата форма се подобри во последните сезони и тој останува значаен дел од тимот. Има над 250 настапи и 16 голови за клубот, а во еден период беше и капитен. 

Доколку се пресели во Ал-Наср, ќе се врати во тим со својот поранешен соиграч Кристиано Роналдо, со кого настапуваше во сезоните 2021–22 и 2022-23. Според извори, Ал-Наср е заинтересиран да го донесе Мегваер без обештетување по истекот на неговиот договор, гледајќи во него искусна опција за зајакнување на одбраната. 

Јануари 2026 ќе биде клучен период, тогаш Мегваер ќе може официјално да преговара со странски клубови. Тој веќе изјави дека наредните месеци ќе бидат пресудни за неговата иднина, но останува посветен на Манчестер Јунајтед додека не се донесе конечна одлука. Клубот очекувано ќе отвори разговори наскоро за да одлучи дали ќе се обиде да го задржи или ќе му дозволи да замине. 

Пеп Гардиола ги отфрли се погласните шпекулации дека Ерлинг Халанд би можел да премине во Барселона, нагласувајќи дека напаѓачот е целосно посветен на Манчестер Сити. 

Шпанскиот стратег потсети на неодамнешното продолжување на договорот на Халанд до 2034 година, што според него е доказ за довербата што норвешкиот голгетер ја има во проектот на клубот. Гардиола изјави дека Халанд „не е толку наивен“ да направи чекор што би ја загрозил неговата кариера во овој момент. 

Барселона отворено покажува интерес за Халанд, а претседателот Хоан Лапорта наводно го гледа како идеално засилување. Но, Гардиола беше дециден дека, иако секој врвен клуб би посакал таков играч, Манчестер Сити е вистинското место за него сега. 

„Халанд точно знае каде се наоѓа и што градиме тука“, рече Гардиола, истакнувајќи ја неверојатната голгетерска форма на норвешанецот, кој има постигнато повеќе голови од некои клубови низ целата историја на групната фаза во Лигата на Шампионите. 

Иако Гардиола призна дека фудбалот е непредвидлив, тој даде до знаење дека Халанд е целосно во согласност со амбициите на клубот и дека нема причина да замине. 

„Сè може да се случи во фудбалот,“ додаде тој, „но со начинот на кој играме, поддршката што ја добива и неговата улога во тимот, не гледам причина да замине во скоро време.“ 

Манчестер Јунајтед се соочува со клучна одлука во јануарскиот преоден рок околу иднината на капитенот Бруно Фернандеш. Иако останува еден од најконзистентните фудбалери во тимот, резултатите и формата на клубот отворија прашања за неговата иднина на Олд Трафорд. 

Сериозен интерес доаѓа од клубови од Саудиска Арабија и Европа. Саудиската лига, која летоска веќе понуди над 100 милиони фунти, понуда што беше одбиена, подготвува уште побогата понуда во јануари, со плата која би била повеќе од двојно повисока од онаа што моментално ја заработува со Црвените Ѓаволи. 

Португалецот има договор со Јунајтед до 2027. Но, клубот може да биде подготвен да го продаде ако пристигне соодветна понуда со значителна добивка во однос на 68-те милиони фунти платени на Спортинг Лисабон во 2020. 

Фернандеш досега има одиграно 298 натпревари во црвениот дрес, со над 100 голови и 80 асистенции. Но, неговите поединечни успеси не беа доволни да го вратат клубот на врвот на Премиер Лигата или во борба за европски трофеи. 

Со клубот во процес на реструктуирање и нестабилни резултати, иднината на Фернандеш може да стане клучна точка во пошироката реконструкција на тимот. Јануарскиот преоден рок би можел да донесе и други промени во составот, додека Јунајтед се обидува да изгради тим што ќе биде конкурентен на сите фронтови. 

Рубен Аморим ја минимизираше медиумската критика поради лошиот старт на Манчестер Јунајтед оваа сезона, шеговито изјавувајќи дека тоа е ништо во споредба со она што го преживеал порано во кариерата. Португалскиот стратег се насмеа на наводите дека е „под опсада“, велејќи дека сегашниот притисок му изгледа речиси „љубезен“. 

Иако тактиката и резултатите се под лупа, Аморим тврди дека вистинскиот проблем не се медиумите, туку влијанието што тие го имаат врз некои од играчите. Според него, дел од тимот им попушта на надворешните критики, наместо целосно да се фокусира на неговата 3-4-3 формација и секојдневниот тренинг. 

Оваа динамика дополнително ја усложнува реконструкцијата на тимот. Сепак, постојат знаци на напредок. Клучни играчи јавно го поддржаа тренерот, а победата над Сандерленд покажа поголема дисциплина и верност кон неговата визија. 

И покрај тоа, притисокот расте. Јунајтед сè уште се наоѓа во долниот дел од табелата, а дебатите за формацијата не стивнуваат. Навивачите и експертите остануваат скептични, а управата, иако моментално го поддржува, очекува конкретен напредок. 

Рис Џејмс мораше да се повлече од англиската репрезентација поради повреда здобиена на натпреварот меѓу Челси и Ливерпул. Повредата значи дека капитенот на Челси ќе ги пропушти претстојните репрезентативни натпревари, што е удар и за клубот и за селекцијата. 

