Федерико Бернардески ќе стане четвртиот Италијанец кој ќе оди во фудбалската МЛС лига ова лето. Тој ја прифати понудата на Торонто и ќе ги следи Лоренцо Инсиње, Џорџо Киелини и Доменико Кришито, кои веќе потпишаа со клубовите од МЛС.

Бернардески е слободен играч откако Јувентус не му понуди нов договор. Тој побара од Торонто некое време да размисли и на крајот одлучи да им се придружи на Инсиње и Кришито во канадскиот тим. Таму долго време играше уште еден Италијанец – Себастијан Џовинко.

28-годишниот Бернардески постигна вкупно 12 гола и 24 асистенции на 183 натпревари за Јувентус. Минатата сезона тој беше солидна резерва и очекувано клубот се определи да се раздели со него.

Томас Парти и Бернд Лено нема да патуваат со Арсенал на претсезонската турнеја на тимот во САД.

29-годишниот играч од средниот ред заработи повреда на бутот за време на првата контрола на тимот против Нирнберг во петокот и најверојатно ќе биде надвор од составот на Микел Артета најмалку неколку недели.

Во исто време, германскиот голман останува во Лондон бидејќи се очекува во наредните денови да го финализира очекуваниот трансфер во Фулам. Арсенал денеска патува во САД за да игра со Евертон на пријателски натпревар во Балтимор во недела, пред да замине за Орландо на натпреварите против Челзи и Орландо Сити.

Бразилскиот фудбалер Рафиња е нов фудбалер на Барселона, потврдуваат од каталонскиот гигант.

Рафиња пристигна во Барса од Лидс Јунајтед, а медиумите пренесуваат дека целосниот трансфер е вреден 58 милиони евра.

Официјалниот договор Бразилецот ќе го потпише после лекарските прегледи кои треба да се извршат во новиот тим.

Рафиња во Лидс помина две сезони, и во тој период одигра 65 натпревари, постигна 17 гола и запиша 12 асистенции.

Осман Дембеле стави потпис на новиот договор со Барселона со кој останува во клубот до 2024 година.

Веќе неколку месеци имаше информации за негова преселба во Челзи и Пари Сен Жермен, но на крај офанзивецот одлучи да ја намали платата и да остане во Шпанија. Тој пристигна во каталонскиот гигант пред пет години од Борусија Дортмунд за 140 милиони евра.

Честите повреди не му дозволија да го покаже својот талент. Чави Хернандез, сепак, му даде доверба и успеа да го убеди да биде дел од проектот, кој треба да ја врати Барселона на врвот на шпанскиот и европскиот фудбал.

Во досегашните настапи во дресот на Барселона во Ла Лига, Дембеле има 19 погодоци и 27 асистенции.

Досегашниот фудбалер на Манчестер Сити, Рахим Стерлинг, и официјално е нов играч на Челзи.

Стерлинг кој во Сити помина седум сезони, со Челзи потпиша петгодишен договор со опција за продолжување на уште 12 месеци. Според информациите трансферот е вреден 47,5 милиони фунти.

27-годишниот англиски репрезентативец е првото засилување за екипата од Стенфорд Бриџ после доаѓањето на новите сопственици.

Италијанскиот интернационалец Џанлука Манчини го обнови договорот со Рома до 2027 година. Дефанзивецот три сезони е во редовите на „џалоросите“ – првично на позајмица од Аталанта, а потоа купен за 13 милиони евра.

Манчини веќе одигра 128 натпревари за тимот од главниот град, а може да се пофали и со 7 гола. Во последната кампања тој забележа дури 45 натпревари, на кои доби 21 жолт картон и 1 црвен.

За „азурите“ има 9 натпревари од дебито во 2019 година.

