Актуелниот англиски шампион Манчестер Сити го декласираше во саботата Арсенал со 5-0 (3-0) во рамки на првиот натпревар од 3. коло во Премиер лигата.

Стрелци за Сити беа Гундоган (7 минута), Торес (12, 84), Жезус (43) и Родри (53).

Арсенал, кој дербито во Манчестер го играше 55 минути со фудбалер помалку поради исклучувањето на Џака, го претрпе третиот пораз во новата сезона што за лондонскиот премиерлигаш е најлош старт од 1954 година.

Арсенал е последно пласиран на табелата со гол-разлика 0-9.

Напаѓачот Моис Кин е блиску до враќање во Јувентус. Торинскиот клуб се договори за закуп на фудбалерот со обврска да го откупи под одредени услови. Утре, 21-годишниот фудбалер ќе помине лекарски преглед за да го комплетира трансферот. Вкупниот износ на зделката ќе биде околу 20 милиони евра.

Кин се пресели од Јуве во Евертон пред две години за 25 милиони фунти. Неговиот актуелен договор со англискиот клуб истекува во 2024 година.

Италијанецот дебитираше за Јувентус во 2016 година, кога тимот го предводеше Масимилијано Алегри кој се врати во Торино ова лето. Минатата сезона, Кин играше за ПСЖ на позајмица.

Македонската репрезентација до 21 година ги започна подготовките за квалификациските натпревари против Франција во Ле Ман на 2. септември и против Србија на 7 септември во Охрид на стадионот „Билјанини Извори“.

Селекторот Драги Канатларовски се соочува со проблеми поради отсуството на Марио Младеновски (Ботев Пловдив), Адриан Хајдари (Рапид Виена) и Димитар Тодоровски (Работнички). Тројцата поради позитивен Ковид-19 тест ќе ги пропуштат двата воведни натпревари од квалификациите за ЕП 2023. Амел Рустемоски од швајцарски Вил поради повреда заработена на клупскиот тренинг не е во можност да се стави на располагање за првиот меч против Франција.

Од денес може да се купат влезници за квалификациските мечеви на нашите најдобри фудбалери против Ерменија на 2 септември и Романија на 8 септември на националната арена – „Тодор Проески“ во Скопје.

Влезниците по цена од 300 денари можат да се набават преку продажната мрежа на –„MKTickets“. Според протоколите за заштита од Ковид-19, на стадионот ќе може да влезат само лица кои имаат сертификат/потврда за извршена имунизација (вакцинација) од Ковид-19 односно примена најмалку прва доза, или лица кои поседуваат сертификат/потврда за прележан Ковид-19 во последните 45 дена, гледајќи од денот на оздравувањето.

Тоа не се однесува на лица под 18 годишна возраст.

Директорот на Борусија Дортмунд, Михаел Зорц е лут поради поврзувањето на Ерлинг Халанд и ПСЖ, јавуваат германските медиуми.

Зорц остро реагираше на наводите дека Халанд за 200 милиони евра ќе премине во ПСЖ, кој во норвешкиот напаѓач наводно гледа замена за Килијан Мбапе, кој има желба да премине во Реал Мадрид. Сепак, Дортмунд не размислува за продажба на играчот со кого има договор до 2024. година.

„Ние сме фудбалски клуб, а не банка! Нашиот став е јасен и не се промени. Претпоставувам дека ќе има уште наводи во наредните неколку дена, но нашиот став е јасен и нема да го повторувам секој пат.“ – вели Зорц.

За Халанд интерес покажаа сите големи европски клубови, но Дортмунд не сака да го продаде ова лето. Цената на овој напаѓач наредното лето ќе изнесува 70 милиони евра, бидејќи тогаш ќе се активира клаузулата во која стои дека ќе може за тој износ да го напушти клубот.

Жерар Пике покрај професионалната фудбалска кариера, гради и бизнис кариера.

Компанијата на Пике, „Космос Холдинг“ ја искористи шансата и ги откупи правата за пренос на натпреварите од Лига 1 во Шпанија во следните три години.

Пике повлече тактички потег со оглед на тоа дека Лионел Меси неодамна се пресели во ПСЖ, па тоа ќе му донесе многу пари на дефанзивецот.

Меси се очекува да дебитира вечерва против Ремс, а Пике сигурно ќе заработи многу пари, иако засега не се открива точната сума.

Фудбалерот на Фиорентина, Влаховиќ постигна гол во победата над Торино и доби неверојатен поздрав од трибините од навивачите.

Тој по победата посочи дека не сака да го споредуваат со најдобрите во моментов во светот, пред се со Халанд.

„Целиот стадион го пееше моето име, сонував за вакво нешто од дете, трогнат сум. Мислам дека сум на вистинскиот пат, но мора да работам напорно со понизност и посветеност. Фокусиран сум и не смеам да размислувам дека веќе сум постигнал нешто големо, тоа би било грешка. Ќе има подеми и падови, но ќе давам се од себе за клубот, градот, навивачите, тренерот. Не сакам споредби. Халанд постигнува по десет гола во Лигата на шампионите, три години игра во тоа натпреварување. Се надевам дека некогаш ќе го достигнам, но сега морам само да работам. Ги следам најдобрите напаѓачи.“ – изјави Влаховиќ.

Манчестер Јунајтед со победата над Волвс стигна до 28. натпревар по ред без пораз на гостински терен, со што испиша историја во Премиерлигата.

Екипата од Олд Трафорд го собори рекордот на Арсенал, кој во 2004. година забележа 27. натпревари без лигашки пораз на гостувањата.

Јунајтед во текот на овие 28 натпревари постигна 51 погодок, а прими 19, при што запиша 17 победи, додека Арсенал сјајната низа ја заврши со гол разлика 54:17, имајќи ист број на победи.

Единствениот погодок на натпреварот помеѓу Вулверхемптон и Јунајтед беше дело на Гринвуд во 80. минута, по асистенција на Варан, кој дебитираше за Јунајтед. Домашните фудбалери се жалеа по погодокот, бидејќи сметаа дека во текот на акциајта Погба го фаулираше Невес. Но, нити судијата, нити ВАР не ја менуваа одлуката.

„Волците“ беа поблиску до победа, но пропуштија неколку одлични шанси, за што на крајот беа и казнети.