Англискиот селектор Герет Саутгејт веднаш реагираше и го повика младиот дефанзивец на Манчестер Сити, Нико О’Рајли. Талентираниот играч, познат по својата смиреност и флексибилност, ќе биде ново лице во репрезентацијата. 

Џејмс, кој редовно настапува за Англија кога е здрав, сега се соочува со период на рехабилитација. Додека медицинскиот тим ја проценува сериозноста на повредата, веќе е потврдено дека ќе ги пропушти следните меѓународни средби. 

Деби настапот на Трент Александер-Арнолд во Лигата на Шампионите за Реал Мадрид доби горчлив крај, откако мораше да го напушти теренот по само пет минути поради повреда на задната ложа. Првичните прогнози од медицинскиот тим најавуваа пауза од шест до осум недели, што веднаш предизвика загриженост за неговата достапност за неколку важни натпревари, особено за Ел Класико против Барселона. 

Но, новите информации внесуваат оптимизам. Медицинскиот и тренерскиот тим на клубот се задоволни од напредокот на англискиот бек. Неговата посветеност и континуирано подобрување во фазата на рехабилитација сугерираат дека враќањето на теренот би можело да се случи порано од предвиденото. 

Според најновите извештаи, Александер-Арнолд би можел да биде подготвен за игра веќе во средината на октомври, веднаш по репрезентативната пауза. Тоа отвора можност да настапи на натпреварот против Гетафе, идеална прилика да влезе во ритам пред дербито со Барселона. 

Серхио Регилон, поранешниот дефанзивец на Тотенхем и Манчестер Јунајтед, кој сега е слободен агент, според извори е блиску до потпис со Интер Мајами, каде би можел да игра со Лионел Меси. По одлуката на Тотенхем да не му го продолжи договорот, Регилон привлече интерес од неколку клубови од МЛС, а Интер Мајами е најнапред во трката за неговото ангажирање. 

28-годишниот шпански лев бек е познат по брзината, сигурната одбрана и способноста да се вклучува во нападот: вештини кои ги усоврши во Премиер Лигата и Ла Лига.  

Овој потенцијален трансфер ја илустрира и растечката привлечност на МЛС за искусни европски фудбалери кои бараат нови предизвици надвор од најголемите европски лиги. Доколку Регилон се пресели во Интер Мајами, тоа ќе биде значајно засилување за тимот во нивниот стремеж кон подобри резултати и конкурентност. 

Манчестер Јунајтед ќе одигра неколку пријателски натпревари среде сезоната за да ги надомести финансиските загуби предизвикани од недостигот на настапи во европските натпреварувања оваа сезона.  Рубен Аморим, потврди дека клубот планира да ги искористи слободните термини среде недела, кои се достапни бидејќи не учествуваат во континенталните турнири, за да ги зголеми приходите и да ја одржи врската со фановите ширум светот. 

Клубот претрпе голем удар откако заврши на 15-то место во Премиер Лигата и загуби во финалето на Лига Европа, што претставува прво отсуство од европските натпревари во последните 11 години. Ова му донесе загуба од околу 85 до 100 милиони фунти и го намали приходот од домашните натпревари. Пријателските натпревари се гледаат како неопходен начин за надоместување на дел од загубените средства. 

Се зборува дека тимот може да ги одигра зимските пријателски натпревари во Саудиска Арабија, земја што брзо станува важен играч во светскиот спорт. Топлата клима и финансиските стимуланси ја прават оваа дестинација привлечна за плановите на клубот во текот на зимската пауза. Преговорите со локални партнери се во тек, а Саудиска Арабија е главен кандидат за оваа турнеја. 

Еден од најинтересните моменти би можел да биде натпревар против клубот на Кристиано Роналдо, Ал-Наср, кој игра во Саудиска Арабија. Роналдо, кој замина од Манчестер Јунајтед под тешки околности во 2022 година, би можел повторно да се соочи со својот поранешен тим, создавајќи големо внимание кај фановите и медиумите. Иако натпреварот не е уште официјално потврден, оваа средба би ја направила турнејата уште позанимлива. 

Расмус Хојлунд не губи време за да ги замолчи критичарите. Откако летово пристигна во Наполи, данскиот напаѓач ја пронајде својата форма и брзо се етаблираше како клучен играч во нападот. 

Оваа недела, 22-годишникот го постигна својот 4 гол во последните 6 натпревари: 2 во Серија А и 2 во Лигата на Шампионите. Неговиот настап против Спортинг во ЛШ му донесе и признание за најдобар играч на натпреварот, што само го потврдува неговото влијание на најголемата сцена. 

Враќањето во форма на Хојлунд е дел од една поширока слика: играчите кои не се снајдоа во Манчестер Јунајтед, често цветаат откако ќе го напуштат клубот: Рашфорд, Еланга, па сега и Хојлунд. списокот на така наречени „флопови“ кои се покажуваат како врвни играчи во други средини сè повеќе расте. Ова отвора сериозни прашања за тоа што не функционира во системот на Јунајтед. 

Но за Наполи, дилеми нема. Хојлунд со својата енергија, движење и прецизност донесе нова димензија во нападот, освојувајќи ги навивачите. Како што клубот ги продолжува своите амбиции дома и во Европа, формата на Хојлунд сугерира дека ова е само почеток на нешто поголемо.