Поранешниот играч на Реал Мадрид, Герет Бејл, увери дека МЛС не е лига за играчи, кои се пред откажување од спортот. Репрезентативецот на Велс, исто така, рече дека се надева оти преселбата во новиот тим ФК Лос Анџелес ќе му овозможи да остане подготвен за репрезентацијата на неговата земја до Европското првенство во 2024 година. Неговиот сегашен договор е за една сезона, но може да биде продолжен до 2024 година, кога Бејл се надева дека Велс ќе учествува на Европско првенство.

„Како што реков, тоа е првенство што е навистина развиено и измина долг пат во последните 10 години. Мислам дека се прави сериозен напор за напредок во лигата, а играчите кои доаѓаат можат да го видат тоа. Мислам дека никој повеќе не го гледа овој шампионат како таков за натпреварувачи, кои се на прагот да се откажат. Сето тоа е многу возбудливо. Играњето пред такви навивачи е една од причините зошто играте фудбал“, додаде Герет Бејл.

Един Џеко ја одбил понудата на Јувентус, откри италијанскиот новинар Алфредо Педула. Репрезентативецот на Босна и Херцеговина претпочита да остане во Интер, иако со враќањето на Ромелу Лукаку сигурно е дека ќе добие помалку шанси во новата сезона.

Јуве изминатиот викенд дал конкретна понуда за Џеко, но 36-годишниот напаѓач ја одбил. За да покаже дека е амбициозен да се бори за своето место во Интер, тој дури и предвреме пристигнал на почетокот на летните тренинзи.

На Масимилијано Алегри навистина му се допаѓа стилот на игра на Џеко и не е првпат да го сака во својот тим. Минатата кампања Бошњакот постигна 17 гола на 48 натпревари во сите натпреварувања.

Неговиот договор со Интер е до летото 2023 година, а неговата плата е 4 милиони евра по сезона.

Европската фудбалска куќа ( УЕФА ) го објави наградниот фонд за натпреварувањата кои се под нејзина организација за сезоната 2022/23.

Вкупната сума е 3,5 милијарди евра, од кои 465 милиони евра ќе добијат учесниците во Лига Европа, а 235 милиони евра клубовите кои играат во Конференциската лига.

Традиционално најголема добивка ќе имаат клубовите учесници во Лигата на шампионите. Вкупната сума е 2,032 милијарди евра. Клубовите кои ќе застанат на чекор пред главната ждрепка и ќе бидат елиминирани во плеј-оф рундата од квалификациите ќе добијат 5 милиони евра. Клубовите кои ќе бидат дел од групната фаза на турнирот ќе добијат 15,64 милиони евра.

За секоја победа во групата клубовите ќе заработат 2,8 милиони евра, за нерешено – 930 илјади евра.Пласманот во 1/8 финалето од Лигата на шампионите на учесникот ќе му донесе 9,6 милиони евра, во четвртфиналето 10,6 милиони евра. , во полуфиналето – 12,5 милиони евра, финалистите ќе добијат 15,5 милиони евра. Победникот на ЛШ на крајот ќе добие дополнителни 4,5 милиони евра.

Исто така и натпреварот за Суперкупот на УЕФА им носи на двата учесника по 3,5 милиони евра, а победникот 1 милион евра дополнително.

Микел Артета го именуваше 23-годишниот норвешки играч од средниот ред Мартин Одегард за капитен на тимот за следната сезона, објавија медиумите во Англија.

Одегард му се приклучи на Арсенал од Реал Мадрид во јануари 2021 година. Прво играше на позајмица за лондонски клуб, а потоа во летото истата година, Арсенал го купи Норвежанецот за 40 милиони евра. Минатата сезона Одегард одигра 40 натпревари за Арсенал во сите натпреварувања, на кои постигна седум гола и даде пет асистенции.

Пред Одегард, капитен на Арсенал  беше Александре Лаказет, кој во актуелниот преоден рок од Арсенал се пресели во Лион. Во сезоната 2021/2022 во англиската Премиер лига, Арсенал заврши на петтото место со 69 бодови.